ព័ត៌មានអន្ដរជាតិ

ក្រសួងការបរទេសអាមេរិកយល់ព្រមលក់អាវុធដល់កោះតៃវ៉ាន់ក្នុងទំហំទឹកប្រាក់ជាង ១.៨ ពាន់លានដុល្លារ

បានផុស

៥ years មុន

នៅ

ថ្ងៃព្រហស្បតិ៍ ២២ តុលា ២០២០

ដោយ

មន្ទីរបញ្ចកោណបាននិយាយថា ក្រសួងការបរទេសអាមេរិកបានយល់ព្រមលក់អាវុធទំនើបៗក្នុងទំហំទឹកប្រាក់ជាង ១.៨ ពាន់លានដុល្លារទៅឲ្យកោះតៃវ៉ាន់ ។

យោងតាមទីភ្នាក់ងារសហប្រតិបត្តិការសន្តិសុខការពារជាតិដែលបានជូនដំណឹងដល់សមាជិកសភាអំពីកិច្ចព្រមព្រៀងនេះបានឲ្យដឹងថា ការលក់សព្វាវុធដែលត្រូវបានស្នើឡើងនេះត្រូវបានបញ្ជាក់ដោយក្រសួងការបរទេសកាលពីថ្ងៃពុធ ។ ការលក់នេះរួមមានរថយន្តដឹកគ្រាប់មីស៊ីលរបស់ក្រុមហ៊ុន Lockheed Martin ប្រព័ន្ធបាញ់គ្រាប់រ៉ុក្កែត (HIMARS) ជាមីស៊ីលរយៈចម្ងាយឆ្ងាយដែលផលិតដោយក្រុមហ៊ុន Boeing និងឧបករណ៍ចាប់សញ្ញាធ្វើទំនើបកម្មសម្រាប់យន្ដហោះចម្បាំង F-16 របស់តៃវ៉ាន់ ខណៈដែលទាំងអស់នេះមានតម្លៃជាង ១.៨ ពាន់លានដុល្លារ ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

កិច្ចព្រមព្រៀងនេះកើតឡើងចំពេលមានសេចក្តីរាយការណ៍ថា ការលក់សព្វាវុធផ្សេងទៀតទៅកោះតៃវ៉ាន់កំពុងស្ថិតក្នុងដំណាក់កាលនៃការយល់ព្រមដែលគេជឿថារួមមាន យន្តហោះដ្រូន MQ-9 Reaper និងប្រព័ន្ធការពារមីស៊ីលនៅតាមឆ្នេរសមុទ្រក្នុងចំណោមអាវុធដទៃទៀតដែលមានតម្លៃចន្លោះពី ៥ ទៅ ៧ ពាន់លានដុល្លារ ។

ទោះបីជាការលក់ប្រព័ន្ធអាវុធទាំង ៣ បើកភ្លើងខៀវកាលពីថ្ងៃពុធក៏ដោយ ប៉ុន្តែវានៅតែត្រូវការការអនុញ្ញាតពីសភាអាមេរិក ខណៈក្រុងប៉េកាំងបានប្តេជ្ញាចិត្តរួចជាស្រេចនូវការឆ្លើយតប “ស្របច្បាប់ និងចាំបាច់” ប្រសិនបើពួកគេសម្រេចបាន ដោយទទូចថា កិច្ចព្រមព្រៀងនេះនឹងធ្វើឲ្យអន្តរាយដល់ផលប្រយោជន៍សន្តិសុខរបស់ចិនយ៉ាងធ្ងន់ធ្ងរ និងធ្វើឲ្យប៉ះពាល់ដល់ទំនាក់ទំនងចិនអាមេរិក ។

ទន្ទឹមនោះមិនមានវិធានការជាក់លាក់ណាមួយត្រូវបានស្នើឡើងនោះទេ ប៉ុន្តែប្រទេសចិនធ្លាប់បានដាក់ទណ្ឌកម្មលើក្រុមហ៊ុនផលិតអាវុធរបស់សហរដ្ឋអាមេរិក បន្ទាប់ពីការលក់ទៅឲ្យកោះតៃវ៉ាន់រួមទាំងក្រុមហ៊ុន Lockheed Martin ផងដែរ ។

ការលក់នេះក៏កើតឡើងផងដែរនៅពេលទីក្រុងវ៉ាស៊ីនតោនបង្កើនប្រតិបត្តិការយោធានៅសមុទ្រចិនខាងត្បូង និងខាងកើតដោយធ្វើការបង្ហាញជាទៀងទាត់នូវបេសកកម្មកងកម្លាំងជាមួយយន្តហោះទម្លាក់គ្រាប់បែករយៈចម្ងាយឆ្ងាយ ការហោះហើរចារកម្មជាមួយយន្តហោះស៊ើបការណ៍ និងសេរីភាពក្នុងការធ្វើនាវាចរណ៍ជាដើម ។ កាលពីសប្តាហ៍មុននាវាពិឃាដអាមេរិកមួយគ្រឿងបានឆ្លងកាត់ច្រកសមុទ្រតៃវ៉ាន់ ខណៈដែលមន្ទីរបញ្ចកោណចាត់ទុកថាជាបេសកកម្មធម្មតាដោយបង្កឲ្យមានការស្តីបន្ទោសយ៉ាងខ្លាំងពីទីក្រុងប៉េកាំងដែលបានព្រមានថា កងកម្លាំងរបស់ខ្លួននឹងនៅតែមានការប្រុងប្រយ័ត្នខ្ពស់ បន្ទាប់ពីប្រតិបត្តិការស្រដៀងគ្នានេះឆ្លងកាត់ច្រកសមុទ្រកោះតៃវ៉ាន់ ៕