ប្រេស៊ីល រកឃើញអ្នកឆ្លងកូវីដជាង ៩ ម៉ឺនករណីក្នុងរយៈពេល ២៤ ម៉ោងចុងក្រោយ

ក្រសួងសុខាភិបាលប្រេស៊ីលបាននិយាយកាលពីថ្ងៃព្រហស្បតិ៍ថា ប្រទេសប្រេស៊ីលបានកត់ត្រាករណីឆ្លងថ្មីនៃជំងឺកូវីដ ១៩ ចំនួន ៩១,០៩៧ ករណី និងអ្នកស្លាប់ថ្មី ៣,៧៦៩ នាក់ក្នុងរយៈពេល ២៤ ម៉ោងចុងក្រោយ ។

នៅក្នុងខែមីនា ប្រជាជនចំនួន ៦៦,៨៦៨ នាក់បានស្លាប់ដោយសារជំងឺកូវីដ ១៩ នៅក្នុងប្រទេសដ៏ធំ និងមានប្រជាជនច្រើនបំផុតនៅអាមេរិកឡាទីន ។

យោងទៅតាមមូលនិធិ Oswaldo Cruz បានឲ្យដឹងថា ប្រព័ន្ធមន្ទីរពេទ្យកំពុងរងនូវបញ្ហាប្រឈមយ៉ាងខ្លាំងនៅក្នុងសប្តាហ៍ចុងក្រោយនេះនៅទីក្រុង Brasilia និងរដ្ឋចំនួន ១៧ ផ្សេងទៀត ខណៈដែលគ្រែក្នុងបន្ទប់សង្គ្រោះបន្ទាន់ (ICU) បានកើនឡើងលើស ៩០ ភាគរយ ។

ទន្ទឹមនឹងនេះដែរផ្នែកធំៗនៃប្រទេសនេះស្ថិតនៅក្រោមការធ្វើចត្តាឡីស័កដ៏តឹងរ៉ឹង និងបម្រាមគោចរពេលយប់សម្រាប់សប្តាហ៍នៃបុណ្យ Easter ។

ទន្ទឹមនោះទីក្រុង Sao Paulo ដែលជាទីក្រុងមានប្រជាជនច្រើនបំផុតនៅប្រេស៊ីលប្រមាណ ៤៦ លាននាក់នឹងស្ថិតក្នុងស្ថានភាពអាសន្នរហូតដល់ថ្ងៃទី ១២ ខែមេសា ។

គួរបញ្ជាក់ថា គិតត្រឹមពេលនេះប្រទេសប្រេស៊ីលមានករណីឆ្លងជំងឺកូវីដ ១៩ សរុបចំនួន ១២,៨៤២, ៧១៧ ករណី និងមានអ្នកមានស្លាប់សរុបចំនួន ៣២៥,៥៥៩ នាក់ ៕

ប្រែសម្រួលដោយ ៖ ជីវ័ន្ត

ប្រភព ៖ XINHUA

ចុចអាន ៖ ចំនួនអ្នកឆ្លងកូវីដសរុបនៅ ប្រេស៊ីល កើនលើស ១២.៥ លាននាក់ ក្រោយរកឃើញថ្មីជាង ៤ ម៉ឺនករណី

ចុចអាន ៖ ប្រេស៊ីល រកឃើញអ្នកឆ្លងកូវីដថ្មីប្រចាំថ្ងៃមិនធ្លាប់មានជាង ១០ ម៉ឺនករណី