ព័ត៌មានអន្ដរជាតិ

វេជ្ជបណ្ឌិត២រូប និងឯកអគ្គរាជទូតជប៉ុនប្រចាំប្រទេសថៃ បានឆ្លងកូវីដ-១៩ នៅថៃ

បានផុស

៤ years មុន

នៅ

ថ្ងៃចន្ទ ៥ មេសា ២០២១

ដោយ

នាយកមន្ទីរសុខាភិបាលខេត្ត Khon Kaen លោកវេជ្ជបណ្ឌត Somchaichote Piyawachwela បានប្រាប់សន្និសីទសារព័ត៌មានមួយនៅថ្ងៃអាទិត្យថា វេជ្ជបណ្ឌិត២រូបធ្វើការនៅនាយកដ្ឋានវះកាត់ផ្នែកមហាវិទ្យាល័យវេជ្ជសាស្ត្រនៅមន្ទីរពេទ្យ Srinagarind របស់សាកលវិទ្យាល័យ Khon Kaen បានឆ្លងកូវីដ-១៩។

លោកវេជ្ជបណ្ឌិតទាំងពីរនាក់ជាអ្នកឆ្លងទី១៥ និងទី១៦ នៅខេត្ត Khon Kaen ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកវេជ្ជបណ្ឌិត Somchaichote និយាយថា អ្នកឆ្លងទី១៥អាយុ២៦ឆ្នាំបានធ្វើតេស្តវិជ្ជមានកាលពីថ្ងៃទី២ ខែមេសា។ គាត់បាននិយាយពីពេលវេលាតាមដានគឺ គាត់បានញាំអាហារ និងដើរទិញឥវ៉ាន់នៅហាងមួយកន្លែង បន្ទាប់មកគាត់បានទៅផ្ទះ ហើយក៏វិលត្រឡប់មកធ្វើការវិញនៅនាយកដ្ឋានវះកាត់ដែលជាកន្លែងបានជួបក្រុមវេជ្ជបណ្ឌិត បុគ្គលិកពេទ្យ និងអ្នកជំងឺជាច្រើន។

ចំណែកអ្នកឆ្លងទី១៦អាយុ២៥ឆ្នាំក៏ធ្វើការនៅនាយកដ្ឋានវះកាត់ដែរ។ គាត់បានជិតស្និទ្ធជាមួយក្រុមវេជ្ជបណ្ឌិតជាច្រើន ជួបបុគ្គលិកពេទ្យ និងអ្នកជំងឺជាច្រើន ហើយក៏បានធ្វើដំណើរទៅទីក្រុងបាងកកថែមទៀត។

លោកវេជ្ជបណ្ឌិត Somchaichote បន្ថែមថា ជាពិសេសទៀតនោះ វេជ្ជបណ្ឌិតទាំងពីរនាក់បានចូលរួមក្នុងការប្រគំតន្ត្រីមួយនៅខេត្ត Khon Kaen ប៉ុន្តែគាត់មិនបាននិយាយពីកាលបរិច្ឆេទ និងពេលវេលាជាក់នៃសកម្មភាពរបស់ពួកគាត់ទេ។

មន្ទីរពេទ្យ Srinagarind Hospital ក៏បានចេញសេចក្តីប្រកាសព័ត៌មានមួយដោយនិយាយថា ដោយសារតែមានបុគ្គលិកពេទ្យខ្លះបានឆ្លងជំងឺកូវីដ-១៩ ហើយបុគ្គលិកពេទ្យជាច្រើនបានផ្អាកធ្វើការ ដូច្នេះលទ្ធភាពផ្តល់សេវាព្យាបាលរបស់មន្ទីរពេទ្យមានកំណត់។

លោកវេជ្ជបណ្ឌិត Pongsak Kiatchusakul នាយកមន្ទីរពេទ្យ Srinagarind Hospital បាននិយាយថា ក្រុមគ្រូពេទ្យ និងអ្នកជំងឺដែលបានទំនាក់ទំនងជាមួយលោកវេជ្ជបណ្ឌិត២រូបដែលបានឆ្លងកូវីដ-១៩ ពីថ្ងៃទី២២ ខែមីនា ដល់ទី២ ខែមេសា ត្រូវទៅធ្វើតេស្ត និងធ្វើចត្រាឡីស័ក។

មុននេះមួយថ្ងៃឯកអគ្គរាជទូតជប៉ុនប្រចាំប្រទេសថៃ លោក Kazuya Nashida បានធ្វើតេស្តវិជ្ជមានកូវីដ-១៩។ នេះបើតាមរដ្ឋមន្ត្រីក្រសួងការបរទេសជប៉ុនបាននិយាយកាលពីថ្ងៃសៅរ៍ ប៉ុន្តែលោកមិនបាននិយាយលំអិត។

ក្រសួងការបរទេសបានបញ្ជាក់ថា ឯកអគ្គរាជទូតបានកំពុងសម្រាកព្យាបាលនៅមន្ទីរពេទ្យមួយក្នុងប្រទេសថៃ ហើយសុខភាពរបស់លោកល្អប្រសើរហើយ។

ក្រសួងការបរទេសជប៉ុនបញ្ជាក់ថា ៖«បុគ្គលិកដែលសង្ស័យទំនាក់ទំនងជាមួយឯកអគ្គរាជទូតគឺត្រូវបានដាក់ឲ្យធ្វើចត្តាឡីស័កនៅផ្ទះ និងតាមដានសុខភាព»។

មជ្ឈមណ្ឌលសម្រាប់គ្រប់គ្រងស្ថានភាពកូវីដ-១៩ថៃបាននិយាយថា នៅថ្ងៃអាទិត្យម្សិលមិញ មានករណីឆ្លងកូវីដ-១៩ចំនួន៩៦នាក់ ក្នុងនោះមាន ជនជាតិជប៉ុន៣នាក់ដែរ ប៉ុន្តែមិនបានបង្ហាញព័ត៌មានលំអិតពាក់ព័ន្ធនឹងជប៉ុនទេ៕

ប្រែសម្រួល៖ វីរបុត្រ
ប្រភព៖ Bangkokpost