ជំនន់ទឹកភ្លៀង​សម្លាប់​មនុស្ស​៤៤​នាក់​នៅ​ឥណ្ឌូណេស៊ី​

យ៉ាង​ហោច​ណាស់ មនុស្ស​៤៤​នាក់​ត្រូវ​បាន​សម្លាប់ បន្ទាប់​ពី​ទឹក​ជំនន់ទឹក​ភ្លៀង​បាន​​​កើត​ឡើង​យ៉ាង​លឿន​ បណ្តាលឲ្យ​​បាក់​ដី​​បាន​វាយ​ប្រហារកោះ​មួយ​នៅ​ភាគ​ខាង​កើត​ប្រទេស​ឥណ្ឌូណេស៊ី នៅ​​ព្រឹក​ថ្ងៃ​អាទិត្យ ទី​៤ ខែ​មេសា។ នេះ​បើ​តាម​ក្រុម​សង្គ្រោះ​បន្ទាន់​បាន​និយាយ និង​បន្ថែម​ថា តួលេខ​ស្លាប់​អាច​នឹង​​នៅ​មាន​ទៀត។

អ្នក​នាំ​ពាក្យ​ទី​ភ្នាក់​ងារ​គ្រោះ​មហន្តរាយ​ជាតិ​លោក Raditya Jati បាន​ប្រាប់​ AFP ថា ៖«មាន​មនុស្ស​៤៤​នាក់​បាន​ស្លាប់ និង​៩​នាក់​បាន​របួស​នៅកោះ​​ East Flores ហើយ​នៅ​មាន​ច្រើន​នាក់​ទៀត​​ស្ថិត​នៅ​ក្រោម​ដីភក់»។

ប៉ុន្មាន​ម៉ោង​មុន​ពេល​មនុស្ស​ភ្ញាក់​ពី​ដំណេក​ដើម្បី​អបអរពិធី​បុណ្យ​ស៊ុត​អេស្ទើរ​នៅ​ថ្ងៃ​អាទិត្យ​ មាន​ភ្លៀងដ៏​ខ្លាំង​ដូច​ហែក​មេឃ​បានកើត​មាន​ ហើយ​បង្កើត​ជា​ទឹក​ជំនន់​វាយ​ប្រហារ​នៅកោះ Flores ដែល​ភាគ​ច្រើន​ជា​កាតូលិក។

ពេល​នោះ​ដី​ភក់​បាន​ជន់​លិច​លើ​ផ្ទះ​សម្បែង​អ្នក​ស្រុក​ ខណៈ​ស្ពាន​ និង​ផ្លូវ​នៅ​ភាគ​ខាង​កោះ​ត្រូវ​បាន​បំផ្លាញ។

លោក Jati និយាយ​ថា ចំនួន​អ្នក​របួស​ក៏​ត្រូវ​បាន​រំពឹង​​ថា​នឹង​កើន​ឡើង​ច្រើន​ទៀត​​ ខណៈ​សេចក្តី​រាយការណ៍​ពី​អ្នក​ស្រុក​​​នៅ​​មាន​បន្ត​បន្ទាប់។

«យើង​នៅ​​តែ​កំពុង​កត់​ត្រា​ចំនួន​​អ្នក​របួស»។ អ្នក​នាំ​ពាក្យ​ដដែល​បាន​និយាយ​ថា និង​បន្ថែម​ថា អាកាស​​ធាតុ​ដ៏​អាក្រក់​នេះ​ប្រហែល​ជា​អូសបន្លាយ​ចូល​ក្នុង​សប្តាហ៍​ថ្មី​នេះ​ទៀត។

នៅថ្ងៃ​អាទិត្យ​ដដែល ក៏​មាន​ទឹក​ជំនន់​ដាច់​ដោយ​ឡែក​ធំ​មួយ​ទៀត​បាន​សម្លាប់​មនុស្ស​២​នាក់​នៅ​ទី​ក្រុង Bima ក្នុង​ខេត្ត West Nusa Tenggara។ នេះ​បើ​តាម​ការ​ឲ្យ​ដឹង​ពី​ទី​ភ្នាក់ងារ​គ្រោះ​មហន្តរាយ។

លោក Jati បាន​ប្រាប់​ថា ទំនប់វារី​អគ្គីសនី​ចំនួន​៤​ត្រូវ​បាន​លិច ហើយ​ផ្ទះ​ជិត​១​ម៉ឺន​ខ្នង​ត្រូវ​បានលិច​នៅ​ Bima ​បន្ទាប់​ពី​ភ្លៀង​ដ៏​អាក្រក់​រយៈ​ពេល​៤​ម៉ោង​។

កាល​ពី​ខែ​មករា កន្លង​ទៅ ជំនន់​ទឹក​ភ្លៀង​នៅ​តំបន់ Sumedang ក្នុងខេត្ត​​​ West Java បានសម្លាប់​មនុស្ស​៤០​នាក់៕

ប្រែសម្រួល៖ វីរបុត្រ
ប្រភព៖ AFP