ព័ត៌មានអន្ដរជាតិ

នារីអាយុ១៩ឆ្នាំកំពុងជិះម៉ូតូតាមផ្លូវត្រូវសន្តិសុខមីយ៉ាន់ម៉ាបាញ់ស្លាប់

បានផុស

៤ years មុន

នៅ

ថ្ងៃអង្គារ ៦ មេសា ២០២១

ដោយ

នារីអាយុ១៩ឆ្នាំម្នាក់ត្រូវបានបាញ់សម្លាប់នៅទីក្រុងម៉ាន់ដាឡាយកាលពីយប់ថ្ងៃអាទិត្យ នៅពេលកម្លាំងសន្តិសុខមីយ៉ាន់ម៉ាបាញ់ទៅលើនាងដែលកំពុងជិះម៉ូតូជាមួយប្តីមកពីកន្លែងធ្វើការត្រឡប់ទៅផ្ទះ។

យោងតាមក្រុមជួយសង្គ្រោះបានឲ្យដឹងថា ការបាញ់សម្លាប់បានកើតឡើងប្រហែលជាម៉ោង៩យប់ បន្ទាប់ពីពេលវេលាត្រូវដល់ម៉ោងបំរាមគោចរ។ គ្រាប់កាំភ្លើងទំនងដូចជាត្រូវពោះប្តីរបស់នាងឈ្មោះ Ma Htet Htet Win ដែលកំពុងបើកម៉ូតូ មុនពេលត្រូវនាងដែលជិះពីក្រោយបណ្តាលឲ្យស្លាប់។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ប្តីបានព្យាយាមយកនាងទៅព្យាបាលដោយសាររបួសធ្ងន់ ប៉ុន្តែ Ma Htet Htet Win បានធ្លាក់ពីលើម៉ូតូតាមផ្លូវ។ ក្រុមជួយសង្គ្រោះបានរាយការណ៍ថា ប្តីបាននិយាយថា ទាហានបានប្រាប់ឲ្យពួកគេឈប់ម៉ូតូ ហើយក៏បាញ់លើពួកគេដែលកំពុងជិះចេញទៅ។

អ្នកជួយសង្គ្រោះម្នាក់ដែលបានរកឃើញសពនាង Ma Htet Htet Win បាននិយាយថា មានការលំបាកខ្លាំងដើម្បីចូលទៅដល់កន្លែងសាកសព យកដាក់ឡាន ហើយដឹកទៅផ្ទះ។ ចំណាយពេលប្រហែលជា២០នាទី ខណៈក្រុមទៅយកបានលាក់ខ្លួនពីកម្លាំងសន្តិសុខ។

អ្នកជួយសង្គ្រោះប្រាប់ថា ៖«តាមផ្លូវប្រៀបដូចជាវាលពិឃាត នៅពេលទាហានបាញ់ជនស៊ីវិល ដោយឯងៗ រាប់ទាំងគ្រូពេទ្យ និងអ្នកស្ម័គ្រចិត្ត។ យើងបានលាក់ខ្លួនក្នុងទីងងិតដើម្បីទៅយកសពនាង»។

នាង Ma Htet Htet Win បានស្លាប់នៅពេលពួកគាត់បានទៅដល់។ អ្នកសង្គ្រោះប្រាប់ថា នាងរបួសក្បាល បន្ទាប់ពីធ្លាក់ពីលើម៉ូតូ។ ប្តីរបស់នាងបានវះកាត់កន្លែងរបួស៕

ប្រែសម្រួល៖ វីរបុត្រ
ប្រភព៖ Irrawaddy