អ៊ីរ៉ង់ជំរុញឲ្យរដ្ឋបាលថ្មីរបស់អាមេរិកត្រឡប់ទៅរកកិច្ចព្រមព្រៀងនុយក្លេអ៊ែរ

ប្រធានាធិបតីអ៊ីរ៉ង់បានជំរុញឲ្យប្រធានាធិបតីជាប់ឆ្នោតសហរដ្ឋអាមេរិកលោក Joe Biden វិលត្រឡប់ទៅរកកិច្ចព្រមព្រៀងនុយក្លេអ៊ែរ ឆ្នាំ ២០១៥ ដែលរដ្ឋបាលរបស់ប្រធានាធិបតី Donald Trump បានដកអាមេរិកចេញជាឯកតោភាគីកាលពី ២ ឆ្នាំមុន ។

លោក Hassan Rouhani បានអំពាវនាវឲ្យលោក Biden ទូទាត់នូវកំហុសកាលពីមុនក្រោមការដឹកនាំរបស់លោក Trump ហើយត្រឡប់ទៅរកការអនុលោមតាមកិច្ចព្រមព្រៀងអន្តរជាតិ ។

សេដ្ឋកិច្ចរបស់អ៊ីរ៉ង់ត្រូវបានដាក់ទណ្ឌកម្មដោយរដ្ឋបាលលោក Trump ដោយក្នុងនោះរួមមានទាំងការហាមឃាត់ការនាំចូលប្រេងរបស់អ៊ីរ៉ង់ជាដើម ។

ក្រុមអ្នកសង្កេតការណ៍បាននិយាយថា ទីក្រុងតេអេរ៉ង់បានស្វែងរកការបន្ធូរបន្ថយការដាក់ទណ្ឌកម្មពីរដ្ឋបាលអាមេរិកបន្ទាប់ដើម្បីធ្វើឲ្យសេដ្ឋកិច្ចអ៊ីរ៉ង់មានភាពរស់ឡើងវិញ ។

ប៉ុន្តែគេនៅមិនទាន់ច្បាស់ទេថាតើទំនាក់ទំនងទ្វេភាគីរបស់អ៊ីរ៉ង់ និងអាមេរិកនឹងប្រសើរឡើងឬយ៉ាងណានោះទេ ។ ក្រុងតេអេរ៉ង់ទាមទារសំណងសម្រាប់ការបាត់បង់សេដ្ឋកិច្ចដែលបណ្តាលមកពីការដាក់ទណ្ឌកម្ម ហើយក្រុមអ្នកប្រឆាំងនឹងអាមេរិកកំពុងទទួលបានឥទ្ធិពលកាន់តែច្រើននៅក្នុងប្រទេសពីបញ្ហាមួយនេះ ៕

ប្រែសម្រួលដោយ ៖ ជីវ័ន្ត

ប្រភព ៖ NHK