ថៃ ត្រៀមដាក់ក្រុង បាងកក ជាតំបន់ក្រហមដោយសារកូវីដ មុនថ្ងៃបុណ្យសង្ក្រាន្តចូលឆ្នាំថ្មី

ទីក្រុងបាងកកអាចត្រូវបានប្រកាសទៅជាតំបន់ក្រហមដោយសារជំងឺកូវីដ ១៩ នៅមុនពិធីបុណ្យសង្ក្រាន្តចូលឆ្នាំថ្មីនៅសប្តាហ៍ក្រោយ បន្ទាប់ពីការផ្ទុះឆ្លងជាចង្កោមថ្មីពាក់ព័ន្ធនឹងហាងស្រា និងបារ ដោយបង្កឲ្យមានការកើនឡើងយ៉ាងខ្លាំងនូវករណីឆ្លងនៅក្នុងរដ្ឋធានីថៃមួយនេះ ។

ការប្រកាសនេះធ្វើឡើង បន្ទាប់ពីមជ្ឈមណ្ឌលគ្រប់គ្រងស្ថានភាពជំងឺកូវីដ ១៩ (CCSA) បានរាយការណ៍ថាមានករណីឆ្លងថ្មីចំនួន ៣៣៤ ករណីនៅថ្ងៃពុធនេះ ខណៈដែល ២១៦ ករណីស្ថិតក្នុងទីក្រុងបាងកក ។

បន្ថែមពីនេះការផ្ទុះឆ្លងជាចង្កោមថ្មីជាច្រើននេះត្រូវបានគេរកឃើញនៅក្នុងហាងស្រា និងបារនៅទីក្រុងបាងកកជាពិសេសនៅក្នុងសង្កាត់ Wattana ។ នៅចន្លោះថ្ងៃទី ២២ ខែមីនា និងថ្ងៃទី ៦ ខែមេសា CCSA បានរាយការណ៍ពីការឆ្លងកូវីដចំនួន ២៥៧ ករណីពីតំបន់ដែលមានកន្លែងកម្សាន្តជាច្រើននេះ និងជាទីតាំងឧស្សាហ៍ចូលដោយអ្នកជប់លៀង និងអ្នកលេងភ្លេងជាដើម ។

ក្រៅពីទីក្រុងបាងកក ករណីឆ្លងជំងឺកូវីដ ១៩ បន្ថែមទៀតក៏ត្រូវបានគេរាយការណ៍នៅតាមកន្លែងកម្សាន្តនានាផងដែរនៅតាមខេត្តជុំវិញទីក្រុងនោះដូចជា ខេត្ត Chonburi ខេត្ត Samut Prakarn ខេត្ត Suphan Buri ខេត្ត Nonthaburi ។

គួរបញ្ជាក់ថា តំបន់ក្រហមដែលបានស្នើនេះរួមមានទីក្រុងបាងកក ខេត្ត Pathum Thani ខេត្ត Nonthaburi ខេត្ត Samut Prakarn និងខេត្ត Nakhon Pathom ហើយយោងតាម CCSA បានឲ្យដឹងថា ការសម្រេចចិត្តនេះនឹងធ្វើឡើងដោយក្រសួងសុខាភិបាលសាធារណៈ និងក្រសួងមហាផ្ទៃ នាពេលខាងមុខ ៕

ប្រែសម្រួលដោយ ៖ ជីវ័ន្ត

ប្រភព ៖ CNA

ចុចអាន ៖ សង្ឃថៃមួយអង្គជាប់ក្នុងរូងភ្នំលិចទឹកត្រូវបានយក​ចេញ​ដោយសុវត្ថិភាពថ្ងៃនេះ

ចុចអាន ៖ ច្រើនណាស់! ថៃ រកឃើញអ្នកឆ្លងជំងឺកូវីដ-១៩ ថ្មីរហូតដល់ទៅ ៣៣៤ ករណី