មិនទាន់ស្បើយ កូវីដ ដើមផង ពេលនេះ ប្រេស៊ីល រកឃើញករណីឆ្លងវ៉ារ្យង់អាហ្រ្វិកខាងត្បូង មួយទៀត

ប្រទេសប្រេស៊ីលបានកត់ត្រាករណីដំបូងនៃជំងឺកូវីដ ១៩ បំប្លែងខ្លួនថ្មីដែលងាយឆ្លងខ្លាំងរបស់ប្រទេសអាហ្វ្រិកខាងត្បូង ហើយវាជាសញ្ញាគ្រោះថ្នាក់ថ្មីមួយទៀតសម្រាប់ប្រទេសនេះ ខណៈដែលកំពុងត្រូវបានបំផ្លាញដោយជំងឺកូវីដ ១៩ ប្រភេទដើមទាំងករណីឆ្លង និងស្លាប់ប្រចាំថ្ងៃដ៏អាក្រក់បំផុតនៅលើពិភពលោក ។

ស្ត្រីរស់នៅរដ្ឋ Sao Paulo បច្ចុប្បន្នត្រូវបានបញ្ជាក់ថាបានឆ្លងវ៉ារ្យង់អាហ្វ្រិកខាងត្បួងប្រភេទ B.1.351 ដោយវិទ្យាស្ថានជីវសាស្រ្ត Butantan ខណៈការវិភាគបន្ថែមទៀតបានបញ្ជាក់ថា វាក៏អាចជាករណីឆ្លងវ៉ារ្យង់ក្នុងស្រុកដែលគេស្គាល់ថា P.1 ផងដែរ ដែលក៏កំពុងសាយភាយយ៉ាងទូលំទូលាយនៅអាហ្វ្រិកខាងត្បូង និងកន្លែងផ្សេងទៀត ។

ការរកឃើញនៃវ៉ារ្យ៉ង់អាហ្វ្រិកខាងត្បូងមួយនេះបានបន្ថែមការព្រួយបារម្ភថា រលកឆ្លងជំងឺកូវីដ ១៩ ដ៏កាចសាហារដែលកំពុងផ្ទុះឡើងនៅប្រេស៊ីល អាចនៅតែរក្សាការបំបែកកំណត់ត្រាគួរឲ្យភ័យខ្លាចនៅសប្តាហ៍ក្រោយៗទៀត ខណៈកាលពីថ្ងៃអង្គារក្រសួងសុខាភិបាលបានរាយការណ៍អំពីការស្លាប់ដោយជំងឺកូវីដ ១៩ ក្នុងមួយថ្ងៃចំនួន ៤,១៩៥ នាក់ ។

ទន្ទឹមនោះអ្នកជំនាញផ្នែកវេជ្ជសាស្រ្តមួយចំនួនបានព្យាករណ៍ថា ការផ្ទុះឡើងនៅក្នុងប្រទេសដ៏ធំបំផុតនៅអាមេរិកខាងត្បូងមួយនេះអាចនឹងតាមទាន់សហរដ្ឋអាមេរិក ក្លាយជាប្រទេសដែលមានមនុស្សស្លាប់ដោយសារជំងឺកូវីដ ១៩ ច្រើនបំផុតនៅលើពិភពលោក ។

បន្ថែមពីនេះអ្នកវិទ្យាសាស្ត្រភ័យខ្លាចថា វ៉ារ្យ៉ង់អាហ្វ្រិកខាងត្បូង និងវ៉ារ្យ៉ង់ប្រេស៊ីលដែលកំពុងរីករាលដាលរួចទៅហើយនោះកាន់តែមានលក្ខណៈឆ្លងខ្លាំង និងអាចបង្កឲ្យមានគ្រោះថ្នាក់ដល់អាយុជីវិតជាង វីរុសដើមទៅទៀត ។

គួរបញ្ជាក់ថា គិតត្រឹមពេលនេះប្រទេសប្រេស៊ីលមានករណីឆ្លងជំងឺកូវីដ ១៩ សរុប ១៣,១៩៧,០៣១  ករណី និងមានអ្នកស្លាប់ចំនួន ៣៤១,០៩៧ នាក់ ៕

ប្រែសម្រួលដោយ ៖ ជីវ័ន្ត

ប្រភព ៖ CNA

ចុចអាន ៖ លើកដំបូង! មួយថ្ងៃ ប្រេស៊ីល​ មានអ្នកស្លាប់ដោយសារកូវីដ លើស ៤,០០០ នាក់

ចុចអាន ៖ កូវីដនៅ ប្រេស៊ីល ឆ្លងលើស ១៣ លានករណី ក្រោយរកឃើញថ្មីជិត ៣ ម៉ឺននាក់រយៈពេល ២៤ ម៉ោងចុងក្រោយ