ក្ដីសង្ឃឹមសម្រាប់ប្រជាជនអាមេរិក! វ៉ាក់សាំង Moderna ផ្តល់ការការពារឆ្លងកូវីដរយៈពេលកន្លះឆ្នាំ

នេះជាដំណឹងល្អសម្រាប់ជនជាតិអាមេរិករាប់លាននាក់ដែលបានទទួលការចាក់វ៉ាក់សាំងការពារជំងឺកូវីដ ១៩ ចំនួន ២ ដូសរបស់ក្រុមហ៊ុន Moderna រួចទៅហើយ ខណៈការស្រាវជ្រាវថ្មីបង្ហាញថា វ៉ាក់សាំងនេះអាចការពារពីការឆ្លងជំងឺកូវីដ ១៩ យ៉ាងហោចណាស់ ៦ ខែ និងមានប្រសិទ្ធភាព ៩៤.៥ ភាគរយ ។

បើយោងតាមក្រុមដឹកនាំដោយលោកស្រី Nicole Doria-Rose នៃវិទ្យាស្ថានជាតិអាឡ័កស៊ី និងជំងឺឆ្លងសហរដ្ឋអាមេរិក (NIAID) បានឲ្យដឹងថា “ការស្រាវជ្រាវថ្មីនេះបានតាមដានអ្នកចូលរួមចំនួន ៣៣ នាក់ដែលមានអាយុចាប់ពី ១៨ ឆ្នាំដល់ចាស់ជាង ៧១ ឆ្នាំនៅក្នុងការសាកល្បងមុននាំឲ្យមានការអនុម័តវ៉ាក់សាំងនេះ” ។

លោកស្រី Nicole Doria-Rose បាននិយាយថា “បន្ទាប់ពីចាក់វ៉ាក់សាំងដូសទី ២ សកម្មភាពអង់ទីគ័រនឹងដុះឡើងចំពោះមនុស្សគ្រប់វ័យ ហើយការពារឆ្លងជំងឺកូវីដ ១៩ បានរយៈពេល ៦ ខែ” ។

ចំណែកក្រុមដឹកនាំដោយ NIAID បាននិយាយថា អ្នកចូលរួមទាំងអស់មានសកម្មភាពដុះអង់ទីគ័រការពារកូវីដរយៈពេល ៦ ខែ ហើយវាត្រូវបានរកឃើញលើការធ្វើតេស្តឈាម ៣ ប្រភេទផ្សេងគ្នា ។

ទន្ទឹមនោះលោកវេជ្ជបណ្ឌិត Amesh Adalja ជាអ្នកជំនាញខាងផ្នែកមេរោគភាគល្អិត និងអ្នកសិក្សាជាន់ខ្ពស់នៅមជ្ឈមណ្ឌលសាកលវិទ្យាល័យ Johns Hopkins សម្រាប់សន្តិសុខសុខភាពនៅទីក្រុង Baltimore បាននិយាយថា ប្រព័ន្ធភាពស៊ាំអាចមានរយៈពេលយូរជាង ៦ ខែទៅទៀត បើយោងទៅរបាយការណ៍របស់អ្នកស្រាវជ្រាវនាពេលនេះ ។

គួរបញ្ជាក់ថា លទ្ធផលស្រាវជ្រាវនេះគឺស្រដៀងគ្នាទៅនឹងវ៉ាក់សាំងចាក់ ២ ដូសដ៏សំខាន់ផ្សេងទៀតដែលកំពុងប្រើប្រាស់នៅសហរដ្ឋអាមេរិករួមមានវ៉ាក់សាំង Pfizer-BioNTech ជាដើម ខណៈក្រុមហ៊ុនវ៉ាក់សាំងមួយនេះបានប្រកាសប្រសិទ្ធភាពជាង ៩១ ភាគរយកាលពីដើមខែនេះ និងការពារឆ្លងជំងឺកូវីដ ១៩ បានរយៈពេល ៦ ខែ បន្ទាប់ពីប្រជាជនបានទទួលការចាក់ពេញ ២ ដូស ៕

ប្រែសម្រួលដោយ ៖ ជីវ័ន្ត

ប្រភព ៖ UPI

ចុចអាន ៖ ដំណឹងល្អ! វ៉ាក់សាំង Pfizer និង Moderna កាត់បន្ថយហានិភ័យឆ្លងកូវីដដល់ទៅ ៩០ ភាគរយ ក្រោយចាក់ពេញ ២ ដូស

ចុចអាន ៖ ក្រុមហ៊ុន Moderna ចាប់ផ្តើមធ្វើតេស្តវ៉ាក់សាំងកូវីដលើទារក និងកុមារ