អាចផ្ទុះសង្គ្រាមទេ? រុស្ស៊ី បញ្ជូនកងទ័ព ១០ម៉ឺននាក់ទៅ ព្រំដែន អ៊ុយក្រែន ខណៈស្ថានការណ៍កាន់តែក្តៅ

ពិភពលោកកំពុងមានការព្រួយបារម្ភថា វិបត្តិរុស្ស៊ី-អ៊ុយក្រែន អាចបង្កទៅជាសង្គ្រាម ក្នុងរយៈពេលប៉ុន្មានថ្ងៃខាងមុខនេះ។

ប្រភពមួយបានប្រាប់កាសែត Mirror ថា មេបញ្ជាការជាន់ខ្ពស់របស់ចក្រភពអង់គ្លេសនិងក្រុមមន្ត្រី Whitehall កំពុងស្ថិតក្នុងស្ថានភាពប្រុងជើងការខ្ពស់ និងកំពុងតាមដានស្ថានការណ៍ដោយក្តីព្រួយបារម្ភបំផុត។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ទីក្រុងមូស្គូបានដាក់ពង្រាយកងទ័ពជិត ១០០,០០០នាក់នៅឯព្រំដែន ជាសមរភូមិជួរមុខហើយប្រភពយោធាជាន់ខ្ពស់របស់អ៊ុយក្រែនកំពុងបារម្ភថា អ្នកធ្វើផែនការសង្គ្រាមរបស់ខ្លួន អាចនឹងគិតគូរខុស។

កាលពីថ្ងៃព្រហស្បតិ៍ កងទ័ពជើងទឹករបស់លោក Putin បានដាក់សម្ពាធបន្ថែមទៀតលើរដ្ឋាភិបាលទីក្រុងគៀវ ដោយប្រកាសដាក់ពង្រាយកងនាវាចម្បាំង ទៅកាន់ប្រទេសអ៊ុយក្រែនក្នុងរយៈពេលប៉ុន្មានថ្ងៃខាងមុខ។

ប្រភពមួយបាននិយាយថា “ចលនាយ៉ាងគំហុករបស់កងទ័ពរុស្ស៊ីឆ្ពោះទៅព្រំដែន បានបង្កឲ្យមានការព្រួយបារម្ភយ៉ាងខ្លាំងនៅក្នុងក្រសួងការពារជាតិ។ ស្ថានការណ៍កំពុងត្រូវបានឃ្លាំមើលជាប្រចាំ។

មានការភ័យខ្លាចថា ក្នុងរយៈពេលប៉ុន្មានថ្ងៃទៀត កងទ័ពជាង៩៥,០០០នាក់ ដែលគាំទ្រដោយរថក្រោះ រថពាសដែក កាំភ្លើងធំនិងរ៉ុកកែត នឹងត្រៀមចូលលុកលុយ។

ទន្ទឹមនោះ ប្រភពមួយទៀតបានឲ្យដឹងថា កងទ័ពអ៊ុយក្រែនរាប់ម៉ឺននាក់ ត្រូវបានដាក់ពង្រាយទៅព្រំដែន ហើយទីប្រឹក្សាអាមេរិកត្រូវបានគេជឿថា កំពុងស្ថិតនៅក្នុងប្រទេសនេះ។

ការវាយតម្លៃរបស់ចារកម្មអាមេរិក បានចាត់ទុកការគំរាមកំហែងនៃការផ្ទុះឡើងនៃជម្លោះដ៏ធំរវាងរុស្ស៊ី និង អ៊ុយក្រែនថាជា “វិបត្តិជាក់ស្តែង” ដូចដែលបានលើកឡើងដោយមជ្ឈមណ្ឌលប្រតិបត្តិការអឺរ៉ុប EUCOM។

សង្គ្រាមបានផ្ទុះឡើងនៅតាមបណ្តោយព្រំដែនខាងកើតប្រទេសអ៊ុយក្រែន – រុស្ស៊ី ប្រវែង ១.៥០០ម៉ាយល៍ចាប់តាំងពីឆ្នាំ២០១៤មក បន្ទាប់ពី Euromaidan ក្នុងទីក្រុងគៀវនិង ការឈ្លានពានរបស់រុស្ស៊ីទៅលើឧបទ្វីប Crimea។

នៅក្នុងការប្រយុទ្ធគ្នាដ៏សាហាវ មនុស្សប្រហែល១៤,០០០នាក់ ត្រូវបានគេប៉ាន់ស្មានថាស្លាប់៕

ប្រែសម្រួលដោយ៖ Vann Vann

ប្រភព៖ Daily Star