ព័ត៌មានអន្ដរជាតិ

ម្សិលមិញ យោធាមីយ៉ាន់ម៉ាបាញ់ផ្លោងគ្រាប់ត្បាល់សម្លាប់ជាង២០នាក់

បានផុស

៤ years មុន

នៅ

ថ្ងៃសៅរ៍ ១០ មេសា ២០២១

ដោយ

របបយោធាមីយ៉ាន់ម៉ាត្រូវបានគេរាយការណ៍បានបាញ់គ្រាប់ត្បាល់ដែលជាប្រភេទអាវុធធ្ងន់ចម្ងាយឆ្ងាយដើម្បីបង្ក្រាបក្រុមបាតុករនៅតំបន់៣កន្លែងផ្សេងគ្នានៅទីប្រជុំជន Bago ក្នុងតំបន់ Bago កាលពីព្រឹកថ្ងៃសុក្រ។

ការបង្ក្រាបដ៏ធ្ងន់ធ្ងរនេះ កម្លាំងសន្តិសុខបានប្រើគ្រាប់ត្បាល់បន្ថែមលើការបាញ់អាវុធធុនស្រាលគ្រាប់ពិត និងបំផ្ទុះគ្រាប់បែកដើម្បីបង្ក្រាបអ្នកតវ៉ា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យោងតាមអ្នកស្រុកបានឲ្យដឹងថា មនុស្សជាង២០នាក់ត្រូវបានគេរាយការណ៍បានសម្លាប់ និងរបួសជាច្រើននាក់ក្នុងការវាយប្រហារទាំងនោះ។ ជាមួយគ្នានេះ មនុស្សជាច្រើននាក់ត្រូវបានចាប់ខ្លួន ប៉ុន្តែសារព័ត៌មានក្នុងស្រុក Irrawaddy មិនអាចសុំការបញ្ជាក់ពីចំនួនពិតប្រាកដនោះទេ។

នៅប្រហែលជាម៉ោង៤ព្រឹក ថ្ងៃសុក្រ កម្លាំងសន្តិសុខរបស់របបយោធាបានបើកការបាញ់រះដោយអាវុធស្វ័យប្រវត្តិក្នុងការវាយឆ្មក់ដែលមានគោលដៅលើការបិទផ្លូវដែលត្រូវបានអ្នកតវ៉ាដាក់បាវខ្សាច់ និងវត្ថុផ្សេងៗនៅលើផ្លូវ។

អ្នកស្រុកនិយាយថា កម្លាំងសន្តិសុខបានវាយប្រហារលើទីកន្លែង៣គឺ Shinsawpu, Hmawkan និង Nantawyar ដែលជាមានការតវ៉ាធ្វើឡើងជារៀងរាល់ថ្ងៃ។

អ្នកស្រុកបាននិយាយថា ពួកគេបានឮសំឡេងគ្រាប់ផ្ទុះខ្លាំងៗពីចម្ងាយ៥ដងដែលជាប្រភេទគ្រាប់ធុនធំកំឡុងពេលការវាយប្រហារនោះ។ រូបភាពមួយសន្លឹកបានបង្ហាញកន្ទុយគ្រាប់ត្បាល់ដែលអ្នកស្រុកបានឃើញ។

នៅពេលព្រឹក ច្រកចេញ-ចូលទៅតំបន់ទាំងនោះត្រូវបានដាក់ខ្សែរារាំងដោយកម្លាំងសន្តិសុខ បន្ទាប់ពីទាហានប្រហែលជា២៥០នាក់ត្រូវបានដាក់ពង្រាយនៅតំបន់នោះ។ អ្នកស្រុកមិនត្រូវបានអនុញ្ញាតឲ្យចេញ ឬចូលឡើយ។

ក្រុមសង្គមស៊ីវិលបាននិយាយថា គ្មានក្រុមជួយសង្គ្រោះណាមួយនៅតំបន់នោះហ៊ានចូលទៅយកសាកសព ឬក៏ជួយព្យាបាលអ្នករបួសឡើយ។ កម្លាំងរបស់របបយោធាក៏កំពុងដាក់គោលដៅលើក្រុមសង្គមស៊ីវិលដែរ។

ត្រឹមថ្ងៃព្រហស្បតិ៍ យោងតាមសមាគមជំនួយអ្នកទោសនយោបាយ(AAPP)ថា ជនស៊ីវិលប្រហែលជា៦១៤នាក់ត្រូវបានសម្លាប់ ប៉ុន្តែនៅមិនទាន់មានរបាយការណ៍ណាជាក់លាក់បូកបន្ថែមនឹងចំនួនអ្នកស្លាប់នៅថ្ងៃសុក្រទេ។

ប៉ុន្តែតាមការផ្សាយរបស់សារព័ត៌មានក្នុងស្រុក Irrawaddy នៅថ្ងៃសុក្រម្សិលមិញ មានអ្នកស្លាប់ជាង២០នាក់ទៀត ដូច្នេះតូលេខអាចកើនឡើងដល់ជាង៦៣០នាក់ ដោយសារស្នាដៃបង្ក្រាបឥតមេត្តារបស់របបយោធាមីយ៉ាន់ម៉ា៕

ប្រែសម្រួល៖ វីរបុត្រ
ប្រភព៖ Irrawaddy