ប្រេស៊ីល បន្តរកឃើញអ្នកឆ្លងកូវីដជាង ៩ ម៉ឺនករណី និងស្លាប់ ៣,៦៩៣ នាក់រយៈពេល ២៤ ម៉ោងចុងក្រោយ

ក្រសួងសុខាភិបាលប្រេស៊ីលបាននិយាយកាលពីថ្ងៃសុក្រថា ប្រទេសប្រេស៊ីលបានរាយការណ៍ពីការឆ្លងថ្មីនៃជំងឺកូវីដ ១៩ ចំនួន ៩៣,៣១៧ ករណី និងការស្លាប់ចំនួន ៣,៦៩៣ នាក់ពីក្នុងរយៈពេល ២៤ ម៉ោងចុងក្រោយនេះ ។

ទន្ទឹមនោះមន្ទីរពេទ្យនៅក្នុងរដ្ឋចំនួន ១៩ និងរដ្ឋធានី Brasilia កំពុងដួលរលំក្រោមទម្ងន់នៃការឆ្លងជំងឺកូវីដ ១៩ ដែលមានការកើនឡើងយ៉ាងខ្លាំង ខណៈជាង ៩០ ភាគរយនៃគ្រែក្នុងបន្ទប់សង្គ្រោះបន្ទាន់ (ICU) កំពុងពោរពេញទៅដោយអ្នកជំងឺ ។

បន្ថែមពីនេះចំនួនអ្នកស្លាប់ជាមធ្យមប្រចាំថ្ងៃរបស់ប្រទេសក្នុងរយៈពេល ៧ ថ្ងៃចុងក្រោយបានកើនឡើងដល់ ២,៩៣០ នាក់ដែលជាចំនួនខ្ពស់បំផុតនៅលើពិភពលោក ។

ទោះមានករណីឆ្លង និងស្លាប់ច្រើនយ៉ាងណាក៏ដោយ រដ្ឋចំនួន ២ ដែលរងផលប៉ះពាល់ខ្លាំងបំផុតពីជំងឺរាតត្បាតមួយនេះក្នុងនោះគឺរដ្ឋ Sao Paulo និង Rio Grande do Sul បានចាប់ផ្តើមបន្ធូរបន្ថយការរឹតត្បិតការការពារជំងឺកូវីដ ១៩ នេះទៅវិញ ។

គួរបញ្ជាក់ថា គិតត្រឹមពេលនេះប្រទេសប្រេស៊ីលមានករណីឆ្លងជំងឺកូវីដ ១៩ សរុប ១៣,៣៧៥,៤១៤ ករណី និងមានអ្នកស្លាប់ចំនួន ៣៤៨,៩៣៤ នាក់ ៕

ប្រែសម្រួលដោយ ៖ ជីវ័ន្ត

ប្រភព ៖ XINHUA

ចុចអាន ៖ មិនទាន់ស្បើយ កូវីដ ដើមផង ពេលនេះ ប្រេស៊ីល រកឃើញករណីឆ្លងវ៉ារ្យង់អាហ្រ្វិកខាងត្បូង មួយទៀត

ចុចអាន ៖ លើកដំបូង! មួយថ្ងៃ ប្រេស៊ីល​ មានអ្នកស្លាប់ដោយសារកូវីដ លើស ៤,០០០ នាក់