ស្រាយចម្ងល់ ករណីចាក់វ៉ាក់សាំងការពារកូវីដ-១៩ប្រភេទខុសគ្នា

តើនឹងមានអ្វីកើតឡើង ប្រសិនបើអ្នកទទួលវ៉ាក់សាំងការពារជំងឺកូវីដ-១៩ បានចាក់វ៉ាក់សាំងប្រភេទខុសគ្នា?

ជាដំបូងយើងត្រូវស្វែងយល់អំពីធាតុផ្សំនៃវ៉ាក់សាំងនីមួយៗឱ្យច្បាស់សិន។

ចំពោះវ៉ាក់សាំង Pfizer-BioNTech និង Moderna ជាប្រភេទវ៉ាក់សាំងដែលប្រើប្រាស់តាមបច្ចេកវិទ្យា RNA (mRNA) ដើម្បីផលិតឡើង។ វិធីសាស្ត្រ​ផលិតនេះ គេប្រើ RNA ឬ DNA ដែលត្រូវ​បាន​កែប្រែហ្សែន ដើម្បីផលិតប្រូតេអ៊ីន ដោយអាចជួយភ្ញោច​ឱ្យប្រព័ន្ធភាពស៊ាំធ្វើការ​ឆ្លើយតប​ចំពោះវីរុស​ប្រកបដោយ​ប្រសិទ្ធភាព។ ចំណែកធាតុផ្សំនៃវ៉ាក់សាំងពីរមានសារធាតុសំខាន់ៗចំនួន៧ ដែលក្នុងនោះមានសារធាតុចំនួន ៤ គឺដូចគ្នា។ នេះមានន័យថា វ៉ាក់សាំង Pfizer-BioNTech និង Moderna មានភាពស្រដៀងគ្នាខ្លាំង ហើយពួកវាធ្វើការគឺស្ទើរតែដូចគ្នាផងដែរ។

ដោយឡែក វ៉ាក់សាំង Sinovac និងវ៉ាក់សាំង ​Sinopharm មិនប្រើបច្ចេកវិទ្យាដូចវ៉ាក់សាំងខាងលើទេ។ វាជាវ៉ាក់សាំងដែលប្រើប្រាស់ភាគល្អិតនៃវីរុសអសកម្មដើម្បីសម្លាប់វីរុស។ វាជាប្រភេទវ៉ាក់សាំងដែលប្រើប្រាស់វីរុសលែងអាច​ធ្វើ​សកម្មភាព​ទៀត​បាន ឬវីរុសដែល​ត្រូវ​បានគេ​បន្សាបលែងអាចធ្វើសកម្មភាពទៀត ឬ​ធ្វើ​ឱ្យចុះខ្សោយ​ ដើម្បីកុំឱ្យវា​អាច​បង្កជាជំងឺ ប៉ុន្តែនៅតែអាច​ភ្ញោចប្រព័ន្ធភាពស៊ាំឱ្យឆ្លើយតបទៅនឹង​ជំងឺបាន។

ត្បិតតែវ៉ាក់សាំង Pfizer និង Moderna មានលក្ខណៈស្រដៀងគ្នាច្រើន ហើយវ៉ាក់សាំង Sinovac និងវ៉ាក់សាំង ​Sinopharm ប្រើបច្ចេកវិទ្យាដូចគ្នាក៏ដោយ ក៏ការចាក់វ៉ាក់សាំងលាយគ្នាមិនត្រូវបានណែនាំនោះទេ។

CDC អាមេរិក និយាយថា ការចាក់វ៉ាក់សាំងចម្រុះដោយប្រភេទផ្សេងៗគ្នា មិនទាន់មានការសិក្សា និងវាយតម្លៃលើសុវត្ថិភាពនិងប្រសិទ្ធភាពនោះទេ។ ប៉ុន្តែប្រសិនបើក្នុងស្ថានភាពពិសេសដែលវ៉ាក់សាំងចាក់លើកដំបូងលែងមានគុណភាពឬហេតុផលចាំបាច់ណាមួយមិនអាច​ចាក់ជូនបាន ដូច្នេះវ៉ាក់សាំងប្រើបច្ចេកវិទ្យាដូចគ្នាអាចប្រើជំនួសគ្នាបាន តែត្រូវទុកគម្លាតយ៉ាងហោច ២៨ ថ្ងៃ សឹមចាក់ដូសទី២។

ទន្ទឹមគ្នានេះ អ្នកជំនាញខាងជំងឺឆ្លងលោក Amesh A. Adalja, M.D មន្ត្រីសុខាភិបាលមកពីមជ្ឈមណ្ឌលសន្តិសុខសុខភាព Johns Hopkins បាននិយាយថា ករណីចាក់វ៉ាក់សាំងលាយគ្នា គេមិនទាន់ច្បាស់ពីហានិភ័យឬសុវត្ថិភាពនៅឡើយ ប៉ុន្តែទំនងគ្មានផលប៉ះពាល់ធំដុំទេ។ បន្ថែមពីលើនេះ យើងនឹងនៅតែទទួលបានអត្ថប្រយោជន៍ពីការចាក់វ៉ាក់សាំងគ្រ​ប់ចំនួនដដែល។

រីឯលោក William Schaffner, M.D, អ្នកឯកទេសខាងជំងឺឆ្លងនិងជាសាស្រ្តាចារ្យនៅសាលាវេជ្ជសាស្ត្រមកពីសាកលវិទ្យាល័យ Vanderbilt បានយល់ស្របថា ការចាក់វ៉ាក់សាំងមិនដូចគ្នា ប្រហែលជាមានសុវត្ថិភាពនិងប្រសិទ្ធភាព។ ទោះយ៉ាងណាលោកក៏បានសង្កត់ធ្ងន់ថា “ការលាយនិងការផ្គូផ្គងវ៉ាក់សាំងខុសគ្នាក្នុងរាងកាយតែមួយ ត្រូវការការសិក្សាឱ្យបានច្បាស់លាស់សិន”៕

ប្រែសម្រួល៖ សន្យា

ចុចអាន៖ វ៉ាក់សាំងកូវីដ-១៩ ចំនួន ៤ប្រភេទបាននិងកំពុងអភិវឌ្ឍ​នាពេលបច្ចុប្បន្ន

ចុចអាន៖ ឆ្លើយសំណួរ៣ពាក់ព័ន្ធវ៉ាក់សាំងការពារកូវីដ-១៩សម្រាប់ក្មេងៗ