កុំគិតថាមិនអី! គ្រុនពោះវៀនអាចបណ្ដាលឲ្យបាត់បង់ជីវិត បើពុំមានការព្យាបាលត្រឹមត្រូវ

គ្រុនពោះវៀន គឺជាជំងឺដែលគ្រោះថ្នាក់ដល់ជីវិត បើពុំមានការព្យាបាលឲ្យបានត្រឹមត្រូវ។  វា​ជា​ជំងឺ​ដែល​បណ្ដាល​មក​ពី​ការ​ឆ្លង​មេរោគ ពិសេស​ពួក Salmonella Typhi និង Salmonella paratyphi ទៅ​លើ​ប្រព័ន្ធ ប្រដាប់​រំលាយ​អាហារ​របស់​មនុស្ស។

ការចម្លងមេរោគទាំងនេះបង្កឡើង​តាមរយៈការបរិភោគទឹក ឬចំណីអាហារ ដែល​មិន​ស្អាត  ឬ​តាម​រយៈ​ការ​បរិភោគ​អាហារ​ដោយ​ដៃ​កខ្វក់ (មិន​បាន​សម្អាតក្រោយពីការបន្ទោរបង់រួច)។

ជំងឺនេះច្រើនកើតឡើងនៅលើប្រជាជន ដែលរស់នៅក្នុងតំបន់ដែលគ្មានអនាម័យ ហើយពិសេសកើតចំពោះកុមារ។

១) រោគសញ្ញា÷
ការបង្កជំងឺកើតឡើងជាធម្មតាពី ១ ទៅ ២សប្តាហ៍ បន្ទាប់ពីការឆ្លងមេរោគ មានដូចជា៖
  – ឡើងកំដៅលើសពី ៣៧,៥ºC (រហូតដល់ ៤០ºC) តែចង្វាក់ជីពចរមិនកើនឡើងទេ
  – អាចមានក្អក ឬឈឺក  មិនចង់បរិភោគអាហា ឈឺក្បាលខ្លាំង
  – ឈឺពោះ រាគ ឬអាចទល់លាមក
– រោគសញ្ញាមួយចំនួនទៀតដែលកម្រនិងឃើញ ហើយមិនច្បាស់លាស់មានៈ
• រាគមានឈាម
• រវើរវាយ
• មានកន្ទួលក្រហមលើដងខ្លួន។

២) ផលវិបាក៖
ក្នុងករណីដែលមានជំងឺគ្រុនពោះវៀនកើតឡើង ហើយពុំបានព្យាបាលអោយបានត្រឹមត្រូវទេនោះ អ្នកជំងឺនឹងជួបផលវិបាកច្រើនដូចជា ៖
– ការហូរឈាមក្នុងពោះវៀន
– ការធ្លាយពោះវៀន អាចឈានដល់រលាកស្រោមពោះ ដែលជាគ្រោះថ្នាក់ធ្ងន់ធ្ងរ
– ករណីខ្លះមេរោគចូលពេញក្នុងឈាម ហើយបង្កអោយមានប៉ះពាល់ដល់សរីរាង្គផ្សេងៗ (ខួរក្បាល, ឆ្អឹង, បេះដូង, តម្រងនោម។ល។)

៣) ការធ្វើរោគវិនិច្ឆ័យអមវេជ្ជសាស្រ្តមាន៖
  – គ្រាប់ឈាមសធ្លាក់ទាប(តែអាចឃើញកើនឡើងចំពោះកុមារ ឬពេលធ្លាយពោះវៀន)
  – ការបណ្តុះរកមេរោគក្នុងឈាម វិជ្ជមាន៩០% ក្នុងអាទិត្យទីមួយ(មុនប្រើថ្នាំផ្សះ)
  – ការបណ្តុះរកមេរោគក្នុងលាមកនិងទឹកនោម វិជ្ជមាន ៤០-៨០% ក្នុងអាទិត្យទីពីរ
  – ការធ្វើតេស្តឈាមមើល Serologie Widal
  – ការធ្វើអេកូ ឬ វិទ្យុសាស្រ្តពោះមិនអាចធ្វើរោគវិនិច្ឆ័យបានទេ។

៤) ការបង្ការជំងឺ៖
  – យើងត្រូវធ្វើអនាម័យខ្លួនប្រាណអោយបានស្អាត និងសម្អាតដៃបន្ទាប់ពីបន្ទោរបង់រួច
  – បរិភោគទឹកស្អាត
  – បរិភោគអាហារដែលមានអនាម័យល្អ និងចម្អិនអោយបានឆ្អិនល្អ
  – ការចាក់វាក់សាំងការពារជំងឺគ្រុនពោះវៀនមនុស្សចាស់និងកុមារអាយុចាប់ពី២ឆ្នាំឡើងទៅ និងបន្តចាក់រំលឹករាល់ ៣ឆ្នាំម្តង។

បើសិនជាមានរោគសញ្ញាទាំងនេះកើតឡើង លោកអ្នកត្រូវប្រញាប់ទៅពិគ្រោះ និងពិនិត្យជាមួយគ្រូពេទ្យជំនាញ ដើម្បីធ្វើការព្យាបាលឲ្យបានត្រឹមត្រូវ៕

អត្ថបទ៖ រស្មី