រោគសញ្ញាចំនួន៤ធំៗ រកឃើញភាគច្រើនលើអ្នកចាក់វ៉ាក់សាំងគ្រប់២ដូស ហើយឆ្លងកូវីដ

ក្រុមអ្នកស្រាវជ្រាវអង់គ្លេសបានរកឃើញរោគសញ្ញាចំនួន ៤ ដែលលេចឡើងញឹកញាប់ចំពោះអ្នកឆ្លងកូវីដ-១៩ ទោះបីបានចាក់វ៉ាក់សាំងរួចហើយក៏ដោយ។

ដូចដែលលោកអ្នកធ្លាប់ដឹង ការចាក់ថ្នាំបង្ការជាគន្លឹះដើម្បីការពារការស្លាប់ឬរោគសញ្ញាធ្ងន់ធ្ងរ និងអាចកាត់បន្ថយចំនួនអ្នកជំងឺចូលសម្រាកនៅមន្ទីរពេទ្យ ​ក្រោយពេលពួកគេឆ្លងកូវីដ-១៩ ។

យ៉ាងណាមិញ ទោះបីជាអ្នកបានចាក់វ៉ាក់សាំងបង្ការកូវីដ-១៩រួចរាល់ ដោយវ៉ាក់សាំងអាចផ្តល់ប្រសិទ្ធភាពការពារខ្ពស់ក៏ដោយ ក៏ហានិភ័យនៃការឆ្លងវីរុសនៅតែអាចកើតមានគ្រប់ពល។

ការសិក្សាស្រាវជ្រាវពីកម្មវិធីសិក្សារោគសញ្ញាកូវីដ-១៩របស់ចក្រភពអង់គ្លេស (ZOE) បានរកឃើញអ្នកជំងឺថ្មីៗមួយចំនួនបានឆ្លងកូវីដ-១៩ ទោះបីជាពួកគេចាក់វ៉ាក់សាំងពេញលេញ ត្បិតអីវ៉ាក់សាំងមិនអាចផ្ដល់ការការពារ១០០%នោះទេ។ ក្នុងនោះរោគសញ្ញាកូវីដ-១៩ ចំពោះអ្នកចាក់វ៉ាក់សាំងគ្រប់ពីរដូស ខុសប្លែកពីអ្នកមិនធ្លាប់ចាក់វ៉ាក់សាំងសោះ។

តាំងពីការរាតត្បាតចាប់ផ្ដើមដំបូង រោគសញ្ញាសំខាន់ៗនៃជំងឺកូវីដ-១៩រួមមាន ឡើងកម្ដៅ ក្អក និងបាត់បង់ក្លិនឬរសជាតិ។

ប៉ុន្តែថ្មីៗនេះ ក្រុមអ្នកស្រាវជ្រាវទើបបតែបន្ថែមរោគសញ្ញាផ្សេងចំនួន ៤ ទៀតចំពោះអ្នកចាក់វ៉ាក់សាំងគ្រប់ពីរដូស ហើយឆ្លងវីរុសកូវីដ-១៩ ដែលអ្នកជំងឺនឹងមានអាការដូចជា  ឈឺក្បាល ហៀរ​សំបោរ កណ្តាស់ និង ឈឺ​ក។

អ្នកស្រាវជ្រាវសរសេរនៅក្នុងទិន្នន័យសិក្សាបានបញ្ជាក់ថា រោគសញ្ញាទាំង ៤ នេះ ត្រូវបានរកឃើញច្រើនជាងគេចំពោះមនុស្សដែលបានចាក់វ៉ាក់សាំងពេញលេញ។

ទោះជាយ៉ាងណា រោគសញ្ញាទាំង៤មានរយៈពេលខ្លី ដែលកើតឡើងតិចតួចប៉ុណ្ណោះ ហើយអ្នកជំងឺក៏ប្រឈមហានិភ័យទាបក្នុងការវិវត្តរោគសញ្ញាធ្ងន់ធ្ងរ ព្រមទាំងមានឱកាសឆាប់ជាសះស្បើយឡើងវិញទៀតផង៕

ប្រែសម្រួល៖ សន្យា

ប្រភព៖ ​Mirror

ចុចអាន៖ រោគសញ្ញាថ្មីមួយនៃវីរុសកូវីដ-១៩ កាន់តែដូចផ្ដាសាយធំ ពិបាកបែងចែក

ចុចអាន៖ ត្រូវតាមដាន! រោគសញ្ញាមួយ ធ្វើទុក្ខខ្លាំងបំផុតចំពោះ អ្នកឆ្លងវីរុសបំប្លែងខ្លួន Delta