ការពារខ្លួន! Delta ឆ្លងខ្លាំងជាង Alpha ពី ៤០ ទៅ ៦០ភាគរយ ឯណោះ

ការសិក្សាស្រាវជ្រាវរបស់សហរដ្ឋអាមេរិកបានបង្ហាញថា វីរុសបំប្លែងខ្លួន Delta អាចឆ្លងខ្លាំងជាងវីរុស Alpha ដែលគេរកឃើញដំបូងនៅក្នុងប្រទេសអង់គ្លេស ពី ៤០ ទៅ ៦០ ភាគរយឯណោះ ខណៈវីរុស Alpha  អាចឆ្លងខ្លាំងជាងកូវីដទម្រង់ដើម ដែលគេរកឃើញដំបូងនៅទីក្រុង អ៊ូហាន​ ប្រទេសចិន ប្រមាណ៥០ភាគរយ។

វីរុសបំប្លែងខ្លួន ដែលតា (Delta) កំពុងរាតត្បាតចូលក្នុងសហគមន៍របស់ប្រទេសកម្ពុជាហើយ​ ខណៈរដ្ឋមន្ត្រីក្រសួងសុខាភិបាល បានក្រើន​រំលឹក​ដល់​ពលរដ្ឋ ឲ្យបន្តប្រុងប្រយ័ត្នខ្ពស់ ការពារខ្លួន កុំភ្លេចខ្លួនឲ្យសោះ កាត់បន្ថយការធ្វើដំណើរចល័ត ឬនៅផ្ទះ ប្រសិន​មិនមានភារកិច្ចចាំបាច់។

ទោះបីជាយ៉ាងណាក៏ដោយ ក្រុមអ្នកវិទ្យាសាស្រ្តនៅតែជឿជាក់ថា អ្នកដែលចាក់វ៉ាក់សាំងគ្រប់ដូសហើយ នៅតែមានហនិភ័យទាបនៃធ្លាក់ខ្លួនឈឺធ្ងន់ ឬស្លាប់ដោយសារវីរុសនេះ។

ទន្ទឹមនេះដែរ រដ្ឋមន្រ្តីក្រសួងសុខាភិបាលឥណ្ឌូណេស៊ីលោក Budi Gunadi Sadikin បាននិយាយនៅក្នុងសន្និសីទសារព័ត៌មានថា “ការស្លាប់ភាគច្រើនដោយសារជំងឺកូវីដ-១៩នៅក្នុងប្រទេសរបស់លោក គឺកើតឡើងក្នុងចំណោមអ្នកដែលមិនបានចាក់វ៉ាក់សាំង”។

នៅក្នុងការសិក្សា ដែលធ្វើឡើងនៅមន្ទីរពេទ្យរដ្ឋមួយក្នុងទីក្រុងហ្សាការតា, មនុស្ស ៨៨ នាក់ក្នុងចំណោម ៨៩ នាក់ដែលបានស្លាប់ដោយសារជំងឺកូវីដ -១៩ គឺជាអ្នកមិនចាក់វ៉ាក់សាំង ខណៈម្នាក់ទៀត គឺជាអ្នកចាក់ទើបបានមួយដូស។ ការសិក្សានេះ ធ្វើឡើងលើអ្នកជំងឺចំនួន ៩២៨ នាក់ដែលបានចូលព្យបាលក្នុងមន្ទីរពេទ្យចាប់ពីខែមីនាដល់ខែមិថុនា។

រីឯទិន្នន័យចុងក្រោយពីសេវាសុខភាពសាធារណៈអង់គ្លេសបានបង្ហាញថា ក្រុមមនុស្ស៤ប្រភេទ គឺមនុស្សវ័យក្មេង មនុស្សវ័យចំណាស់ អ្នកមិនទាន់ចាក់វ៉ាក់សាំងសោះ និងអ្នកមិនទាន់ចាក់វ៉ាក់សាំងបានគ្រប់២ដូស គឺងាយនឹងឆ្លងវីរុសបំប្លែងខ្លួននេះបំផុត៕

ប្រែសម្រួល៖ Vann Vann

ប្រភព៖ Scientific American

ចុចអាន៖ ក្តៅៗ កូរ៉េខាងត្បូង រកឃើញវីរុសបំប្លែងខ្លួនប្រភេទថ្មី ក្លាយពូជពី Delta