សុខភាព

ឃើញអាហារចង់តែហូបច្រើន មិនរើសពេល តើគួរដោះស្រាយបែបណា?

បានផុស

៣ years មុន

នៅ

ថ្ងៃព្រហស្បតិ៍ ២ កញ្ញា ២០២១

ដោយ

ការហូបចំណីអាហារក្នុងបរិមាណច្រើន មិនដឹងពេលវេលា និងមិនអាចឃាត់អារម្មណ៍ខ្លួនឯងបានពេលឃើញនំចំណីឆ្ងាញ់ៗម្ដងៗ នៅក្នុងភាសាបច្ចេកទេសត្រូវគេហៅថា “Binge Eating Disorder”។ ដើម្បីបញ្ឈប់ពីទម្លាប់មិនល្អមួយនេះ លោក Davide Afonsi អ្នកជំនាញជនជាតិអង់គ្លេសឯកទេសបង្វឹកហាត់ស្មារតី និងចិត្តសាស្រ្ត បានចែករំលែកនូវគន្លឹះខ្លះដូចខាងក្រោម។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

មុននឹងឈានដល់វិធីបញ្ឈប់ទម្លាប់ញ៉ាំមិនល្អខាងលើ អ្នកជំនាញជនជាតិអង់គ្លេសរូបនេះក៏លើកឡើងថា ទម្លាប់ញ៉ាំបែប “Binge Eating Disorder” អាចកើតមានលើ អ្នកកើតមានអារម្មណ៍ស្រ្តេស ធុញថប់ ម៉ួម៉ៅ សម្ពាធពីសង្គមជុំវិញខ្លួន ហើយងាកមកប្រើអាហារជាការរំសាយអារម្មណ៍ទាំងនោះ។ បន្ថែមពីនោះ ទម្លាប់របស់ឪពុកម្តាយ ដែលឲ្យអាហារច្រើនដល់កូន ជាការលើកទឹកចិត្ត ដោយពុំបានកម្រិតនោះ នឹងអាចបង្កើតទម្លាប់នេះបានផងដែរ។

យ៉ាងណាមិញ បញ្ហាខាងលើអាចដោះស្រាយបាន ដោយប្រើវិធីចិត្តសាស្រ្ត។ អ្នកជំនាញជនជាតិអង់គ្លេសខាងលើបានបង្ហាញថា ដំបូងយើងត្រូវហ្វឹកហាត់យល់ដឹងពីអារម្មណ៍ខ្លួនឯងជាមុនសិន ថានៅពេលយើងចង់ញ៉ាំអាហារណាមួយខ្លាំង យើងត្រូវដឹងថា ការញ៉ាំអាហារទាំងនោះ នឹងមានលទ្ធផលទៅជាយ៉ាងណា ប្រសិនបើយើងញ៉ាំច្រើន។ ការញ៉ាំអាហារក្នុងចំនួនច្រើនរាល់ថ្ងៃអាចធ្វើឲ្យយើងទៅជាធាត់ខ្លាំង ហើយការធាត់ខ្លាំងនេះពេលខ្លះទៀតធ្វើឲ្យយើងមានអារម្មណ៍មិនល្អ ឬមិនសប្បាយចិត្តនឹងរូបរាងខ្លួនទៀតផង។

លោក Davide បានបន្ថែមទៀតថា នៅពេលយើងដឹងរឿងទាំងនេះហើយ យើងព្យាយាមហ្វឹកហាត់ទម្លាប់ថ្មីមួយ ពោលគឺនៅពេល យើងដឹងថាខ្លួនចង់ញ៉ាំចំណីអាហារច្រើន យើងអាចបង្វែរអារម្មណ៍ទៅធ្វើរឿងផ្សេង ដូចជាទៅដើរលេង ទៅរកមិត្តភក្តិនិយាយគ្នាលេង ឬទៅធ្វើសកម្មភាពផ្សេងៗដើម្បីបន្លប់។ វិធីមួយទៀត ដែលលោកណែនាំដែរនោះ គឺការប្រើកៅស៊ូពាក់នៅកដៃ ហើយរាល់ពេលយើងចង់ញ៉ាំអាហារច្រើនយើងអាចទាញកៅស៊ូផ្ទាត់ស្បែកកដៃ ធ្វើដូចនេះ ខួរក្បាលយើងនឹងចាំហើយប្តូរគំនិតថា រាល់ពេលដែលចង់ញ៉ាំច្រើន នឹងក្លាយជាកំហុស ពុំគួរធ្វើ។

យ៉ាងណាមិញ អ្នកជំនាញអង់គ្លេស ខាងលើ បានបញ្ជាក់បន្ថែមផងដែរថា ដើម្បីបំបែកទម្លាប់មិនល្អនេះ និងទៅហ្វឹកហាត់ទម្លាប់ល្អប្រសើរវិញបាននោះ នឹងត្រូវការពេលវេលាខ្លះផងដែរ។ លោកបាននិយាយថា ពុំមានវេទមន្តអ្វីឡើយ ក្រៅតែពីការព្យាយាមយកឈ្នះអារម្មណ៍ទោរទន់នោះ និងអនុវត្តដោយមិនបោះបង់ទម្លាប់ល្អ ដើម្បីទទួលបានសុខភាពជីវិតប្រសើរឡើងវិញ ពីការមិនញ៉ាំច្រើន៕

អត្ថបទផ្ដល់ដោយ៖Hello Krupet

ចុចអាន៖ឆ្ងល់អត់ ហេតុអ្វីអ្នកខ្លះញ៉ាំនោះញ៉ាំ តែមិនធាត់ មិនឡើងគីឡូសោះ?

ចុចអាន៖អាហារគួរហូប ដើម្បីថែទាំឆ្អឹងនិងជង្គង់ឲ្យកាន់តែរឹងមាំ មិនថាក្មេងឬចាស់ ត្រូវបំប៉នទាំងអស់គ្នា