សុខភាព

រដូវភ្លៀងតែងឈឺគ្រុនផ្ដាសាយ ការពារខ្លួនតាមតិចនិកនេះ

បានផុស

៤ years មុន

នៅ

ថ្ងៃសៅរ៍ ៤ កញ្ញា ២០២១

ដោយ

រាងកាយរបស់យើងប្រឹងប្រែងប្រយុទ្ធប្រឆាំងនឹងវីរុស ក៏ដូចជាបាក់តេរី ជាពិសេសនៅក្នុងអំឡុងរដូវភ្លៀងនេះតែម្ដង ពីព្រោះនៅក្នុងរដូវនេះ វីរុស និងបាក់តេរីនៅក្នុងបរិយាកាសកើនឡើង ដែលធ្វើឲ្យរាងកាយងាយនឹងឈឺ។ ដោយសារតែសីតុណ្ហភាពប្រែប្រួលភ្លាមៗ ឱកាសកើតជំងឺគ្រុនផ្ដាសាយគឺខ្ពស់បំផុត។ ដើម្បីពង្រឹងប្រព័ន្ធភាពស៊ាំ និងបង្ការហានិភ័យនៃការកើតជំងឺគ្រុនផ្ដាសាយ គ្នាយើងគប្បីអនុវត្តតិចនិកខាងក្រោមនេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

១. ញ៉ាំអាហារមានសារធាតុចិញ្ចឹម

គន្លឹះដ៏ល្អបំផុតដើម្បីបញ្ចៀសជំងឺគ្រុនផ្ដាសាយ គឺញ៉ាំអាហារដែលសម្បូរទៅដោយសារធាតុចិញ្ចឹម ដើម្បីពង្រឹងប្រព័ន្ធភាពស៊ាំ និងការពាររាងកាយកុំឲ្យធ្លាក់ខ្លួនឈឺ។ អាហារដែលជាប្រភពនៃសារធាតុចិញ្ចឹមមានដូចជាបន្លែ ផ្លែឈើ សាច់គ្មានខ្លាញ់ ត្រី គ្រាប់ធញ្ញជាតិទាំងមូល អាហារដែលធ្វើពីទឹកដោះគោ និងគ្រាប់ផ្លែឈើជាដើម។

២. វីតាមីនC

ការបញ្ចូលវីតាមីនCទៅក្នុងរបបអាហារប្រចាំថ្ងៃ ជារឿងដែលមិនអាចខ្វះបានឡើយ ដើម្បីការពាររាងកាយពីជំងឺគ្រុនផ្ដាសាយ។ ការញ៉ាំវីតាមីនCក្នុងបរិមាណសមល្មមអាចប្រយុទ្ធប្រឆាំងនឹងជំងឺគ្រុនផ្ដាសាយយ៉ាងមានប្រសិទ្ធភាព។ ប្រភពដ៏ល្អនៃវីតាមីនCមានដូចជាពពួកផ្លែក្រូច ផ្លែប៊ឺរី ខាត់ណាខៀវ និងដំឡូងជាដើម។

៣. គេងឲ្យបានគ្រប់គ្រាន់

ជាមួយគ្នានេះដែរ ការគេងគ្រប់គ្រាន់អាចប្រឆាំងនឹងការឆ្លងមេរោគគ្រប់ប្រភេទដែលបង្កឡើងនៅរដូវភ្លៀង។ ដូច្នេះហើយគ្នាយើងគប្បីគេងឲ្យបានគ្រប់គ្រាន់ យ៉ាងហោចណាស់ឲ្យបាន៧ទៅ៨ម៉ោងក្នុងមួយថ្ងៃ ដើម្បីឲ្យប្រព័ន្ធភាពស៊ាំរឹងមាំល្អ និងឲ្យរាងកាយអាចជួសជុល ក៏ដូចជាជំនួសកោសិកាចាស់ ជាលិកា និងសាច់ដុំ។

៤. រក្សាកម្ដៅក្នុងរាងកាយ

ប្រសិនបើយើងទទឹកភ្លៀងរយៈពេលយូរ សីតុណ្ហភាពរាងកាយនឹងធ្លាក់ចុះ ដែលធ្វើឲ្យយើងងាយកើតជំងឺគ្រុនផ្ដាសាយ។ ហេតុនេះហើយ យើងគប្បីជូតសម្អាតខ្លួន និងផ្លាស់ប្ដូរសំលៀកបំពាក់ភ្លាមៗ។

៥. ថែទាំអនាម័យផ្ទាល់ខ្លួន

ក្រៅពីរក្សាសម្ភារៈឲ្យស្អាតល្អ យើងក៏ចាំបាច់ត្រូវថែទាំអនាម័យផ្ទាល់ខ្លួន ដោយការលាងសម្អាតដៃ នៅពេលត្រលប់មកផ្ទះវិញ និងងូតទឹកសម្អាតខ្លួន ប្រសិនបើយើងប៉ះពាល់នឹងអ្នកដែលមានជំងឺ។ បន្ថែមពីនេះ គ្នាយើងក៏ត្រូវលាងសម្អាត និងជូតខ្លួនឲ្យស្ងួតល្អ ក្នុងករណីដែលយើងប៉ះពាល់ទឹកកខ្វក់នៅតាមផ្លូវ។

អត្ថបទផ្ដល់ដោយ៖ Hello Krupet

ចុចអាន៖ជំងឺ៥ មុខនេះ ងាយកើតលើកូនៗជាងគេក្នុងខែភ្លៀង