សុខភាព

សញ្ញាសុខភាពតូចៗ ១៥ យ៉ាង បញ្ជាក់ថា ប្រុសៗអាចអាយុខ្លី បើអត់តាមដាន

បានផុស

៣ years មុន

នៅ

ថ្ងៃអង្គារ ១៩ តុលា ២០២១

ដោយ

មហារីក ជាជំងឺគ្រោះថ្នាក់បំផុត បើអាចវិវត្តដល់ដំណាក់កាលរបស់វា។ វិធីជោគជ័យបំផុតព្យាបាលមហារីក គឺត្រូវព្យាបាលពីដំណាក់កាលដំបូង។ ភាគរយខ្ពស់បំផុត គឺអាចព្យាបាលជាដាច់ បើតាមដានដិតដល់ និងយកចិត្តទុកដាក់ព្យាបាលដោយពេទ្យឯកទេស។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

“Hello គ្រូពេទ្យ” ចង់ដាស់តឿនប្រុសៗ ពីការថែទាំខ្លួន និងចាប់ផ្ដើមស្រលាញ់សុខភាព កុំចេះតែគិតថាមិនអី មិនធ្ងន់។ យើងមានបញ្ហាតូចៗ ១៥ ចំណុចដែលអាចជាសញ្ញាណរបស់ “មហារីក”។ សូមអង្កេត និងតាមដានសុខភាពខ្លួនយើងថាតើមានអី មិនប្រក្រតីអត់។ បើជារោគមហារីកមែន ក្នុងដំណាក់កាលបឋមនេះ គឺអាចមើលជា។

១- បញ្ហាពេលនោម

អ្នកណាខ្លះ នោមញឹក ជាពិសេសពេលយប់? នោមស្រក់តក់ៗ សើមមិនដឹងខ្លួន ឬពិបាកទប់នោម? ឬអង្កេតឃើញខ្លួនឯង នោមខ្សោយ ពេលចាប់ផ្ដើមនោម?

បញ្ហាទាំងនេះអាចមកពីការរីក ឬមហារីកក្រពេញប្រូស្តាត។ ដូច្នេះ កុំព្រងើយ វាគ្រោះថ្នាក់ជាងការគិតទៅទៀត។ គួរពិនិត្យពិគ្រោះជាមួយគ្រូពេទ្យ។ ការធ្វើតេស្តឈាមខ្លះ ពេទ្យអាចស្នើសុំ ឬឲ្យយោបល់ថាគួរពិនិត្យ។

២- ពងស្វាសប្រែប្រួល

បើមានអារម្មណ៍ ឬដឹងខ្លួនច្បាស់ថា “ពងស្វាស” ឡើងពក ហើមប៉ោង ឬបញ្ហាមិនប្រក្រតីផ្សេងទៀត សូមប្រញាប់ទាក់ទងគ្រូពេទ្យជាបន្ទាន់ ព្រោះវាជាអាចជាមហារីកពងស្វាស។ ជំងឺនេះ វិវត្តរាលដាលលឿនណាស់។

៣- ឈាមក្នុងទឹកនោម ឬលាមក

អាចជាភាពមិនប្រក្រតីចំពោះបុរសដែលមានឈាមនៅត្រង់នេះ។ នេះអាចជាមហារីកប្លោកនោម តម្រងនោម ពោះវៀនធំ ឫសដូងបាត ឬរលាកផ្លូវតម្រងនោម។ ជាការល្អបំផុតដែលត្រូវទៅជួបគ្រូពេទ្យ ដើម្បីពិគ្រោះ និងព្យាបាលទាន់ពេល។

៤- ស្បែកប្រែប្រួល

មហារីកស្បែកមានសញ្ញាជាការប្រែប្រួលទំហំ រូបរាង ពណ៌នៃដុំ ឬចំណុចលើស្បែក។ បើមានសញ្ញាទាំងនេះ មិនគួរពន្យារពេលរត់រកពេទ្យ ឬមកសម្ងំព្យាបាលខ្លួនឯងផ្ដេសផ្ដាសទេ។

៥- ឡើងកូនកណ្តុរ

ប៉ោងកូនកណ្ដុរ មានដុំតូចៗប៉ុនគ្រាប់សណ្ដែកនៅក ក្លៀក ឬកន្លែងផ្សេងទៀត បានន័យថា មានអ្វីមិនធម្មតាក្នុងខ្លួនយើងហើយ។ វាអាចជាការឆ្លើយតបរបស់រាងកាយទៅនឹងការរលាកបំពង់ក ផ្ដាសាយ ឬធ្ងន់ធ្ងរជាងនេះ គឺដំណើររបស់ មហារីក។ សូមជួបគ្រូពេទ្យដើម្បីទទួលការពិនិត្យ និងព្យាបាល។

៦- ពិបាកលេបចូល

ការពិបាកលេបចូល គឺមានច្រើនណាស់ ហើយក៏បាត់ទៅវិញជារឿយៗ។ តែបើសញ្ញានេះកើតមានជាមួយនឹងការស្រកទម្ងន់ និងក្អួតចង្អោរ វាអាចជាសញ្ញារបស់មហារីកបំពង់ក ឬមហារីកក្រពះ ហើយ។

៧- ក្រហាយទ្រូង

មិនខុសគ្នាពីការពិបាកលេបដែរ វាអាចជាសញ្ញារបស់មហារីកបំពង់ក ឬក្រពះ បើសិនមានរយៈពេលយូរ និងធ្ងន់ធ្ងរជាងមុន។

៨- មាត់មិនប្រក្រតី

បើសិនជាអ្នកជក់បារី ឬចុកថ្នាំជក់ នឹងប្រឈមជំងឺមហារីកមាត់។ គួរយកចិត្តទុកដាក់នឹងបរិវេណមាត់ឲ្យបានហ្មត់ចត់ ជាពិសេសពេលមានឡើងបន្ទះស ឬក្រហម។

៩- ស្រកគីឡូគ្មានមូលហេតុ

ស្រកគីឡូដោយមានរបបអាហារ និងការហាត់ប្រាណត្រឹមត្រូវ ជារឿងប្រសើរ។ តែបើស្រកទម្ងន់ ៤-១០ គីឡូ ដោយមិនបាច់ខំនោះ អាចមកពីសុខភាពយើងមិនល្អ ឬជាសញ្ញាមហារីកក្រពះ លំពែង ឬសួត។

១០- ក្តៅខ្លួន

ក្ដៅខ្លួនភាគច្រើន កើតឡើងដោយសាររាយកាយប្រឆាំងនឹងការបង្ករោគដោយមេរោគ។ តែពេលវាអត់បាត់ ហើយរកមូលហេតុមិនឃើញនោះ វាអាចជាសញ្ញារបស់មហារីកគ្រាប់ឈាមស ឬមហារីកគ្រាប់ឈាមផ្សេង។ សូមប្រុងប្រយ័ត្នចំពោះការ ក្ដៅខ្លួននេះ ព្រោះករណីខ្លះ មិនមែនក្ដៅខ្លួនធម្មតា។ ចូរអង្កេត និងកំណត់ភាពខុសប្រក្រតីដែលតែងកើត។

១១- ដោះប្រែប្រួល

ប្រុសៗហាក់ព្រងើយនឹងដុំដោះ តែប្រហែលមិនដឹងទេថា ប្រុសៗក៏អាចកើតមហារីកដោះដូចស្រីៗដែរ ទោះជា ១% ក្ដី។ បើសង្កេតឃើញមានដុំដោះត្រង់ណានោះ ទៅពេទ្យពិនិត្យភ្លាម។

១២- ល្ហិតល្ហៃ

បើអស់កម្លាំងអត់មានអីចម្លែកទេ ព្រោះរវល់ការងារមួយថ្ងៃៗ ប៉ុន្តែមហារីកប្រភេទមួយចំនួន នឹងធ្វើឲ្យយើងហត់អស់កម្លាំងពីខ្លួន ទោះខំសម្រាកច្រើនក៏ដោយ។

១៣- ក្អក

អ្នកអត់ជក់បារី ក្អកអាចជារឿងធម្មតា។ តែបើអ្នកជាញៀនបារី បើមានក្អកមានឈាម ដកដង្ហើមខ្លីៗ វាអាចជាសញ្ញាបង្ហាញពីមហារីកហើយ។

១៤- ឈឺចាប់

បើឈឺចាប់ខ្លាំង យូរ ពិបាកទ្រាំ ត្រូវទៅរកគ្រូពេទ្យដោះស្រាយបញ្ហានេះ។ ការឈឺចាប់យូរឥតស្រាក ក៏អាចបណ្ដាលមកពីការរាលដាលនៃមហារីកដែរ។

១៥- ចុកពោះ និងបាក់ទឹកចិត្ត

រោគសញ្ញាពីរនេះរួមចូលគ្នាអាចជាសញ្ញារបស់មហារីកលំពែង។ វាកម្រមានណាស់ តែគួរប្រុងប្រយ័ត្ន និងថែរក្សាខ្លួន។

សរុបមក យើងមិនគួរមើលរំលងសញ្ញាតិចតួចឡើយ។ គួរមានទម្លាប់រស់នៅឲ្យបានល្អ ហាត់ប្រាណឲ្យទៀងទាត់ ចៀសវាងស្រា និងបារី។ ទាំងនេះជារឿងដែលយើងគប្បីធ្វើ ដើម្បីការពារសុខភាពខ្លួនឯង៕

អត្ថបទផ្ដល់ដោយ៖ Hello Krupet

ចុចអាន៖ប្រុសៗមានទម្លាប់អាក្រក់ ៨ យ៉ាងនេះ អាចធ្វើឲ្យអត់កូន

ចុចអាន៖អ្វីជា ជំងឺរលាកក្រពេញប្រូស្តាតស្រួចស្រាវ?