មនុស្សចាស់ ចាក់វ៉ាក់សាំង Sinovac ដូសជំរុញ មានប្រសិទ្ធភាព​ដូចបុគ្គលវ័យក្មេងទេ?

បុគ្គលវ័យចំណាស់ ជាក្រុមមនុស្សដែលត្រូវបានចាត់ថ្នាក់ជាបុគ្គលងាយរងគ្រោះ និងគួរឱ្យបារម្ភអំពីប្រសិទ្ធភាពវ៉ាក់សាំងចំពោះរាងកាយ ​ព្រោះថាសុខភាពពួកគាត់ មិនរឹងមាំដូចក្មេងៗ។

ក្រោយយុទ្ធនាការចាក់វ៉ាក់សាំងដូសជំរុញនាពេលកន្លងទៅ មនុស្សចាស់មួយចំនួនបានចាក់វ៉ាក់សាំងដូសបន្ថែមរួចរាល់ហើយ ខណៈមួយចំនួនទៀតមិនទាន់បានចាក់ ហើយក៏កំពុងចង់ដឹងថាដូសទី៣ដែលនឹងត្រូវចាក់ នឹងមានប្រសិទ្ធភាពប៉ុនណាចំពោះពួកគាត់។

បើតាមប្រភពពីសារព័ត៌មាន Global Times ការផ្ដល់វ៉ាក់សាំងស៊ីណូវ៉ាក់ (Sinovac) ដូសជំរុញ ឬដូសទី ៣ ជូនដល់មនុស្សចាស់ដែលមានគម្លាតពីដូសទី ២ បាន ៦-៨ ខែ អាចផលិតអង់ទីគ័រមិនខុសពីមនុស្សវ័យក្មេងនោះទេ។

ការចាក់វ៉ាក់សាំង ស៊ីណូវ៉ាក់ ដូសទី ៣ ចំពោះមនុស្សចាស់ដែលមានវ័យ ៦០ ឆ្នាំឡើងទៅ អាចផ្ដល់ឱ្យប្រព័ន្ធភាពស៊ាំកាន់តែមានភាពមាំទាំប្រឆាំងនឹងកូវីដទម្រង់ដើម និងកូវីដបំប្លែងខ្លួនផ្សេងៗផងដែរ។

យោងតាមសិក្សានាពេលកន្លងមក ប្រសិទ្ធភាពរបស់វ៉ាក់សាំងនេះ មានសមត្ថភាពទប់ស្កាត់ការបញ្ជូនចូលព្យា​បាលនៅមន្ទីរពេទ្យបាន ៨៧% ទប់ស្កាត់ការបញ្ជូនទៅបន្ទប់ ICU ដល់ទៅ ៩០.៣% និងការពារការស្លាប់ដែលបណ្តាលមកពីជំងឺកូវីដ-១៩ ដល់ទៅ ៨៦% ។

ដោយឡែក តាមប្រភពពីអង្គការសុខភាពពិភពលោក បានអះអាងថា ថ្នាំបង្ការកូវីដ-១៩ប្រភេទ ស៊ីណូវ៉ាក់ ក្រោយចាក់រួចរាល់អាចរារាំងមិនឱ្យមានអ្នកជំងឺកូវីដ-១៩ចូលសម្រាកនៅមន្ទីរពេទ្យ ១០០ ភាគរយ ។ នេះមានន័យថា ចាក់វ៉ាក់សាំងបានពេញលេញមានប្រសិទ្ធភាពក្នុងការការពាររោគសញ្ញាកូវីដ-១៩ធ្ងន់ធ្ងរ ព្រមទាំងការពារការចូលមន្ទីរពេទ្យបានផងដែរ៕

អត្ថបទ៖ សន្យា

ចុចអាន៖ នេះជាមូលហេតុដែល វ៉ាក់សាំងដូសជំរុញ មានសារសំខាន់ បញ្ឈប់ការឆ្លងកូវីដ

ចុចអាន៖ អ្នកចាក់វ៉ាក់សាំងរបស់ ចិន កុំបារម្ភមិនបង្កហានិភ័យជំងឺស្ទះសរសៃឈាមក្នុងខួរក្បាល ឬដុំកំណកឈាមឡើយ