សុខភាព

វិធីហាត់ប្រាណ ទប់ទល់ផលវិបាកដោយសារទឹកនោមផ្អែម

បានផុស

៣ years មុន

នៅ

ថ្ងៃពុធ ៣ វិច្ឆិកា ២០២១

ដោយ

Sonya

ដូចបានដឹងស្រាប់ ហាត់ប្រាណគឺល្អបំផុតសម្រាប់សុខភាព។ ជំងឺកាចសាហាវជាច្រើន ពិសេសជំងឺទឹកនោមផ្អែម សុទ្ធតែរើសប្រភេទហាត់ប្រាណយកញើស ឬឥរិយាបថហាត់។ បើទោះទឹកនោមផ្អែម ជាជំងឺបង្កផលវិបាកជាច្រើនក៏ពិតមែន ធ្វើឲ្យសុខភាពកាន់តែអន់ថយ ប៉ុន្តែនៅមានដំណោះស្រាយតាមរយៈការហាត់ប្រាណ។ អត្ថបទនេះនឹងណែនាំ ពីវិធីហាត់ប្រាណដើម្បីបញ្ចៀសផលវិបាកនៃជំងឺទាំង ៤ប្រភេទ បង្កឡើងដោយទឹកនោមផ្អែម។

១- ជំងឺប្រព័ន្ធប្រសាទ

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ជំងឺទឹកនោមផ្អែម អាចធ្វើឲ្យសរសៃឈាមរួមតូច ខ្វះអុកស៊ីហ្សែនទៅចិញ្ចឹមប្រព័ន្ធប្រសាទ បង្កឲ្យរងការខូចខាត មិនអាចបញ្ជូនព័ត៌មាន ឆ្លើយតបយឺត ឬពេលខ្លះមិនដំណើរការតែម្តង។ ផលវិបាកទាំងនេះយូរទៅ បង្កឲ្យលែងមានអារម្មណ៍ឈឺចាប់ លែងដឹងក្តៅត្រជាក់ ពិសេសជើងចាប់ផ្តើមស្ពឹកពិបាកដើរ។

– របៀបហាត់៖ ទោះយ៉ាងណា ម៉ាក់ប៉ា អ៊ំៗយើង នៅតែអាចកាត់បន្ថយផលប៉ះពាល់ តាមរយៈលំហាត់ប្រាណស្រាលៗ ដោយមិនចាំបាច់ប្រើជើងរុញ ឬសង្កត់ឧបករណ៍នោះឡើយ។ កត្តាសំខាន់ក្នុងការហាត់ប្រាណពេលមានជំងឺប្រព័ន្ធប្រសាទ គឺការពារជើងរបស់យើង។ មួយទៀត ហាត់សាច់ដុំដៃ សាច់ដុំស្មារ ឬដើរដោយពាក់ស្បែកជើងត្រឹមត្រូវ មានប្រយោជន៍ ប្រឆាំងជំងឺនេះ អាចបន្ថែមលំហាត់ប្រាណលំនឹងខ្លះៗទៅក្នុងកម្មវិធីហាត់ប្រាណកាន់តែប្រសើរ។

២- ជំងឺបេះដូង និងសរសៃឈាម

ទឹកនោមផ្អែម នឹងធ្វើឲ្យសរសៃឈាមខូចបន្តិចម្តងៗ បន្សល់ទុកជាតិខ្លាញ់ក្នុងសរសៃឈាម។ កំណកខ្លាញ់ អាចធ្វើឲ្យជួបផលលំបាកដូចជា ចុកជើង ជំងឺបេះដូង ជាដើម។

– របៀបហាត់៖ ដើរ ជិះកង់ ល្អបំផុតប្រឆាំងជំងឺនេះ។ យ៉ាងណា អាចហាត់រួមជាមួយការហាត់លើកទម្ងន់ ដើម្បីរក្សាកម្លាំងផងដែរ។

៣- ជំងឺបាតភ្នែក

ផលវិបាកមួយទៀត គឺជំងឺបាតភ្នែក ព្រោះទឹកនោមផ្អែម នឹងធ្វើឲ្យសរសៃភ្នែកខាងក្រោយខូចខាត នាំឲ្យភ្នែកយើងពិបាកក្នុងការមើល។ ប៉ុន្តែភ្នែកយើងនៅតែអាចវិលមករកភាពប្រក្រតីបាន បើដឹងពីវិធីហាត់ប្រាណប្រកបដោយប្រសិទ្ធភាព។

– របៀបហាត់៖ ជាមួយលំហាត់ប្រាណទៀងទាត់ ដូចជា ជិះកង់ ដើរ (ប្រើម៉ាស៊ីនក៏បាន) ហែលទឹក ជាដើម។ គួរចៀសវាងលំហាត់ប្រាណណាបង្កឲ្យសម្ពាធភ្នែកកើនឡើង ដូចជា លំហាត់ប្រាណឱនចុះឡើង ឬលើកទម្ងន់ធ្ងន់។

៤- ជំងឺតម្រងនោម

ជំងឺទឹកនោមផ្អែម ក៏បង្កផលវិបាកធ្ងន់ធ្ងរដល់តម្រងនោមដូចគ្នា មិនអាចច្រោះទឹកបានគ្រប់គ្រាន់ ធ្វើឲ្យទឹកក្នុងរាងកាយចាល់ច្រើនឡើង។ ករណីនេះ លំហាត់ប្រាណកម្រិតមធ្យម មានប្រយោជន៍បំផុត។

– របៀបហាត់៖ ប្រសិនម៉ាក់ប៉ា អ៊ំៗយើង មានជំងឺទឹកនោមផ្អែម គួរតែហាត់ប្រាណទៀងទាត់ និងត្រឹមត្រូវ រក្សាទម្ងន់សមល្មម ជួយឲ្យសុខភាពកាន់តែល្អ។ ហាត់ប្រាណតាមការណែនាំខាងលើ មានសុវត្ថិភាព និងប្រសិទ្ធភាព៕

អត្ថបទផ្ដល់សិទ្ធិ៖ Hello គ្រូពេទ្យ

ចុចអាន៖ កុំចេះតែហ៊ាន! កើតជំងឺទឹកនោមផ្អែម មិនអាចស្ត្រេសផ្ដេសផ្ដាសទេ

ចុចអាន៖ ២ សំណួរ អ្នកជំងឺទឹកនោមផ្អែមលែងសង្ស័យចំពោះវ៉ាក់សាំងបង្ការកូវីដ-១៩