សុខភាព

ការសម្រេចចិត្តត្រឹមត្រូវរបស់ស្ត្រីនាំមកនូវជីវភាពល្អប្រសើរ…

បានផុស

៤ years មុន

នៅ

ថ្ងៃសុក្រ ៤ ធ្នូ ២០២០

ដោយ

ដោយនឹកឃើញកាលពីអតីតកាលជំនាន់យាយនិងម្ដាយរបស់នាងពួកគាត់មានកូនច្រើនណាស់ គឺមានទៅដល់ ១២ នាក់ឯនោះ ដែលបានធ្វើឲ្យនាងសម្រេចចិត្តទៅមណ្ឌលសុខភាព ដែលនៅជិតផ្ទះរបស់នាងនៅភូមិចាក់ជ្រុំ ឃុំដំបូកខ្ពស់ ស្រុកអង្គរជ័យ ខេត្តកំពត ដើម្បីទទួលយកសេវាពន្យារកំណើត ដោយការលេបថ្នាំការពារកុំឲ្យមានផ្ទៃពោះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ស្ដ្រីម្នាក់ឈ្មោះ ចាប ភស្តា មានអាយុ៣៥ឆ្នាំ មានប្ដីឈ្មោះ សោម សុវណ្ណ អាយុ៣៦ឆ្នាំ រស់នៅ ភូមិចាក់ជ្រុំ ឃុំដំបូកខ្ពស់ ស្រុកអង្គរជ័យ ខេត្តកំពត សព្វថ្ងៃប្រកបមុខរបរធ្វើស្រែចម្ការ។ ប្អូនស្រីនិយាយថា”យាយរបស់ខ្ញុំមានកូនរហូតដល់ ១២ នាក់ឯណេះ សូម្បីតែម្តាយខ្ញុំក៏មានកូនដល់ទៅ ៨ នាក់ដែរ ខ្ញុំសង្កេតឃើញថា ជីវភាពរស់នៅសព្វថ្ងៃរបស់គាត់ គឺមានភាពលំបាកលំបិនណាស់ ព្រោះតែមានកូននៅក្នុងបន្ទុកច្រើន”។នាងបន្តថា”ដោយក្នុងស្ថានភាពបែបនេះ ទើបខ្ញុំសម្រេចចិត្តមកមណ្ឌលសុខភាព ដើម្បីពិគ្រោះយោបល់ជាមួយគ្រូពេទ្យ នៅក្នុងការទទួលយកមធ្យោបាយពន្យារកំណើត។ បន្ទាប់ពីការពីគ្រោះយោបល់ ខ្ញុំបានសម្រេចចិត្តជ្រើសយកវិធីពន្យារកំណើត ដោយការលេបថ្នាំ”។ បច្ចុប្បន្ននេះ ភស្ដានិងស្វាមី មានពេលវេលាគ្រប់គ្រាន់សម្រាប់ការរកស៊ីចិញ្ចឹមជីវិតក្នុងគ្រួសារ។

ដោយឡែកសម្រាប់រឿងរបស់ស្ដ្រីម្នាក់ទៀត ដែលមានឈ្មោះ អាន រូហ្សា អាយុ ២២ ឆ្នាំនិងស្វាមីឈ្មោះ ងេនធារិទ្ធ អាយុ២៥ឆ្នាំ។ ប្អូនប្រុសជាស្វាមីបាននិយាយថា”ពួកខ្ញុំបានពិភាក្សាគ្នានឹងសម្រេចចិត្ត មកទទួលសេវារំលូតនៅមណ្ឌលសុខភាពនេះ ព្រោះសុខភាពរបស់នាងមិនអំណោយផល”។ បច្ចុប្បន្ននេះ ជាសម័យដែលកំពុងរីកចម្រើនផ្នែកបច្ចេកវិទ្យា ជាពិសេសគ្រឿងបរិក្ខារពេទ្យ ដូច្នេះប្រជាជនមានទំនុកចិត្ត នៅក្នុងការទទួលយកសេវារំលូតសុវត្ថិភាព នៅតាមមន្ទីរពេទ្យជំនាញ ដែលមិនធ្វើឲ្យស្ត្រីមានគ្រោះថ្នាក់ ដូចការទៅទទួលសេវានៅកន្លែង ដែលមិនមានជំនាញនោះទេ។

អ្នកស្រី យន់ ហ៊ី អាយុ៤៤ឆ្នាំ ជាសមាជិកក្រុមប្រឹក្សា ឃុំ ដើមដូងស្រុកអង្គរជ័យ និយាយថា”ខ្ញុំឮពីម្ដាយខ្ញុំប្រាប់ថា ពីសម័យមុនមានស្ត្រីខ្លះ ដែលមានផ្ទៃពោះដោយចៃដន្យឬមានដៃគូស្នេហាលួចលាក់ហើយមានផ្ទៃពោះស្ត្រីទាំងនោះ បានធ្វើការរំលូតតាមវិធីសាស្ត្រផ្សេងៗដូចជាការផឹកស្រាឬផឹកថ្នាំ។ល។ តែក្រោយមក ក៏មានគ្រោះថ្នាក់ដល់ស្លាប់ឬមិនអាចមានកូនបានទៀត”។

ជុំវិញរឿងនេះដែរ អ្នកស្រី អៀម ម៉ាក់ សុគន្ធារី មានអាយុ៦០ឆ្នាំ ជាឆ្មបនៅមណ្ឌលសុខភាពដំបូកខ្ពស់ ស្រុកអង្គរជ័យ និយាយថា”ខ្ញុំធ្វើការនៅផ្នែកនេះជាង៣០ឆ្នាំមកហើយ ហើយខ្ញុំពេញចិត្តនឹងផ្ដល់សេវាសុខភាពជូនប្រជាជន”។ អ្នកស្រីបន្ថែមថា នៅមណ្ឌលសុខភាពដំបូកខ្ពស់មានផ្ដល់សេវាពន្យារកំណើតការថែទាំផ្ទៃពោះ និង រំលួត សុវត្ថិភាព ផងដែរ។ អ្នកស្រីបន្តថា”ខ្ញុំតែងតែឮគេនិយាយថា ការរំលូតជាអំពើបាប ប៉ុន្តែផ្ទុយទៅវិញខ្ញុំគិតថា ការផ្ដល់សេវារំលូតសុវត្ថិភាព គឺជាការជួយសង្គ្រោះជីវិតមនុស្ស ដែលកំពុងមានទុក្ខឲ្យរួចផុតពីទុក្ខទៅវិញទេ”។