ក្រសួងសុខាភិបាល ប្រាប់ ៣វិធី ការពារខ្លួនពី អូមីក្រុង

ក្រោយពេលកូវីដបំប្លែងខ្លួនប្រភេទ អូមីក្រុង (Omicron) រាតត្បាតមកដល់ កម្ពុជា ជឿថាគ្រប់គ្នាច្បាស់ជាមានក្ដីព្រួយបារម្ភ ខណៈវីរុសនេះត្រូវបានអ្នកវិទ្យាអះអាងថា វាអាចចម្លងលឿនបំផុត ​និងខ្លាំងជាងវីរុសបំប្លែងខ្លួនដទៃៗទៀត។

ថ្វីត្បិត អូមីក្រុង មានសមត្ថភាពចម្លងរហ័សពិតមែន ប៉ុន្តែគ្រប់គ្នា អាចការពារខ្លួនឯងបាន ប្រសិនអនុវត្តតាមគោលការណ៍សុវត្ថិភាពរបស់ក្រសួងណែនាំ។ ជាមួយគ្នានេះ ដើម្បីការពារនិងទប់ស្កាត់ឱ្យបានទាន់ពេលវេលានូវការចម្លងវីរុសប្រភេទថ្មី អូមីក្រុង និងដើម្បីបន្តនិរន្តភាពនៃការរស់នៅក្នុងប្រក្រតីភាពថ្មីក្នុងសង្គមកម្ពុជា ឯកឧត្តមសាស្រ្តាចារ្យ ម៉ម ប៊ុនហេង រដ្ឋមន្រ្តីក្រសួងសុខាភិបាល ធ្លាប់បានធ្វើការអំពាវនាវ និងក្រើនរំលឹកដល់ប្រជាពលរដ្ឋទាំងអស់ឲ្យអនុវត្ដវិធានការ និងការណែនាំដូចខាងក្រោម៖

១. សូមបន្តអនុវត្តវិធានការសំខាន់ៗ ជាពិសេសសូមបន្តអនុវត្តវិធានការ “៣ការពារ និង៣កុំ” ឱ្យបានហ្មត់ចត់ ដើម្បីកាត់បន្ថុយហានិភ័យនៃការឆ្លងវីរុសកូវីដ-១៩ រួមទាំងអនុវត្តន៍វិធានការសុខភាពសាធារណៈនិងសង្គមចាំបាច់នានាដូចជា ការពាក់ម៉ាសឱ្យបានត្រឹមត្រូវ អនាម័យដៃដោយលាងសម្អាតញឹកញា់ ការរក្សាគម្លាតសុវត្ថិភាពបុគ្គល ១,៥ម៉ែត្រឡើង ការកែលម្អខ្យល់ចេញចូលនៃទីធ្លាក្នុងផ្ទះ ឬទីតាំងការងារ ឬទីតាំងប្រកបរបររកស៊ីទទួលទាន ជៀសវាងកន្លែងមានមនុស្សច្រើន កន្លែងដែលបិទជិតគ្មានខ្យល់ចេញចូល និងទទួលចាក់ថ្នាំបង្ការកូវីដ-១៩ ឱ្យបានគ្រប់ដូសមូលដ្ឋានទាំងអស់។

២. រាយការណ៍ជូនអាជ្ងាធរមូលដ្ឋាន ឬគ្រូពេទ្យដែលនៅជិតលោកអ្នក អំពីករណីសង្ស័យណាមួយដែលពាក់ព័ទ្ធទៅនឹងភាពខុសប្លែកគ្នានៃរោគសញ្ញា ឬជំងឺនិងត្រូវនៅឱ្យដាច់ដោយឡែកដើម្បីកុំឱ្យមានការចម្លងបន្តទៅអ្នកដែលនៅជិតខ្លួន ឬក្រុមគ្រួសារខ្លួនក្នុងអំឡុងពេលរង់ចាំការវិភាគដើម្បីរកវីរុសបំប្លែងថ្មីនេះ។

៣. ត្រូវជុំរុញប្រជាពលរដ្ឋឱ្យទៅទទួលការចាក់វ៉ាក់សាំងកូវីដ-១៩ឱ្យបានគ្រប់គ្នា ជាពិសេសជនដែលងាយរងគ្រោះ និងបង្កើនការយកចិត្តទុកដាក់បន្ថែមទៀត ដោយបុគ្គលម្នាក់ៗត្រូវទទួលខុសត្រូវលើការពារខ្លួន ព្រមទាំងគ្រួសារ និងសហគមន៍ត្រូវលើកកម្ពស់ការចូលរួម តាមដាន និងអនុវត្តវិធានការការពារ នោងស្វែងរកការព្យាបាលឱ្យទាន់ពេលវេលា ដើម្បីជួយសង្រ្គោះអាយុជីវិតអ្នកជំងឺធ្ងន់ៗ ជាដើម៕

អត្ថបទ៖ សន្យា

ចុចអាន៖ ក្រោយ អូមីក្រុង ចូលដល់ កម្ពុជា នេះជារោគសញ្ញាគួរតាមដាន

ចុចអាន៖ វ៉ាក់សាំងការពារកូវីដបច្ចុប្បន្ន អាចទប់ស្កាត់ Omicron កម្រិតណា?