អូមីក្រុង និង ដែលតា ធ្វើឱ្យសួតរងផលប៉ះពាល់ផ្សេងគ្នា ត្រូវដឹង

ប្រភពពី newsncr បានឱ្យដឹងថា ក្រោយពីឆ្លងវីរុសបំប្លែងខ្លួន ​អូមីក្រុង អ្នកជំងឺនឹងរងផលប៉ះពាល់សួតខុសគ្នា ពីវីរុសបំប្លែងខ្លួន ដែលតា ខណៈ ដែលតា​ ហាក់មានសភាពធ្ងន់ធ្ងរជាង អូមីក្រុង។ នេះបើតាមការពន្យល់របស់វេជ្ជបណ្ឌិត Ajay Kumar អ្នកជំនាញខាងជំងឺកូវីដ-១៩ មកពីមជ្ឈមណ្ឌលស្រាវជ្រាវ និងថែទាំជំងឺរបស់ឥណ្ឌា។

វេជ្ជបណ្ឌិតរូបនេះពន្យល់ថា ផលប៉ះពាល់ទៅលើសួត​របស់​អ្នក​ឆ្លង​ ដែលតា  មាន​ភាពធ្ងន់ធ្ងររហ័សណាស់។ ចំពោះអ្នកជំងឺធ្ងន់ធ្ងរ ក្រោយបញ្ជូនទៅមន្ទីរពេទ្យ ពួកគេត្រូវស្កេនភ្លាមៗ ចំណែកកម្រិត​អុកស៊ីហ្សែន​ក្នុង​ខ្លួន ក៏​ធ្លាក់​ចុះ​លឿនផងដែរ។

ដោយឡែក អូមីក្រុង វិញមិនបង្កការខូចខាតដល់សួតខ្លាំងប៉ុន្មានឡើយ ខណៈវីរុសនេះប៉ះពាល់ទៅលើផ្លូវដង្ហើមផ្នែកខាងលើច្រើនជាង ប៉ុន្តែអាចបង្កឱ្យមានជំងឺផ្សេងរយៈពេលវែងដូចជា រលាកទងសួត និងបេះដូងលោតញាប់។

ចំពោះមូលហេតុនៃការប៉ះពាល់សួតបណ្ដាលមកពីវីរុសបំប្លែងខ្លួនទាំងពីរប្រភេទនេះ ក៏ព្រោះតែអ្នកជំងឺឆ្លង ដែលតា មានអាការគ្រុនក្តៅខ្លាំង និងមិនងាយថមថយ ក្នុងរយៈពេលជាច្រើនថ្ងៃ រហូតដល់ ១០ ទៅ ១២ថ្ងៃ ខណៈ អូមីក្រុង មិនមានរោគសញ្ញាយូរបែបនេះទេ ហើយវានឹងបញ្ចប់រោគសញ្ញាក្នុងរយៈពេលត្រឹម ៣ ទៅ ៤ ថ្ងៃប៉ុណ្ណោះ៕

ប្រែសម្រួល៖ សន្យា

ចុចអាន៖ ហេតុផល ៥ យ៉ាង ត្រូវព្យាយាមចៀសវាងការឆ្លងអូមីក្រុងឲ្យបាន

ចុចអាន៖ អ្នកជាសះស្បើយពីអូមីក្រុង អាចជួបរោគសញ្ញាមួយនេះ