សុខភាព

ស្ត្រីពពោះមិនទាន់ចាក់វ៉ាក់សាំងកូវីដ បង្កជាក្ដីបារម្ភ ពេលអូមីក្រុងរាតត្បាត

បានផុស

៣ years មុន

នៅ

ថ្ងៃអង្គារ ១៨ មករា ២០២២

ដោយ

គិតៗទៅ យើងរស់នៅជាមួយការរាលដាលវីរុសកូរ៉ូណាធម្មតា និងវីរុសបំប្លែងដទៃទៀតអស់រយៈពេលជិត៣ឆ្នាំហើយ។ ចំណែកវ៉ាក់សាំងការពារជំងឺនេះ មានច្រើនប្រភេទ និងសុទ្ធតែមានប្រសិទ្ធភាព ប៉ុន្តែរបាយការណ៍រកឃើញថា លទ្ធផលចាក់វ៉ាក់សាំងក្នុងចំណោមស្ត្រីពពោះ នៅមានកម្រិតទាបនៅឡើយ អំឡុងពេលវីរុសបំប្លែងអូមីក្រុងកំពុងវាយលុក។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យោងតាមទិន្នន័យពី CDC សហរដ្ឋអាមេរិក គិតត្រឹមថ្ងៃទី១ ខែមករានេះ មានតែជាង ៤០%នៃអ្នកមានផ្ទៃពោះនៅសហរដ្ឋអាមេរិកដែលមានចន្លោះអាយុពី ១៨-៤៩ឆ្នាំ បានចាក់វ៉ាក់សាំងគ្រប់ដូសមុនពេលមានផ្ទៃពោះ ឬអំឡុងពេលពពោះ បើប្រៀបធៀបនឹង ៦៦%នៃប្រជាជនទូទៅដែលមានអាយុលើសពី ៥ឆ្នាំ។ បើងាកមកមើលទិន្នន័យរបស់ចក្រភពអង់គ្លេស គិតត្រឹមខែសីហា ឆ្នាំ២០២១ មានតែ២២%នៃស្ត្រីសម្រាលកូនរួចបានចាក់វ៉ាក់សាំងពេញលេញ។

នេះជាបញ្ហាគួរឲ្យបារម្ភជាមួយ ចំពោះវីរុសបំប្លែងថ្មីអូមីក្រុង ដែលកំពុងបន្តរាលដាលខ្លាំងឡើងៗ។ នៅចុងឆ្នាំ២០២១ ក្រុមអ្នកឃ្លាំមើលយុទ្ធនាការចាក់វ៉ាក់សាំងនៅចក្រភពអង់គ្លេស ប្រកាសថា ស្ត្រីមានផ្ទៃពោះនឹងត្រូវបង្កើតជាក្រុមអាទិភាពសម្រាប់ការទទួលបានវ៉ាក់សាំងការពារកូវីដ-១៩ បន្ទាប់ពីការស្រាវជ្រាវជាច្រើនបង្ហាញថា ក្រុមមនុស្សនេះងាយរងគ្រោះដោយសារជំងឺកូវីដ-១៩។

ប៉ុន្តែ ព័ត៌មានមិនពិតបានកើតមាននៅក្នុងសហគមន៍ម៉ាក់ប៉ាដែលកំពុងរំពឹងចង់បានកូនដែលពាក្យចចាមអារ៉ាមថា វ៉ាក់សាំងកូវីដ-១៩បង្កឲ្យមានវិបត្តិគ្មានកូន ឬរលូតកូន ឬថាប្រូតេអ៊ីនមានក្នុងវ៉ាក់សាំងអាចបំផ្លាញប្រូតេអ៊ីនមាននៅក្នុងសុកបាន។ ផ្ទុយទៅវិញ ទិន្នន័យបានបង្ហាញយ៉ាងច្បាស់ថាវ៉ាក់សាំងកូវីដ-១៩ មានសុវត្ថិភាព។ ការសិក្សាមួយរបស់ CDC អាមេរិកចេញផ្សាយនៅខែនេះឲ្យដឹងថា ស្ត្រីពពោះជាង ៤៦ ០០០នាក់ មិនមានហានិភ័យនៃការសម្រាលកូនមិនគ្រប់ខែ ឬកូនកើតមកតូចជាងទារកដទៃនោះទេ។

បន្ថែមពីនេះ ការចាក់វ៉ាក់សាំងក៏មិនប៉ះពាល់ដល់លទ្ធភាពក្នុងការមានកូនដែរ ហើយចំពោះស្ត្រីបំបៅដោះកូនក៏មិនប្រឈមនឹងហានិភ័យសុខភាពដែរ តែវ៉ាក់សាំងកូវីដ-១៩ អាចបង្កើតអង់ទីករជ្រាបចូលទៅក្នុងទឹកដោះម្ដាយជួយបង្កើតរនាំងការពារទារកពីជំងឺកូវីដ-១៩បានទៀតផង។

ម៉្យាងវិញទៀត ទិន្នន័យក៏បានបង្ហាញផងដែរថា ជំងឺកូវីដ-១៩ អាចសម្លាប់ស្ត្រីមានផ្ទៃពោះ និងគភ៌ក្នុងផ្ទៃបាន។ ការសិក្សាឆ្នាំ ២០២០ របស់ The British Medical Journal បានរកឃើញថា បើស្ត្រីឆ្លងជំងឺនេះអំឡុងពេលពពោះ ហានិភ័យនៃទារកកើតមិនគ្រប់ខែនឹងកើនឡើងទ្វេដង ហើយហានិភ័យកូនស្លាប់ក្នុងអាចកើនឡើងគុណនឹងបី។ មិនតែប៉ុណ្ណោះ ស្ត្រីពពោះដែលឆ្លងកូវីដ-១៩ ក៏អាចប្រឈមនឹងការកើតជំងឺបម្រុងក្រឡាភ្លើង ឬត្រូវការសម្រាលដោយវះកាត់ជាបន្ទាន់ផងដែរ៕

អត្ថបទផ្ដល់ដោយ៖ Hello Krupet

ចុចអាន៖វ៉ាក់សាំងមិនត្រឹមការពារ ស្ត្រីមានផ្ទៃពោះ ពីកូវីដទេ ថែមទាំងជារបាំងដល់សុក និងទារក

ចុចអាន៖ម៉ាក់ៗកំពុងពពោះ អាចញ៉ាំសាច់អន្ទង់បានអត់?

Related Topics:ស្រ្តីមានផ្ទៃពោះ