ត្រូវតាមដាន! ករណី អូមីក្រុង ភាគច្រើននៅ វៀតណាម មិនបង្ហាញ រោគសញ្ញាឡើយ (មានវីដេអូ)

យោងតាមនាយករងមជ្ឈមណ្ឌលគ្រប់គ្រងជំងឺនៃទីក្រុងហូជីមិញ (HCDC) លោក Nguyen Hong Tam បាននិយាយថា ការឆ្លងកូវីដ ១៩ ដែលភាគច្រើនទាក់ទងនឹងវីរុសបំប្លែងខ្លួនអូមីក្រុងនៅក្នុងប្រទេសវៀតណាម មិនបង្ហាញរោគសញ្ញាអ្វីនោះទេ ។

លោក Tam បាននិយាយថា មានតែ ៧ ករណីប៉ុណ្ណោះក្នុងចំណោម ៨៨ ករណីដែលត្រូវបានព្យាបាលនៅទីក្រុងហូជីមិញ មានរោគសញ្ញាស្រាលដូចជាគ្រុនក្តៅ រងាញាក់ និងឈឺបំពង់ ក ។

អ្នកជំងឺទាំងអស់មានសុខភាពប្រសើរ ដោយរយៈពេលជាមធ្យមពីការធ្វើតេស្តវិជ្ជមានទៅអវិជ្ជមានគឺប្រហែលត្រឹមតែ ៦ ទៅ ៧ ថ្ងៃប៉ុណ្ណោះ ។

ចំណែកសុខភាពនៃអ្នកជំងឺអូមីក្រុងធ្ងន់ធ្ងរបំផុតនោះគឹស្ត្រីអាយុ ៨២ ឆ្នាំដែលបានចូលប្រទេសនៅថ្ងៃទី ១០ ខែមករា ជាមួយនឹងជំងឺជាច្រើនដូចជា មហារីកឈាមដំណាក់កាលចុងក្រោយ និងជំងឺទឹកនោមផ្អែម ស្ថានភាពពេលនេះក៏ប្រសើរឡើងផងដែរ ។

ទន្ទឹមនោះ លោកវេជ្ជបណ្ឌិត Nguyen Van Vinh Chau អនុប្រធានមន្ទីរសុខាភិបាលក្រុងបានណែនាំឲ្យប្រជាពលរដ្ឋអនុវត្តយ៉ាងម៉ឺងម៉ាត់នូវពិធីសាររបស់ក្រសួងសុខាភិបាល ជាពិសេសត្រូវពាក់ម៉ាសជាប្រចាំនៅកន្លែងសាធារណៈ ឬនៅកន្លែងធ្វើការជាដើម ។

គួរបញ្ជាក់ថា រហូតមកដល់ពេលនេះ ប្រទេសវៀតណាមបានកត់ត្រាករណីឆ្លងអូមីក្រុងចំនួន ១៦៣ ករណីដែលភាគច្រើននៅទីក្រុងហូជីមិញ ពោលមាន ៧២ ករណី ៕

សូមទស្សនាវីដេអូ!

ប្រែសម្រួលដោយ ៖ ជីវ័ន្ត

ប្រភព ៖ Vietnam Plus

ចុចអាន ៖ វៀតណាម ជោគជ័យវះកាត់ប្តូរក្រលៀន ទោះអ្នកជំងឺ និងអ្នកបរិច្ចាគ មានប្រភេទឈាមខុសគ្នា