នៅ ថៃ វ៉ាក់សាំង Pfizer មួយដបអាចចាក់ដល់កុមារ ១០ នាក់

លោកវេជ្ជបណ្ឌិត Opas Karnkawinpong អគ្គនាយកនៃនាយកដ្ឋានគ្រប់គ្រងជំងឺថៃបាននិយាយកាលពីថ្ងៃព្រហស្បតិ៍ថា វ៉ាក់សាំង Pfizer គម្របពណ៌ទឹកក្រូចបាច់ដំបូងសម្រាប់កុមារអាយុពី ៥ ទៅ ១១ ឆ្នាំបានមកដល់ប្ររទេសថៃហើយ ។

អ្វីដែលសំខាន់នោះលោកបានពន្យល់ថា វ៉ាក់សាំង Pfizer គម្របពណ៌ទឹកក្រូចមួយដបអាចចាក់ដល់កុមារចំនួន ១០ នាក់ ដោយសារតែក្នុងមួយដបវាមានកម្រិត ១០ ដូស ។ លោកបានបន្ថែមថា វ៉ាក់សាំងនេះតម្រូវឲ្យចាក់កុមារក្នុងកម្រិត ០.២ មីលីលីត្រ ហើយត្រូវរក្សាទុកនៅសីតុណ្ហភាព ២ ទៅ ៨ អង្សាសេ និងមានសុពលភាពរយៈពេល ១០ សប្តាហ៍ ។

លោកបាននិយាយថា “ចាប់ពីថ្ងៃទី ៣១ ខែមករា កុមារដែលមានជំងឺរ៉ាំរ៉ៃអាចទទួលការចាក់វ៉ាក់សាំងរបស់ពួកគេនៅមន្ទីរពេទ្យ ខណៈដែលកុមារផ្សេងទៀតអាចចាក់នៅសាលារៀន ។ កុមារដែលរៀនតាមប្រព័ន្ធអនឡាញ ឬសិក្សាក្រៅប្រព័ន្ធអប់រំ អាចទទួលការចាក់វ៉ាក់សាំងនៅមន្ទីរពេទ្យ” ។

លោក Opas បញ្ជាក់ថា ចន្លោះពេលរវាងការចាក់លើកទី ១ និងលើកទី ២ សម្រាប់កុមារដែលមានអាយុពី ៥-១១ ឆ្នាំគឺ ៣ ទៅ ១២ សប្តាហ៍ អាស្រ័យលើប្រសិទ្ធភាព សុវត្ថិភាព និងស្ថានភាពកូវីដ ១៩ ។

គួរបញ្ជាក់ថា បច្ចុប្បន្នថៃ​ជា​ប្រទេស​អាស៊ី​ទី​ពីរ ​បន្ទាប់​ពី​សិង្ហបុរី​ដែល​ប្រើ​វ៉ាក់សាំង Pfizer គម្របពណ៌ទឹកក្រូចសម្រាប់ចាក់ដល់​កុមារ​អាយុ​ពី ៥ ទៅ ១១ ឆ្នាំ ៕

ប្រែសម្រួលដោយ ៖ ជីវ័ន្ត

ប្រភព ៖ The Nation

ចុចអាន ៖ នៅ ថៃ អ្នកចាក់ដូសទី ៣ វ៉ាក់សាំងអ្វី ត្រូវចាក់ដូសទី ៤ ប្រភេទដដែល