ថៃ ចែកស្រោមអនាម័យ និងថ្នាំពន្យារកំណើតឥតគិតថ្លៃ ថ្ងៃចូលឆ្នាំចិន

ការិយាល័យសន្តិសុខសុខភាពជាតិថៃ (NHSO) និយាយថា ខ្លួននឹងផ្តល់ស្រោមអនាម័យ និងថ្នាំពន្យារកំណើតដោយឥតគិតថ្លៃដល់យុវជនដែលមានអាយុចាប់ពី ១៥ ឆ្នាំឡើងទៅ ។

លោកវេជ្ជបណ្ឌិត Jakkrit Ngowsiri អគ្គលេខាធិការរង NHSO បាននិយាយថា ការផ្តល់ជូននេះមានគោលបំណងការពារជំងឺកាមរោគ និងការមានផ្ទៃពោះដែលមិនចង់បាន ជាពិសេសក្នុងចំណោមយុវវ័យ ។ លោកបាននិយាយកាលពីថ្ងៃព្រហស្បតិ៍ថា វាក៏មានគោលបំណងលើកកម្ពស់ការរួមភេទប្រកបដោយសុវត្ថិភាពផងដែរ ។

លោកវេជ្ជបណ្ឌិត Jakkrit បាននិយាយថា ទីភ្នាក់ងារនេះនឹងចាប់ផ្តើមចែកចាយថ្នាំពន្យារកំណើតដោយឥតគិតថ្លៃនៅថ្ងៃទី ១ ខែកុម្ភៈ ពោលនៅថ្ងៃចូលឆ្នាំចិន ហើយអាចបន្តរហូតដល់ខែមេសា ។

លោកវេជ្ជបណ្ឌិតបញ្ជាក់ថា ប្រជាជនថៃដែលមានអាយុចាប់ពី ១៥ ឆ្នាំឡើងទៅនឹងអាចទទួលបានស្រោមអនាម័យពីគ្លីនិកគិលានុបដ្ឋាយិកា និងឆ្មប ឱសថស្ថាន មន្ទីរពេទ្យដែលដំណើរការដោយឯកជន គ្លីនិកវេជ្ជសាស្ត្រ និងអង្គភាពថែទាំបឋមដែលមានទំនាក់ទំនងជាមួយ NHSO ។

ជាចុងក្រោយលោក​ Jakkrit បាននិយាយថា NHSO ​បាន​អនុញ្ញាត​ឲ្យ​ស្ត្រី​ថៃ​ទទួល​បាន​ថ្នាំ​ពន្យារកំណើត ៣ ​ប្រអប់​ក្នុង​មួយ​ពេល ឬ​រហូត​ដល់ ១៣ ប្រអប់​ក្នុង​មួយ​ឆ្នាំ ខណៈសម្រាប់បុរសវិញ NHSO នឹងផ្តល់ស្រោមអនាម័យដោយឥតគិតថ្លៃចំនួន ១០ កញ្ចប់ក្នុងមួយសប្តាហ៍ ៕

ប្រែសម្រួលដោយ ៖ ជីវ័ន្ត

ប្រភព ៖ Bangkok Post

ចុចអាន ៖ នៅ ថៃ វ៉ាក់សាំង Pfizer មួយដបអាចចាក់ដល់កុមារ ១០ នាក់