សុខភាព

សារធាតុចិញ្ចឹមដ៏អស្ចារ្យទាំង ៨ នៅក្នុងស៊ុត ជួយពង្រឹងសុខភាពរាងកាយ

បានផុស

៣ years មុន

នៅ

ថ្ងៃព្រហស្បតិ៍ ១៩ ឧសភា ២០២២

ដោយ

ស៊ុតគឺជាផ្នែកមួយនៃរបបអាហារដ៏សាមញ្ញ ប៉ុន្តែផ្តល់នូវអាហារូបត្ថម្ភ វីតាមីន និងសារធាតុរ៉ែសំខាន់ៗ ដែលជួយចិញ្ចឹមរាងកាយមនុស្សឱ្យមានសុខភាពល្អ។ ទាំងនៅប៉ែកអឺរ៉ុប និងអាស៊ី ស៊ុតជាអាហារធម្មតា និងងាយស្រួលរកបំផុត សក្ដិសមសម្រាប់អាហារទាំងបីពេល។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមរយៈអ្នកជំនាញ និងការស្រាវជ្រាវ ការបរិភោគស៊ុត ផ្ដល់នូវអត្ថប្រយោជន៍ទាំង ៨ នេះ។

១. ស៊ុតជាប្រភពនៃសារធាតុចិញ្ចឹម វីតាមីន និងសារធាតុរ៉ែសំខាន់ៗជាច្រើន ត្រូវបានរកឃើញនៅក្នុងស៊ុត។ ជាមធ្យមស៊ុត ២ គ្រាប់ផ្ដល់នូវ៖ តម្រូវការវីតាមីន D ៨២% វីតាមីន B-9 ៥០% វីតាមីន B-2 ២៥% និង សេលេញ៉ូម ៤០% ជាប្រចាំថ្ងៃ។ លើសពីនេះ វាផ្ទុកនូវបរិមាណដ៏មានប្រយោជន៍នៃ វីតាមីន A, B, B5, B12 ក៏ដូចជាជាតិដែក អ៊ីយ៉ូត និងផូស្វ័រ ដែលសុទ្ធសឹងជាសារធាតុសំខាន់ៗជួយពង្រឹងសុខភាព និងគាំទ្ររបបអាហារឱ្យមានតុល្យភាព។

២. ស៊ុតផ្ដល់នូវសារធាតុប្រូតេអ៊ីន ស៊ុតត្រូវបានទទួលស្គាល់ជាបណ្តុំនៃប្រូតេអ៊ីនដ៏មានតម្លៃ និងគុណភាព ដែលជួយជួសជុលបញ្ហាសាច់ដុំ និងជាលិកា។ ជាទូទៅស៊ុតមួយគ្រាប់ មានសារធាតុប្រូតេអ៊ីនប្រហែល ៦.៣ ក្រាម។ អត្ថប្រយោជន៍ដ៏អស្ចារ្យនៃប្រូតេអ៊ីននៅក្នុងស៊ុត រួមជាមួយ អាស៊ីតអាមីណូសំខាន់ៗទាំង ៩ ជួយទ្រទ្រង់ដល់ការលូតលាស់ ការស្តា និងការថែទាំសាច់ដុំ ឡើងវិញ។

៣. ស៊ុតពង្រឹងកម្រិតកូឡេស្តេរ៉ុលបានល្អ ស៊ុតជួយបង្កើនកម្រិតកូលេស្តេរ៉ុលបានល្អ ទើបវាមិនមានផលប៉ះពាល់សូម្បី ១% ដល់ហានិភ័យនៃជំងឺបេះដូង។ បើសិនជា រាងកាយទទួលនូវកម្រិតកូលេស្តេរ៉ុលអាក្រក់ ឬលើសលប់ពេក រាងកាយនឹងប្រឈមនឹងជំងឺបេះដូង។ ជាក់ស្ដែង អាហារមួយចំនួនដែលសម្បូរទៅដោយខ្លាញ់ឆ្អែត ដូចជាអាហារបែបចៀន បំពង សុទ្ធសឹងតែជាប្រភពបញ្ហាដែលនាំឱ្យមានហានិភ័យលើសកម្រិតកូលេស្តេរ៉ុល។

៤. ស៊ុតជាប្រភពវីតាមីនD ផ្នែកពណ៌លឿងនៃសុទ្ធ គឺជាប្រភពនៃវីតាមីនD។ ជាក់ស្ដែង មនុស្សពេញវ័យនៅប្រទេសអូស្រ្តាលី ជិតមួយភាគបួន ទទួលរងកង្វះវីតាមីន D ក្នុងកម្រិតស្រាល និងមធ្យម ដែលធ្វើឱ្យស៊ុតកាន់តែមានប្រយោជន៍ និងតម្រូវការច្រើន។ ការទទួលទានស៊ុតចំនួន ២គ្រាប់ ផ្តល់ឱ្យរាងកាយនូវតម្រូវការវីតាមីនD ចំនួន ៨២% ជាប្រចាំថ្ងៃតាមការណែនាំ។ វីតាមីនD ឬឈ្មោះម្យ៉ាងទៀតវីតាមីនព្រះអាសម្រាប់ការថែរក្សាឆ្អឹង និងធ្មេញឱ្យមានសុខភាពល្អ។ ជាពិសេស វាជួយលើកកម្ពស់សាច់ដុំឱ្យរឹងមាំ និងពង្រឹងប្រព័ន្ធភាពស៊ាំផងដែរ។

៥. ស៊ុតជួយរក្សាតុល្យភាពទម្ងន់ ស៊ុតមានកម្រិតកាឡូរីទាប ប៉ុន្តែផ្ទុកនូវប្រូតេអ៊ីនគ្រប់គ្រាន់សម្រាប់រាងកាយមនុស្ស។ បើសិនជាអ្នកមានបញ្ហាទម្ងន់ ឬចង់សម្រកទម្ងន់ ស៊ុតជាជម្រើសអាហារដ៏សក្ដិសមបំផុត ពីព្រោះវាជួយគ្រប់គ្រងទម្ងន់បានល្អ។ ការបរិភោគស៊ុតជួយឱ្យឆាប់ឆ្អែត និងបំបាត់ភាពឃ្លានដែលជួយកាត់បន្ថយអ្នកមិនឱ្យញាំចំណីផ្តេសផ្តាសបន្តទៀត។ ការសិក្សាមួយបានរកឃើញថា ការទទួលទានស៊ុតអាចធ្វើឱ្យអ្នកមានអារម្មណ៍ឆ្អែតបានយូរពីព្រោះ ស៊ុតជួយបង្កើនកម្រិតអរម៉ូនធ្វើឱ្យឆាប់ឆ្អែត និងរក្សាកម្រិតថាមពលខ្ពស់ជំរុញសកម្មភាពមេតាប៉ូលីសក្នុងការមិនធ្វើឱ្យឆាប់ឃ្លាន។ ជាពិសេស ការរួមបញ្ចូលស៊ុតនៅក្នុងរបបអាហារ ជួយកាត់បន្ថយការប្រែប្រួលកម្រិតគ្លុយកូស ធ្វើឱ្យទម្ងន់មានតុល្យភាពយ៉ាងមានប្រសិទ្ធិភាព។

៦. ស៊ុតជាប្រភពអាហារដ៏ល្អបំផុតនៃសារធាតុកូលីន (Dietary Choline) កូលីនជាសារធាតុចិញ្ចឹមដ៏សំខាន់មួយដែលមានក្នុងសិរីរាង្គថ្លើម។ យ៉ាងណា មនុស្សមួយចំនួនធំមិនផលិតសារធាតុកូលីនបានគ្រប់គ្រាន់ក្នុងការបំពេញតម្រូវការប្រចាំថ្ងៃនោះទេ។ ដូច្នេះ មនុស្សត្រូវបំពេញសារធាតុមួយនេះឱ្យបានពេញលេញតាមរយៈរបបអាហារ ដូចជាស៊ុតជាដើម។ ស្រដៀងគ្នាទៅនឹង វីតាមីនB សារធាតុកូលីនកូលីនមានសារៈសំខាន់សម្រាប់ដំណើរការកោសិកា។ ជាធម្មតា កោសិកាមួយនេះដើរតួនាទីក្នុងការអភិវឌ្ឈខួរក្បាល និងខួរឆ្អឹងខ្នង អំឡុងពេលមានផ្ទៃពោះ និងអភិវឌ្ឈការយល់ដឹងចំពោះទារក ព្រមទាំងជួយកាត់បន្ថយការភ្លេចភ្លាំងសម្រាប់មនុស្សចាស់។

៧. ស៊ុតផ្ទុកដោយអូមេហ្គា៣ អូមេហ្គា-៣ ជាប្រភេទអាសុីតខ្លាញ់មិនឆ្អែត និងចាត់ទុកក្នុងក្រុមនៃខ្លាញ់សំខាន់ៗ។ វាមានតួនាទីសំខាន់ដល់ដំណើរការភ្នាសកោសិកា ចាប់តាំងពីសុខភាពបេះដូង និងខួរក្បាល រហូតដល់ការពារភ្នែករបស់អ្នក។ នៅពេលដែលរាងកាយរបស់អ្នកមានសមត្ថភាពផលិតអូមេហ្គា-៣ បានតិចតួច អ្នកចាំបាច់ត្រូវបរិភោគប្រភពអាហារដែលមានសារធាតុមួយនេះបន្ថែម។ នៅក្នុងខ្លាញ់ត្រី ក៏មានសារធាតុអូមេហ្គា៣ដែរ ប៉ុន្តែសម្រាប់អ្នកមិនអាចបរិភោគត្រីបាន វាជាជម្រើសដ៏ល្អបំផុតក្នុងការទទួលទានស៊ុត។

៨. ស៊ុតផ្ទុកសារធាតុប្រឆាំងអុកសុីតកម្ម (ល្អសម្រាប់ភ្នែក) ស៊ុតផ្ទុកនូវពពួកវីតាមីន និងសារធាតុដែលមានប្រយោជន៍ជាច្រើន រួមមាន វីតាមីនA វីតាមីនE និងសេលេញ៉ូម ដែលសុទ្ធតែជាសារធាតុប្រឆាំងអុកសុីតកម្ម។ វាមានអត្ថប្រយោជន៍ក្នុងការគាំទ្រដល់សុខភាពភ្នែក និងប្រឆាំងការចុះខ្សោយនៃចក្ខុវិញ្ញាណពេលចម្រើនវ័យចាស់ទៅ។ កាន់តែពិសេស នៅក្នុងស៊ុតមានសារធាតុប្រឆាំងអុកសុីតកម្មមួយចំនួន ដែលកាត់បន្ថយហានិភ័យនៃជំងឺភ្នែកឡើងបាយ។

តាមរយៈ ប្រាំបីចំណុចខាងលើ ស៊ុតជាប្រភេទអាហារជួយទាំងសន្សំសំចៃលុយកាក់ និងផ្តល់អត្ថប្រយោជន៍ដល់រាងកាយមនុស្សដ៏ច្រើន ប៉ុន្តែអ្នកត្រូវបរិភោគវាក្នុងបរិមាណសមស្របសម្រាប់រាងកាយ៕

ប្រែសម្រួល៖ លីលី

ចុចអាន៖ប្រភពអាហារទាំង ៩ ដែលសម្បូរទៅដោយ វីតាមីន D ជួយឆ្អឹងឱ្យរឹងមាំ

ចុចអាន៖សរីរាង្គសំខាន់ៗចំនួន ៥ នឹងខូចខាតធ្ងន់ធ្ងរ ប្រសិនបើបរិភោគមិនប្រុងប្រយ័ត្ន