WHO តម្រូវឲ្យពាក់ម៉ាសឡើងវិញ ខណៈករណីកូវីដ កើនឡើងជាថ្មី

ស្របពេលករណីឆ្លងជំងឺកូវីដ១៩ កំពុងកើនឡើងជាសកលវិញនោះ អគ្គនាយកអង្គការសុខភាពពិភពលោក (WHO)​ លោកវេជ្ជបណ្ឌិត Tedros Adhanom Ghebreyesus បានអំពាវនាវ ឲ្យប្រទេសទាំងឡាយអនុម័តវិធានការពាក់ម៉ាស និងគម្លាតសង្គមឡើងវិញ។

ថ្លែងក្នុងអំឡុងសន្និសីទសារព័ត៌មានប្រចាំសប្តាហ៍ លោក Tedros និយាយថា “មេរោគកំពុងដើរហើរដោយសេរី ហើយប្រទេសនានា មិនបានគ្រប់គ្រងជំងឺនេះប្រកបដោយប្រសិទ្ធភាពទេ”។

បន្ទាប់ពី WHO បានសន្និដ្ឋានកាលពីសប្តាហ៍មុនថា វីរុសនេះនៅតែជា “គ្រាអាសន្នសុខភាពសាធារណៈ ដ៏គួរឲ្យព្រួយបារម្ភជាអន្តរជាតិ”, លោក Tedros អះអាងថា ជំងឺរាតត្បាតមិនទាន់ជិតដល់ទីបញ្ចប់ឡើយ។

ក្នុងពេលមួយសប្តាហ៍ ចាប់ថ្ងៃពីទី៤ ដល់១០ ខែកក្កដា ឆ្នាំ២០២២, ករណីកូវីដថ្មី ជាង ៥.៧លានករណី ត្រូវបានរាយការណ៍ ពោលគឺកើនឡើង ៦% បើធៀបទៅនឹងសប្តាហ៍មុននោះ។

ទោះបីជាយ៉ាងណាក៏ដោយ អត្រាស្លាប់នៅតែមានកម្រិតទាប ពេញមួយរដូវក្តៅនេះ ដោយមានត្រឹមតែជាង ៩៨០០ នាក់ប៉ុណ្ណោះ ដែលត្រូវបានរាយការណ៍ពោលគឺតិចជាងប្រាំដង បើធៀបនឹងសប្តាហ៍ដូចគ្នាកាលពីឆ្នាំមុន។

ទន្ទឹមនោះ លោក Tedros បានអំពាវនាវឲ្យអាជ្ញាធរជាតិ បង្កើនកិច្ចខិតខំប្រឹងប្រែងរបស់ពួកគេក្នុងការតាមដានទំនាក់ទំនងហានិភ័យដល់សាធារណជន ហើយអំពាវនាវឲ្យមានការអនុវត្តឡើងវិញនូវវិធានការសង្គមសុខភាពសាធារណៈ ដូចជាការពាក់ម៉ាស រក្សាគម្លាត និងបើកទីតាំងឲ្យមានខ្យល់ចេញចូល៕

ប្រែសម្រួល៖ Vann Vann

ប្រភព៖ RT

ចុចអាន៖ “BA.5” វីរុសបំប្លែងខ្លួនឆ្លងខ្លាំងជាងគេបំផុត បានមកដល់ហើយ