ចិន ផ្ទុះមេរោគថ្មី មានអត្រាមរណភាពខ្ពស់ជាង កូវីដ១៩ ពេលនេះឆ្លងដល់មនុស្ស ៣៥នាក់ហើយ

ក្រុមវេជ្ជបណ្ឌិត​ បានសម្តែងក្តីព្រួយបារម្ភអំពីការផ្ទុះ​មេរោគ​ថ្មី​មួយ ​ដែល​ពេលនេះ បាន​ឆ្លង​ដល់​មនុស្ស​ចំនួន ៣៥​នាក់ហើយនៅ​ក្នុង​ប្រទេស​ចិន។

ប្រភេទថ្មីនៃមេរោគកើតចេញពីសត្វ Henipavirus ដែលគេដាក់ឈ្មោះថា Langya ឬ LayV ត្រូវបានរកឃើញនៅក្នុងខេត្ត Shandong ភាគខាងកើតប្រទេសចិន និងខេត្ត Henan ភាគកណ្តាលប្រទេសចិន។

មេរោគថ្មីនេះ ត្រូវបានរកឃើញនៅក្នុងសំណាកបំពង់ក ពីអ្នកជំងឺគ្រុនក្តៅនៅភាគខាងកើតប្រទេសចិន ដែលមានប្រវត្តិទាក់ទងជាមួយសត្វក្នុងរយៈពេលថ្មីៗ។

ក្រុមអ្នកប្រាជ្ញដែលចូលរួមក្នុងការសិក្សានេះ បានចង្អុលបង្ហាញថា មេរោគពពួក Henipavirus ដែលទើបនឹងរកឃើញនេះ គឺត្រូវបានផ្សារភ្ជាប់ជាមួយនឹងករណីគ្រុនក្តៅមួយចំនួន ហើយអ្នកឆ្លងមានចេញរោគសញ្ញាដូចជា គ្រុនក្តៅ អស់កម្លាំង ក្អក មិនឃ្លានចំណី ស្រវាំងភ្នែក និងចង្អោរ។

ការស៊ើបអង្កេតបន្ថែមបានរកឃើញថា ២៦ ករណីក្នុងចំណោម ៣៥ករណីនៃការឆ្លងមេរោគ Langya ក្នុងខេត្ត Shandong និង Henan មានចេញរោគសញ្ញាដូចជា គ្រុនក្តៅ ឆាប់ខឹង ក្អក មិនឃ្លានអាហារ ស្រវាំងភ្នែក ចង្អោរ ឈឺក្បាល និងក្អួត។

មេរោគ Henipavirus អាចបង្កឲ្យមានជំងឺធ្ងន់ធ្ងរលើសត្វ និងមនុស្ស ហើយត្រូវបានចាត់ថ្នាក់ជាមេរោគជីវសុវត្ថិភាពកម្រិតទី៤ ដែលមានអត្រាមរណភាពចន្លោះពី ៤០ ទៅ ៧៥ ភាគរយ ពោលគឺខ្ពស់ជាងអត្រាស្លាប់របស់ វីរុសកូវីដ១៩។ នេះបើយោងតាមទិន្នន័យពីអង្គការសុខភាពពិភពលោក (WHO)។

ទោះបីជាយ៉ាងណាក៏ដោយ បច្ចុប្បន្នមិនមានវ៉ាក់សាំង ឬការព្យាបាលសម្រាប់មេរោគពពួក Henipavirus នេះទេ៕

ប្រែសម្រួល៖ Vann Vann

ប្រភព៖ Global Times, Daily Mail

ចុចអាន៖ ចិន រកឃើញករណីជំងឺផ្តាសាយបក្សី H3N8 ឆ្លងពីសត្វទៅមនុស្ស ជាលើកដំបូង