សុខភាព

៤ វិធី សូម្បីនៅការិយាល័យ ក៏អាចសម្រកក្បាលពោះបានដែរ

បានផុស

២ years មុន

នៅ

ថ្ងៃសុក្រ ២៥ វិច្ឆិកា ២០២២

ដោយ

អ្នកដែលកំពុងមានបញ្ហាក្បាលពោះប៉ោង ក្បាលពោះធំ នឹងធ្វើឲ្យគ្មានទំនុកចិត្ត ហើយសូម្បីតែការស្លៀកពាក់ក៏មិនសមសួនដូចគេរាងស្វែលដែរ។ ជាពិសេសចំពោះបុគ្គលិកការិយាល័យជាច្រើន ប្រាកដជាជួបបញ្ហាទាំងនេះ មិនមានពេលហាត់ប្រាណ ឬថែទាំសុខភាពឡើយ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ថ្ងៃនេះកម្ពុជាថ្មីសូមណែនាំវិធីងាយៗ ដើម្បីកាត់បន្ថយក្បាលពោះ ទោះបីជាស្ថិតក្នុងការិយាល័យឬមានពេលតិចក៏ដោយ។ ប៉ុន្តែប្រសិនបើអ្នកធ្វើតាមវិធីទាំងនេះជារៀងរាល់ថ្ងៃ ធានាថាក្បាលពោះងាយស្រកជាមិនខាន។

១ ចៀសវាងភេសជ្ជៈមានជាតិស្ករ

ការមានទម្លាប់ញ៉ាំតែទឹកដោះគោរាល់ពេល នឹងធ្វើឲ្យអ្នកមានក្បាលពោះ ដូច្នេះត្រូវតែបដិសេធជាបន្ទាន់។ ព្រោះភេសជ្ជៈដែលយើងទទួលទានរាល់ថ្ងៃ សម្បូរទៅដោយជាតិស្ករ ក្រែមជូរ ខ្លាញ់ និងទឹកដោះគោខាប់ ដែលមានជាតិផ្អែម អាចបង្កគ្រោះថ្នាក់ដល់សុខភាព ហើយថែមទាំងធ្វើឲ្យយើងងាយមានក្បាលពោះធំទៀតផង។ បើអាចធ្វើបាន អ្នកគួរតែជ្រើសរើសផឹកតែដោយគ្មានទឹកដោះគោ ឬបន្ថែមស្ករតិចបំផុត។ សម្រាប់អ្នកដែលផឹកកាហ្វេ គួរជ្រើសរើសផឹកកាហ្វេខ្មៅដោយគ្មានជាតិស្ករ វាប្រសើរជាង latte ឬ cappuccino ដែលមានទឹកដោះគោ និងស្ករច្រើន។

២ បដិសេធការញ៉ាំអាហារសម្រន់ពេលថ្ងៃ

ក្រៅពីភេសជ្ជៈផ្អែម វាជារឿងមួយទៀតដែលបុគ្គលិកការិយាល័យមិនអាចទ្រាំបាន។ វាជាអាហារសម្រន់ពេលរសៀល ប៉ុន្តែតើអ្នកដឹងទេថា អាហារសម្រន់ទាំងនេះធ្វើឲ្យក្បាលពោះរបស់យើងកាន់តែធំដោយមិនដឹងខ្លួន។ ជំនួសឲ្យការញ៉ាំអាហារសម្រន់ ឬផ្អែម យកទឹកដោះគោជូរ ធញ្ញជាតិ ឬផ្លែឈើគ្មានជាតិស្ករជាអាហារសម្រន់ជំនួសវិញ។ វាជាវិធីសាមញ្ញ ប៉ុន្តែមានប្រសិទ្ធភាពក្នុងការសម្រកខ្លាញ់ក្បាលពោះ។

៣ ក្រោកឡើងដើរឲ្យបានញឹកញាប់

ការអង្គុយនៅតុយូរ អាចធ្វើមនុស្សជាច្រើនមានបញ្ហាធាត់ក្បាលពោះ ដោយសារតែរាងកាយមិនផ្លាស់ទី។ ដូច្នេះអ្នកត្រូវព្យាយាមក្រោកឡើង ហើយដើរឲ្យបានញឹកញាប់ ឡើងជណ្តើរជំនួសឲ្យជណ្តើរយន្ត និងលាតសន្ធឹងខ្លួនប្រាណនៅពេលថ្ងៃ ឬព្យាយាមធ្វើលំហាត់ពេលអង្គុយនៅតុ ដោយរុញក្បាលពោះគ្រប់ពេលដឹងខ្លួន។ នៅពេលដែលវាក្លាយជាទម្លាប់ ក្រៅពីជាវិធីកាត់បន្ថយក្បាលពោះ វាក៏ជួយការពារជំងឺការិយាល័យដែលជាលក្ខខណ្ឌគ្រោះថ្នាក់សម្រាប់បុគ្គលិកការិយាល័យផងដែរ។

៤ កុំបង្អត់អាហារពេលព្រឹក

បុគ្គលិកការិយាល័យជាច្រើន តែងតែទម្លាប់រំលងអាហារពេលព្រឹក ប៉ុន្តែតើអ្នកដឹងទេថា អាហារពេលព្រឹកពិតជាអាហារដែលអាចជួយធ្វើឲ្យរាងកាយរបស់អ្នកមានតុល្យភាព ដើម្បីកុំឲ្យអ្នកឃ្លាននៅពេលថ្ងៃ និងជួយដុតបំផ្លាញថាមពលបានយ៉ាងល្អ វាជាវិធីមួយផ្សេងទៀតដើម្បីកាត់បន្ថយក្បាលពោះយ៉ាងមានប្រសិទ្ធភាព។ គួរតែជ្រើសរើសអាហារពេលព្រឹកដែលសំបូរទៅដោយប្រូតេអ៊ីន និងមានឥទ្ធិពលល្អបំផុតលើរាងកាយ៕