អង់គ្លេស កំពុងផ្ទុះមេរោគមួយប្រភេទ សម្លាប់កុមារជាបន្តបន្ទាប់ (មានវីដេអូ)

កុមារ​​ម្នាក់ទៀត​បាន​ស្លាប់ ​បន្ទាប់​ពី​ត្រូវ​បាន​គេ​រក​ឃើញ​ថា​មាន​ជំងឺ Strep A ដោយនេះជាកុមារ​ទី៨ហើយ ដែលត្រូវ​បាន​សម្លាប់​ដោយ​ការ​ឆ្លង​បាក់តេរី​ក្នុងរយៈពេល​ប៉ុន្មាន​សប្តាហ៍​ថ្មីៗ​នេះ។

ជនរងគ្រោះចុងក្រោយគឺជាសិស្សនៅសាលាបឋមសិក្សា Morelands ក្នុងទីក្រុង Waterlooville នៃតំបន់ Hampshire។

ការរាតត្បាតមេរោគបាក់តេរី Strep A បានរីករាលដាលពាសពេញចក្រភពអង់គ្លេស នាប៉ុន្មានខែថ្មីៗនេះ ខណៈការិយាល័យនាយករដ្ឋមន្ត្រី បានព្រមានឪពុកម្តាយឲ្យតាមដានរោគសញ្ញា។

លោក Simon Bryant ប្រធានផ្នែកសុខភាពសាធារណៈនៅក្រុមប្រឹក្សាតំបន់ Hampshire បាននិយាយថា អាជ្ញាធរកំពុងធ្វើការយ៉ាងជិតស្និទ្ធជាមួយសាលារៀន ដើម្បីលើកកម្ពស់ការយល់ដឹងក្នុងចំណោមឪពុកម្តាយ និងអ្នកថែទាំអំពីសញ្ញានិងរោគសញ្ញានៃការឆ្លងមេរោគ Strep A។

និយាយអំពីការកើនឡើងនៃករណីថ្មីៗ អ្នកនាំពាក្យផ្លូវការរបស់នាយករដ្ឋមន្ត្រីបាននិយាយថា “យើងកំពុងមើលឃើញចំនួនករណីមេរោគ Strep A កើនឡើងក្នុងឆ្នាំនេះ បើប្រៀបធៀបទៅនឹងធម្មតា។ មេរោគនេះ អាចព្យាបាលដោយថ្នាំអង់ទីប៊ីយោទិច​ ប៉ុន្តែក្នុងករណីកម្រ វាអាចចូលទៅក្នុងចរន្តឈាម ហើយបង្កឲ្យមានជំងឺធ្ងន់ធ្ងរ”។

ជាធម្មតា ការឆ្លងមេរោគនេះ បណ្តាលឲ្យឈឺបំពង់ក គ្រុនក្តៅ ឬឡើងកន្ទួលលើស្បែក ហើយឆ្លងតាមរយៈការប៉ះរាងកាយ ឬតាមរយៈដំណក់ទឹកពីការកណ្តាស់ ឬក្អក។

ទីភ្នាក់ងារសន្តិសុខសុខភាពចក្រភពអង់គ្លេសបាននិយាយថា វាជារឿងសំខាន់ណាស់ ដែលព័ត៌មានច្បាស់ការណ៍ ត្រូវបានចែករំលែកជាមួយសហគមន៍សាលារៀននៅតំបន់ Hampshire៕

សូមទស្សនាវីដេអូ៖

ប្រែសម្រួល៖ Vann Vann

ប្រភព៖ SKY

ចុចអាន៖ បាក់តេរី សាហាវ ត្រូវបានរកឃើញលើទឹកដី សហរដ្ឋអាមេរិក ជាលើកដំបូង