ប្រុងប្រយ័ត្ន! កូរ៉េខាងត្បូង រកឃើញមេរោគស៊ីខួរក្បាលលើអ្នកជំងឺមកពី ថៃ

ទីភ្នាក់ងារត្រួតពិនិត្យ និងបង្ការជំងឺកូរ៉េ ( KDCA) បាននិយាយកាលពីថ្ងៃចន្ទថា ប្រទេសកូរ៉េខាងត្បូងបានរកឃើញករណីដំបូងនៃមេរោគស៊ីខួរក្បាលឈ្មោះ Naegleria fowleri ដែលរស់នៅក្នុងដី និងទឹកក្តៅឧណ្ហៗ ហើយជ្រាបចូលទៅក្នុងខួរក្បាលមនុស្សតាមរយៈច្រមុះ ។

ទីភ្នាក់ងារនេះបានសរសេរបង្ហោះថា “KDCA បានបញ្ជាក់ពីការឆ្លងមេរោគស៊ីខួរក្បាល Naegleria fowleri នៅក្នុងអ្នកជំងឺដែលបានស្លាប់ ដោយសារជំងឺរលាកស្រោមខួរ ដែលទើបនឹងត្រឡប់មកពីបរទេស” ។

អ្នកជំងឺស្ថិតនៅក្នុងប្រទេសថៃរយៈពេល ៤ ខែ មុនពេលត្រឡប់មកកូរ៉េខាងត្បូងវិញនៅថ្ងៃទី ១០ ខែធ្នូ ហើយអ្នកជំងឺបានស្លាប់នៅថ្ងៃទី ២១ ខែធ្នូ បន្ទាប់ពីមានអាការឈឺក្បាល ក្តៅខ្លួន ក្អួត និយាយខុសប្រក្រតី និងរោគសញ្ញាផ្សេងៗទៀត ។

គួរបញ្ជាក់ថា មេរោគស៊ីខួរក្បាល Naegleria fowleri ឆ្លងទៅមនុស្សតាមរយៈទំនាក់ទំនងរបស់មនុស្សជាមួយនឹងទឹកកខ្វក់ ហើយនៅពេលវាឆ្លងដល់មនុស្សហើយ វានឹងបង្កជាជំងឺរលាកស្រោមខួរមួយប្រភេទឈ្មោះ Primary Amebic Meningoencephalitis ហើយជាធម្មតាវាធ្វើឲ្យអ្នកជំងឺស្លាប់ផងដែរ ៕

ប្រែសម្រួលដោយ ៖ ជីវ័ន្ត

ប្រភព ៖ Sputnik

ចុចអាន ៖ ខេត្តមួយចំនួនរបស់ ជប៉ុន កំពុងដាច់ភ្លើង និងលុបជើងហោះហើរ ក្រោយព្រិលធ្លាក់ខ្លាំង