សុខភាព

ពិបាកបន្ទោបង់ ឬ ក្ដៀន សាកវិធី៦នេះ លែងជាបញ្ហាទៀត

បានផុស

៤ years មុន

នៅ

ថ្ងៃព្រហស្បតិ៍ ១៤ មករា ២០២១

ដោយ

នៅពេលដែលយើងបន្ទោបង់ទៀងទាត់ជារៀងរាល់ព្រឹក បញ្ហាផ្សេងៗដូចជាហើមពោះ ឬទល់លាមកក៏លែងមានដែរ។ ម្យ៉ាងវិញទៀត សម្រាប់អ្នកធ្វើការ ឬប្រកបអាជីវកម្មផ្សេងៗ ក៏មិនចាំបាច់ខ្វល់ខ្វាយពីការទៅបន្ទប់ទឹកពេលត្រូវចេញក្រៅអីដែរ។ ជាទូទៅ ការបន្ទោបង់ធម្មតាគឺអាច៣ដងនៅក្នុងមួយថ្ងៃ ឬបីដងក្នុងមួយសប្ដាហ៍ អាស្រ័យទៅលើមនុស្សម្នាក់ៗ។ យ៉ាងណាមិញ ប្រសិនបើយើងចង់បង្កើតទម្លាប់បន្ទោបង់នៅពេលព្រឹកព្រលឹមជាទៀងទាត់ យើងអាចសាកល្បងវិធីសាស្ត្រងាយៗដូចខាងក្រោម។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

១. ញ៉ាំទឹក

ការបំពេញជាតិទឹកគ្រប់គ្រាន់នៅពេលល្ងាច គឺមានសារសំខាន់ណាស់ចំពោះការបន្ទោបង់ ហើយមុខងារសំខាន់មួយនៃពោះវៀនធំ គឺជួយឲ្យរាងកាយស្រូបយកជាតិទឹកសាជាថ្មី។ ដូចនេះ យើងគួរតែញ៉ាំទឹកឲ្យបានច្រើននៅពេលញ៉ាំអាហារពេលល្ងាច។

២. ញ៉ាំអាហារមានជាតិសរសៃ

ពពួកអាហារដែលសំបូរទៅដោយជាតិសរសៃមានផ្ទុកជាតិទឹកខ្ពស់ មានដូចជាការ៉ុតឆៅ ផ្លែប៉ោម និងផ្លែប័រជាដើម ដែលជួយសម្រួលដល់ការបន្ទោបង់របស់យើងបានយ៉ាងល្អប្រសើរ។ នៅពេលដែលយើងញ៉ាំអាហារទាំងនេះ វានឹងជួយជំរុញជាតិទឹកកាន់តែច្រើនទៅក្នុងពោះវៀនធំ អំឡុងពេលរំលាយអាហារ ដែលកត្តានេះ នឹងអាចបញ្ចៀសការទល់លាមកបានយ៉ាងមានប្រសិទ្ធភាព។

៣. ញ៉ាំអាហារបំប៉នមានជាតិសរសៃ

ជាមួយគ្នានេះដែរ យើងក៏អាចបំពេញសារធាតុចិញ្ចឹម ដោយការញ៉ាំពពួកអាហារបំប៉នដែលមានជាតិសរសៃខ្ពស់ផងដែរ។ នៅពេលដែលរាងកាយរបស់យើងទទួលយកអាហារបំប៉នដែលមានជាតិសរសៃ យើងអាចនឹងមានអារម្មណ៍ហើមពោះជាបណ្ដោះអាសន្ន។ ប៉ុន្តែ នៅពេលដែលប្រព័ន្ធក្រពះពោះវៀន របស់យើងស៊ាំនឹងវាហើយនោះ យើងនឹងចាប់ផ្ដើមការបន្ទោបង់ជាទៀងទាត់ជាមិនខាន។

៤. ដើរហាត់ប្រាណ ក្រោយអាហារពេលល្ងាច

សម្រាប់អ្នកដែលមិនទាន់ធ្វើលំហាត់ប្រាណទាល់តែសោះ អាចសាកល្បងដើរហាត់ប្រាណនៅក្បែរៗផ្ទះ បន្ទាប់ពីញ៉ាំអាហារពេលល្ងាចរួច ពីព្រោះសកម្មភាពនេះ នឹងជួយជំរុញឲ្យមានចលនាពោះវៀនធំ ដែលធ្វើឲ្យយើងមានការបន្ទោបង់។

៥. ឆាប់គេងលឿនជាងពេលមុន

នៅពេលដែលយើងឆាប់ចូលគេង យើងអាចភ្ញាក់ពីគេងបានលឿនជាងរាល់ដង ហើយវានឹងធ្វើឲ្យយើងមានពេលកាន់តែច្រើននៅពេលព្រឹកព្រលឹម ដើម្បីញ៉ាំអាហារពេលព្រឹក។ ការញ៉ាំរំញោចចលនានៅក្នុងពោះវៀនធំ ដែលជួយជំរុញឲ្យយើងមានការបន្ទោបង់។ មួយវិញទៀត យើងក៏អាចមានពេលគ្រប់គ្រាន់ដើម្បីបន្ទោបង់ ដោយមិនចាំបាច់ប្រញាប់ប្រញាល់ពេកដែរ។

៦. ញ៉ាំកាហ្វេ

ប្រសិនបើយើងចង់បន្ទោបង់នៅពេលព្រឹក យើងមិនគួរមើលរំលងការញ៉ាំកាហ្វេនោះទេ។ ជាមួយនឹងកម្រិតជាតិកាហ្វេអ៊ីនខ្ពស់ដែលមាននៅក្នុងកាហ្វេ វាអាចរំញោចដល់ចលនាពោះវៀនធំបានយ៉ាងអស្ចារ្យ ដែលធ្វើឲ្យយើងចង់ទៅបង្គន់ភ្លាមៗតែម្តង បន្ទាប់ពីញ៉ាំរួច៕

អត្ថបទផ្ដល់សិទ្ធិដោយ៖ Hellokrupet

សូមចុចអាន៖ អាហារ ៧ មុខនេះអាចជួយឲ្យចរន្តឈាមដើរបានល្អ

សូមចុចអាន៖ ក្រោយដួលចំក្បាល បើកូនលេចចេញសញ្ញាទាំងនេះ អាចមានឈាមកកក្នុងខួរក្បាល

Related Topics:សុខភាព