ជំងឺ​អាថ៌កំបាំង​ ​សម្លាប់​មនុស្សច្រើននាក់ ​នៅ កេនយ៉ា

ជំងឺដ៏អាថ៌កំបាំងមួយ បានរីករាលដាលពេញសហគមន៍ Kagi ក្នុងតំបន់ Marsabit ភាគខាងជើងប្រទេសកេនយ៉ា ដោយបានសម្លាប់មនុស្សចំនួន៩នាក់ និងបណ្តាលឲ្យមនុស្សជាង៨០នាក់ផ្សេងទៀត ធ្លាក់ខ្លួនឈឺធ្ងន់។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

មន្ត្រីក្នុងតំបន់លោក Moses Galoro បាននិយាយកាលពីថ្ងៃព្រហស្បតិ៍ទី១១ខែឧសភាថា “មកទល់ពេលនេះ យើងបានបាត់បង់មនុស្សចំនួន៩នាក់ ហើយយ៉ាងតិច៨០នាក់ផ្សេងទៀតកំពុងឈឺនៅក្នុងភូមិ”។

ស្របពេលជាមួយគ្នានោះ លោក​បាន​អំពាវនាវ​ឲ្យ​មាន​​អន្តរាគមន៍​ជា​បន្ទាន់​ ដើម្បី​ទប់ស្កាត់​ការ​រាតត្បាត និង​ការពារ​អ្នក​ស្លាប់​បន្ថែម​ទៀត។ លោក​បន្ត​ថា អ្នក​ស្លាប់​៦​នាក់គឺ​ជា​មនុស្ស​ពេញវ័យ ហើយ​៣​នាក់​ជា​កុមារ​អាយុ​ចន្លោះ​ពី​១​ឆ្នាំ​ដល់​៣​ឆ្នាំ ។

នាយកដ្ឋានសុខភាពតំបន់ Marsabit បាននិយាយថា ខ្លួនកំពុងធ្វើការយ៉ាងជិតស្និទ្ធជាមួយភ្នាក់ងារសុខភាពផ្សេងទៀត ហើយវិធានការចាំបាច់ទាំងអស់ កំពុងត្រូវបានធ្វើឡើងដើម្បីកំណត់ ទប់ស្កាត់ និងគ្រប់គ្រងការផ្ទុះឡើងនៃមេរោគនេះ។

គួរបញ្ជាក់ថា ផ្អែកលើការពិនិត្យបឋម, ជំងឺនេះ ដែលរាយការណ៍ជាលើកដំបូងកាលពីពីរសប្តាហ៍មុន គឺត្រូវបានគេសង្ស័យថាជាទម្រង់ជំងឺគ្រុនចាញ់។ រោគ​សញ្ញា​​រួម​មាន បង្ហាញអាការដូច​​ជំងឺ​ផ្ដាសាយ ភ្នែក​ឡើងលឿង ឈឺក្បាល​ខ្លាំង និង​ហើម​ពោះ៕

ប្រែសម្រួល៖ Vann Vann

ប្រភព៖ RT

ចុចអាន៖ ជំងឺអាថ៌កំបាំង សម្លាប់សិស្សសាលាវៀតណាមម្នាក់ ខណៈជាង ៧០០នាក់ធ្លាក់ខ្លួនឈឺ