ជំងឺផ្លូវចិត្តម្យ៉ាង ធ្វើឲ្យមនុស្សមិនពេញចិត្តរូបរាងខ្លួនឯង

ជំងឺមួយប្រភេទមានឈ្មោះថា “Dysmorphic” គឺជាជំងឺសតិអារម្មណ៍ ធ្វើឲ្យមនុស្សមិនអាចឈប់គិតពីចំណុចអាក្រក់លើរាងកាយរបស់ខ្លួនឯងបានឡើយ ។

នៅពេលនរណាម្នាក់មានជំងឺ Dysmorphic ចំណុចមិនល្អលើរាងកាយរបស់គាត់នឹងធ្វើឲ្យគាត់កើតទុក្ខ ទោះបីអ្នកដទៃមិនចាប់អារម្មណ៍ក៏ដោយ ។ អ្នកជំងឺមានអាការខ្វាយខ្វល់ពីរូបរាងជ្រុល ពួកគេឧស្សាហ៍ឆ្លុះកញ្ចក់យូរៗជារៀងរាល់ថ្ងៃ ជាពិសេសព្យាយាមស្វែងរកផលិតផល ឬសេវាកម្មដើម្បីកែសម្ផស្សឥតឈប់ឈរ ។

ខាងក្រោមគឺជា រោគសញ្ញាជំងឺ Dysmorphic ៖

• ផ្ដោតអារម្មណ៍លើចំណុចមិនល្អនៃរាងកាយដែលអ្នកដទៃមិនសូវចាប់អារម្មណ៍
• គិតថាខ្លួនឯងកំពុងមានចំណុចទាស់ណាមួយ
• ជឿជាក់ថាមានគេកត់ចំណាំចំណុចអាក្រក់របស់ខ្លួនដើម្បីសើចចំអក
• ព្យាយាមគ្រប់គ្រងសម្រស់ដោយការឆ្លុះកញ្ចក់ រៀបចំសក់ លាបមុខ លាបមាត់
• ខំប្រឹងតុបតែងមុខ និងស្លៀកពាក់លើសកាលៈទេសៈ
• ចូលចិត្តប្រៀបធៀបខ្លួនឯងជាមួយអ្នកដទៃ
• ឧស្សាហ៍សួរគេអំពីសម្រស់របស់ខ្លួន
• មិនសូវចង់បង្ហាញខ្លួនក្នុងសង្គមជាដើម ។

សម្រាប់ជំងឺ Dysmorphic មិនមានមូលហេតុច្បាស់លាស់ក្នុងការកើតឡើងស្រដៀងជំងឺផ្លូវចិត្តផ្សេងៗដែរ ចំណែកឯផលវិបាកនៃជំងឺនេះវិញមានដូចជា ៖

• មិនឲ្យតម្លៃខ្លួនឯង
• ព្យាយាមរក្សាគម្លាតពីសង្គម
• បាក់ទឹកចិត្ត ឬផ្លូវចិត្តមិនប្រក្រតី
• ចង់សម្លាប់ខ្លួន
• ថប់បារម្ភ
• មានបញ្ហាបរិភោគអាហារ
• និងកេះស្បែកព្រោះទើសទាល់ ។

គួរបញ្ជាក់ថា ជំងឺខាងលើមិនទាន់មានវិធីការពារនៅឡើយទេ ប៉ុន្តែក្នុងដំណើរការព្យាបាល គេអាចនឹងប្រើវិធីសាស្ត្រផ្លូវចិត្ត និងថ្នាំដើម្បីគ្រប់គ្រង ៕

ប្រភព ៖ Mayoclinic

ចុចអាន ៖ ជំងឺផ្លូវចិត្តម្យ៉ាងគិតថាស្អាតដាច់គេ ហើយមនុស្សគ្រប់គ្នាសុទ្ធតែលង់ស្នេហ៍នឹងខ្លួន