តើការបំបៅកូនដោយទឹកដោះ ផ្តល់ប្រយោជន៍អ្វីខ្លះដល់ម្តាយ និងកូន?

ការបំបៅកូនដោយទឹកដោះម្តាយ គឺជារឿងសំខាន់ណាស់ដែលមនុស្សគ្រប់គ្នាមិនគួរមើលរំលងឡើយ ព្រោះវាជួយឱ្យម្តាយ និងកូនមានសុខភាពល្អ ហើយកូនក៏មានការលូតលាស់ និងប្រាជ្ញាវាងវៃ។

ជុំវិញនឹងអត្ថប្រយោជន៍នៃការបំបៅកូនដោយទឹកដោះម្តាយនេះ វេបសាយរបស់ “Hello គ្រូពេទ្យ” បានបង្ហាញពីអត្ថប្រយោជន៍មួយចំនួនដូចជា៖

១.កូនមានសុខភាពល្អ

តាមរយៈការបៅទឹកដោះម្តាយ នឹងធ្វើឱ្យកូនមានសុខភាពរឹងមាំល្អជាងការបំបៅកូនដោយទឹកដោះគោ។ មិនសូវមានបញ្ហាផ្លូវដង្ហើម ជំងឺរលាកសួត ផ្តាសាយ និងឆ្លងវីរុសជាដើម។ ចំណែក បញ្ហាពោះវៀន រាករូស ក៏មិនសូវកើតមានចំពោះកូនដែលបំបៅដោះកូនដោយទឹកដោះម្តាយផងដែរ។

២.អត្រាស្លាប់ក្រោយសម្រាលក្នុងកម្រិតទាប (SIDS)

Hello គ្រូពេទ្យ បានឱ្យដឹងថា ជំងឺស្លាប់ក្រោយសម្រាល ឬ SIDS ជារោគសញ្ញាស្លាប់ភ្លាមៗនៅពេលកំពុងគេង ទោះបីជាមើលទៅសុខភាពល្អយ៉ាងណាក៏ដោយ។ ទឹកដោះម្តាយ អាចកាត់បន្ថយជំងឺនេះរហូតដល់ទី៥០% ឯណោះ។

៣.ជំងឺមហារីក មានហានិភ័យទាប

ទឹកដោះម្តាយអាចការពារកូនពីជំងឺមហារីកក្នុងវ័យកុមារបាន។ ចំណែកម្តាយដែលបំបៅកូនវិញ ក៏មានងាយមានជំងឺមហារីផងដែរ។

៤.កូនទទួលប្រសិទ្ធភាពកាន់តែខ្ពស់ពីវ៉ាក់សាំង

ទឹកដោះម្តាយ​ មានអង់ទីគ័រខ្ពស់ ធ្វើឱ្យវ៉ាក់សាំងដែលកូនបានចាក់ទទួលបានប្រសិទ្ធភាពខ្ពស់ ជាងកូនដែលបៅទឹកដោះគោ។

៥.កូនឆ្លាត

បំបៅកូនដោយទឹកដោះនឹងជួយឱ្យកូនមានការចងចាំល្អ និង IQ ខ្ពស់ក្នុងវ័យកុមារភាពរបស់ពួកគេ។ មិនតែប៉ុណោះ ក៏ជួយឱ្យធ្មេញរបស់គេដុសបានស្អាតល្អ គ្មានដង្កូវស៊ីធ្មេញ ហើយធ្វើឱ្យធ្មេញត្រង់ស្អាត។

ជាមួយគ្នានេះ អង្គការយូនីសេហ្វ ដើម្បីកុមារគ្រប់រូប ក៏បានស្រាវជ្រាវរកឃើញថា ទឹកដោះម្តាយ គឺជាវ៉ាក់សាំងដំបូងសម្រាប់ទារក ដែលផ្តល់មកនូវការការពារដ៏សំខាន់ ទប់ទល់នឹងជំងឺធ្ងន់ធ្ងរជាច្រើន និងជួយឱ្យកុមារទទួលបានសារធាតុចិញ្ចឹមបានច្រើន និងរឹងមាំ។ ការបំបៅកូនដោយទឹកដោះនេះ អាចធ្វើបាននៅទូទាំងសកលលោក ហើយត្រូវការចូលរួមពីមនុស្សគ្រប់គ្នា ដើម្បីឱ្យមានការបំបៅកូនដោយទឹកដោះម្តាយកាន់តែច្រើនឡើងៗ។

របាយការណ៍របស់អង្គការ យូនីសេហ្វ បង្ហាញថា តាមរយៈការបំបៅកូនដោយទឹកដោះ អាចជួយសង្រ្គោះជីវិតកុមារក្រោមអាយុ ៥ឆ្នាំ ជាង៨២០,០០០នាក់ ជារៀងរាល់ឆ្នាំនៅលើសកលលោក។ ជាមួយគ្នានោះ អាចបង្ការការបាត់បង់ជីវិតបានជាង ២០,០០០ករណី បន្ថែមទៀតពីពីជំងឺមហារីកសុដន់ ដែលកើតមានលើស្រ្តីជាម្តាយជារៀងរាល់ឆ្នាំ៕