សុខភាព

មន្ទីរពេទ្យកុមារជ័យវរ្ម័នទី ៧ វះកាត់ទារកអាយុ ២ ថ្ងៃ ម្នាក់ មានដៃ ៤ ជើង ៤ និងរន្ធគូទត្បៀតជិត ដោយជោគជ័យ

បានផុស

១ year មុន

នៅ

ថ្ងៃពុធ ៨ វិច្ឆិកា ២០២៣

ដោយ

គ្រូពេទ្យឯកទេសវះកាត់ នៃមន្ទីរពេទ្យកុមារជ័យវរ្ម័នទី ៧ (គន្ធបុប្ផា ទី ៤) វះកាត់ ទារក អាយុ ២ ថ្ងៃ ម្នាក់ មកពីស្រុកសំពៅលូន ខេត្តបាត់ដំបង ដែលមានអវយវៈលើ ៤ (ដៃ) អវយវៈក្រោម ៤ (ជើង) និងរន្ធគូទត្បៀតជិត ចំនួន ៤ លើក ដោយជោគជ័យ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

នៅរសៀលថ្ងៃទី ០៨ ខែវិច្ឆិកា ឆ្នាំ ២០២៣ នេះ តាមរយៈផេកហ្វេសប៊ុកផ្លូវការ Dr. Beat Richner បានឲ្យដឹងថា ទារកអាយុ ២ ថ្ងៃ ម្នាក់ មកពីស្រុកសំពៅលូន ខេត្តបាត់ដំបង ប្រសូតតាមផ្លូវធម្មជាតិ មានមកពីកំណើតនូវ អវយវៈលើ ៤ (ដៃ) អវយវៈក្រោម ៤ (ជើង) (Parasitic twin or Conjoined twin) form heteropagus, acephalus and acardius) និងមានរន្ធគូទត្បៀតជិត (Anal imperforation) បានចូលសម្រាកព្យាបាលនៅផ្នែកសង្គ្រោះទារក (NICU) ហើយត្រូវបានវះកាត់ដោយគ្រូពេទ្យឯកទេសវះកាត់ នៃមន្ទីរពេទ្យកុមារជ័យវរ្ម័នទី ៧ (គន្ធបុប្ផា ទី ៤) ដែលដឹកនាំវះកាត់ដោយលោកសាស្ត្រាចារ្យ កែវ សុខា លោកវេជ្ជបណ្ឌិតឯកទេស ប៉ុន ឡាឌីន និង លោកវេជ្ជបណ្ឌិតឯកទេស អៀន សារិន។

ផេកហ្វេសប៊ុកដដែលបានបន្តថា ទារកខាងលើ បានឆ្លងការវះកាត់ចំនួន ៤ លើក ដោយជោគជ័យ ក្នុងនោះ ការវះកាត់លើកទី ១ គឺ ការវះកាត់យកអវយវៈលើ ១ គូ (ដៃ) ចេញ , ការវះកាត់លើកទី ២ គឺ ការវះកាត់ដោយចោះពោះវៀនធំដើម្បីឲ្យទារកបន្ទោបង់លាមកតាមចង្កេះ (colostomy)បណ្ដោះអាសន្ន , ការវះកាត់លើកទី ៣ គឺ ការវះកាត់យកអវយវៈក្រោម ១ គូ (ជើង) ចេញ , ការវះកាត់លើកទី ៤ គឺ ការវះកាត់យកឆ្អឹង pubis ដែលខូចទម្រង់ពីកំណើតចេញ។

ផេកហ្វេសប៊ុកដដែលក៏បានបន្ថែមថា ក្រោយការព្យាបាលវះកាត់ទាំង ៤ លើក ទារកទទួលបានសុខភាពល្អ លូតលាស់ និងធំធាត់ប្រក្រតី ដោយមានការជួយសង្គ្រោះដ៏ល្អ និងមានប្រសិទ្ធភាពពីក្រុមវេជ្ជបណ្ឌិតឯកទេសផ្នែកសង្គ្រោះទារក (NICU)។ ហើយនៅព្រឹកថ្ងៃអង្គារ ទី ០៧ ខែវិច្ឆិកា ឆ្នាំ ២០២៣ ទារករូបនេះ បានចេញទៅផ្ទះដោយស្នាមញញឹមជាមួយឪពុកម្ដាយ និងមានការណាត់ជួបគ្រូពេទ្យវះកាត់ ៣ ខែក្រោយវិញ ដើម្បីបិទពោះវៀនវិញ និងជួសជុលរន្ធគូទ។

សូមបញ្ជាក់ថា រាល់ការព្យាបាលជំងឺទាំងអស់គឺឥតគិតថ្លៃសម្រាប់គ្រប់ៗ គ្នា ដោយគ្មានការរើសអើង ចំពោះបុគ្គលណាម្នាក់ឡើយ៕

អត្ថបទ ៖ ពិសី