អង់គ្លេស រកឃើញវីរុសស្រដៀងនឹងផ្ដាសាយជ្រូក ឆ្លងដល់មនុស្សជាលើក​ដំបូង

ចក្រភពអង់គ្លេសបានរកឃើញករណីជំងឺគ្រុនផ្ដាសាយប្រភេទ A(H1N2)v ដែលស្រដៀងគ្នាទៅនឹងជំងឺផ្ដាសាយជ្រូក ឆ្លងដល់មនុស្សជាលើកដំបូង ខណៈបុគ្គលដែលបានឆ្លងជំងឺប្រភេទនេះមានរោគសញ្ញាស្រាលប៉ុណ្ណោះ ហើយរហូតមកដល់ពេលនេះ អ្នកជំងឺក៏បានជាសះស្បើយផងដែរ ។

នាយកទីភ្នាក់ងារសន្តិសុខសុខភាពចក្រភពអង់គ្លេស (UKHSA) លោក Meera Chand បាននិយាយកាលពីថ្ងៃចន្ទថា ករណីឆ្លងដល់មនុស្សលើកដំបូងនេះត្រូវបានរកឃើញ បន្ទាប់ពីការតាមដានជាប្រចាំនៃជំងឺផ្តាសាយថ្នាក់ជាតិ ហើយប្រភពនៃការឆ្លងមិនទាន់ត្រូវបានគេដឹងនៅឡើយនោះទេ ។

លោក Meera Chand បានលើកឡើងថា “នេះជាលើកដំបូងហើយដែលយើងរកឃើញជំងឺគ្រុនផ្ដាសាយប្រភេទ A(H1N2)v ឆ្លងដល់មនុស្សនៅក្នុងចក្រភពអង់គ្លេស ហើយវាស្រដៀងទៅនឹងវីរុសដែលយើងបានរកឃើញនៅក្នុងសត្វជ្រូកផងដែរ” ។

UKHSA បាននិយាយថា ផ្អែកលើព័ត៌មានដំបូង ករណីឆ្លងដែលបានរកឃើញនាពេលថ្មីៗនេះក្នុងប្រទេសអង់គ្លេស គឺខុសពីករណីកើតលើមនុស្ស ៥០ នាក់ ឬករណីផ្សេងទៀតនៃមេរោគដែលបានរកឃើញនៅកន្លែងផ្សេងគ្នា ចាប់តាំងពីឆ្នាំ ២០០៥ ។

បន្ទាប់មក ក្នុងឆ្នាំ ២០០៩ ជំងឺគ្រុនផ្តាសាយជ្រូកដែលរាតត្បាតយ៉ាងខ្លាំងក្លានោះ បានឆ្លងទៅដល់មនុស្សរាប់លាននាក់ ដោយសារតែវាត្រូវបានបង្កឡើងដោយមេរោគមានផ្ទុកសារធាតុហ្សែនពីមេរោគដែលកំពុងផ្ទុកនៅក្នុងសត្វជ្រូក សត្វស្លាប និងមនុស្សជាដើម ៕

ប្រែសម្រួលដោយ ៖ ជីវ័ន្ត

ប្រភព ៖ CNA

ចុចអាន ៖ កាតា ជួយសម្រួលឲ្យមានការផ្អាកបាញ់នៅតំបន់ហ្គាហ្សាបាន ២ ថ្ងៃទៀត