សុខភាព

បុរសអាយុវែង ច្រើនតែមានចំណូលចិត្ត ៥ យ៉ាងនេះក្នុងខ្លួន

បានផុស

១ year មុន

នៅ

ថ្ងៃព្រហស្បតិ៍ ៣០ វិច្ឆិកា ២០២៣

ដោយ

ការរក្សាចំណង់ចំណូលចិត្តដែលមានសុខភាពល្អ ជួយពន្យារអាយុជីវិតរបស់បុរស។ ដូច្នេះ ដើម្បីរក្សាបាននូវសុខភាពល្អ ទោះចូលដល់វ័យកណ្តាល បុរសគួរអនុវត្តនូវចំណូលចិត្តទាំង ៥ ខាងក្រោមនេះជាប្រចាំ។

មនុស្សភាគច្រើនដឹងថា អាយុវែងអាចត្រូវបានកំណត់ដោយផ្នែកដោយហ្សែន។ ទោះបីជាយ៉ាងណាក៏ដោយ បន្ថែមពីលើកត្តាហ្សែន ការកសាងទម្លាប់ និងចំណូលចិត្តដែលមានសុខភាពល្អ ក៏រួមចំណែកដល់ការកែលម្អសុខភាព និងពន្យារអាយុជីវិតរបស់បុរសផងដែរ។

ផ្ទុយទៅវិញ ការអនុវត្តទម្លាប់អាក្រក់ជាប្រចាំ អាចប៉ះពាល់ដល់សុខភាព បង្កើនហានិភ័យនៃជំងឺ និងអាចបណ្តាលឲ្យបុរសស្លាប់ដោយសារជំងឺផ្សេងៗជាច្រើន។

ឮដើម្បីរក្សាសុខភាព និងអាយុវែង បុរសគួររក្សាចំណូលចិត្តទាំង ៥ ខាងក្រោមនេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

១ ចូលចិត្តហាត់កីឡា

លំហាត់ប្រាណទៀងទាត់ មិនត្រឹមតែជួយឲ្យបុរសរក្សារាងស្អាត និងកាត់បន្ថយជាតិខ្លាញ់ដែលលើសប៉ុណ្ណោះទេ ប៉ុន្តែថែមទាំងជួយយ៉ាងមានប្រសិទ្ធភាពការពារហានិភ័យនៃជំងឺរ៉ាំរ៉ៃ រួមទាំងជំងឺលើសឈាម ទឹកនោមផ្អែម ជំងឺសរសៃឈាមបេះដូង មហារីក។ សាស្ត្រាចារ្យរងវេជ្ជបណ្ឌិត Nieca Goldberg នៃសាលាវេជ្ជសាស្ត្រ Grossman នៅសាកលវិទ្យាល័យញូវយ៉ក សហរដ្ឋអាមេរិក បាននិយាយថា “មានការសិក្សាជាច្រើនដែលបង្ហាញថា ការធ្វើលំហាត់ប្រាណទៀងទាត់អាចជួយរក្សាមុខងារនៃការយល់ដឹង ធ្វើឲ្យរាងកាយមានសុខភាពល្អ ដោយហេតុនេះរួមចំណែកដល់អាយុវែង”។

២ ចូលចិត្តសើច

បុរសដែលចូលចិត្តសើច ច្រើនតែមានចិត្តគំនិតល្អ តែងតែមានសុទិដ្ឋិនិយម និងរីករាយ និងមានគំនិតវិជ្ជមានក្នុងជីវិត។ អារម្មណ៍រីករាយគឺមានប្រយោជន៍ក្នុងការធ្វើអោយប្រសើរឡើងនូវភាពស៊ាំរបស់រាងកាយ។ ការសិក្សាមួយដែលធ្វើឡើងដោយសាកលវិទ្យាល័យ Yale សហរដ្ឋអាមេរិក បានរកឃើញថា មនុស្សចាស់ដែលមានអាកប្បកិរិយាវិជ្ជមានកាត់បន្ថយហានិភ័យនៃជំងឺបាន ៤០% បើប្រៀបធៀបទៅនឹងអ្នកដែលមានគំនិតអវិជ្ជមាន។ ជាពិសេស ការស្រាវជ្រាវបង្ហាញថា មនុស្សចាស់ដែលគិតវិជ្ជមានអំពីភាពចាស់ និងភាពជាប់បានយូរ អាចរស់នៅបានយូរជាងអ្នកគិតអវិជ្ជមានអំពីភាពចាស់ ៧.៥ ឆ្នាំ។

ការសិក្សាផ្សេងទៀតក៏បានរកឃើញថាអ្នកទុទិដ្ឋិនិយមគឺ ៤២% ទំនងជាស្លាប់មុនអាយុជាងអ្នកសុទិដ្ឋិនិយម។ ដូច្នេះហើយ ការគ្រប់គ្រងស្ត្រេស ញញឹមឲ្យបានច្រើន និងមានទស្សនៈវិជ្ជមានលើជីវិត គឺជាមូលដ្ឋានសម្រាប់អាយុវែង។

៣ ចូលចិត្តផឹកទឹកចម្រោះ

ទឹកជាធាតុដ៏សំខាន់សម្រាប់មនុស្សក្នុងការរស់នៅ។ បើគ្មានការផ្តល់ទឹកគ្រប់គ្រាន់សម្រាប់រាងកាយមនុស្សអាចរស់បានតែប៉ុន្មានថ្ងៃប៉ុណ្ណោះ។ ការផឹកទឹកឲ្យបានគ្រប់គ្រាន់ គឺជាកត្តាដែលជួយឲ្យអ្នកមានអាយុវែង។ ទោះជាយ៉ាងណាក៏ដោយ បុរសជាច្រើនមានទម្លាប់ទទួលទានទឹកតិច ដែលអាចប៉ះពាល់ដល់សុខភាពរបស់ពួកគេ។ ទឹកជួយរាងកាយកម្ចាត់ជាតិពុលតាមរយៈថ្លើម និងតម្រងនោម។ ទឹកក៏ជួយរាងកាយស្រូបយកសារធាតុចិញ្ចឹមដោយដឹកអុកស៊ីសែន និងសារធាតុចិញ្ចឹមទៅកោសិកា។ លើសពីនេះ ទឹកក៏ជួយឱ្ឲ្យដំណើរការរំលាយអាហារដំណើរការយ៉ាងរលូន ជួយគ្រប់គ្រងសីតុណ្ហភាពរាងកាយ និងជួយដល់ចរន្តឈាម។

ការស្រាវជ្រាវបានបង្ហាញថា ការផឹកទឹកគ្រប់គ្រាន់ក៏អាចកាត់បន្ថយហានិភ័យនៃជំងឺមហារីកពោះវៀនបាន ៤៥% និងហានិភ័យនៃជំងឺមហារីកប្លោកនោម ៥០% ។ ការទទួលទានទឹកឲ្យបានគ្រប់គ្រាន់ក៏ជួយការពារសុខភាព និងអាយុវែង ដោយកាត់បន្ថយហានិភ័យនៃជំងឺសរសៃឈាមបេះដូង ដូចជាជំងឺលើសឈាម ជំងឺសរសៃឈាមបេះដូង និងជំងឺដាច់សរសៃឈាមខួរក្បាល។

៤ ចូលចិត្តញ៉ាំបន្លែ និងផ្លែឈើ

បុរសតែងតែចូលចិត្តញ៉ាំសាច់ច្រើន អាហារបំពងខ្លាញ់ និងផឹកស្រា។ ប៉ុន្តែទម្លាប់នៃការញ៉ាំនេះអាចបង្កើនហានិភ័យនៃជំងឺរបស់រាងកាយ បង្កើនហានិភ័យនៃជំងឺក្រពះពោះវៀន សូម្បីតែមហារីកក្រពះ។ ចំណែកឯរបបអាហារដែលមានសុខភាពល្អ ផ្ទុយទៅវិញ អាចជួយបុរសការពារជំងឺ និងពន្យារអាយុជីវិតបាន។

អ្នកជំនាញបានចង្អុលបង្ហាញថា ការបង្កើនការទទួលទានអាហារដែលមានជីវជាតិល្អចំពោះសុខភាពដូចជា គ្រាប់ធញ្ញជាតិ បន្លែ មើម និងផ្លែឈើ និងការកំណត់ការទទួលទានអាហារដែលមានជាតិខ្លាញ់ និងសាច់ក្រហមអាចនាំមកនូវអត្ថប្រយោជន៍ដល់សុខភាព។ គ្រាប់ បន្លែ មើម និងផ្លែឈើសម្បូរទៅដោយប្រូតេអ៊ីន ជាតិសរសៃ សារធាតុប្រឆាំងអុកស៊ីតកម្ម និងសមាសធាតុរុក្ខជាតិដែលមានប្រយោជន៍ចំពោះសុខភាព។ លើសពីនេះទៅទៀត ពួកវាជាប្រភពដ៏ល្អនៃវីតាមីន និងសារធាតុរ៉ែជាច្រើនដូចជា ទង់ដែង ម៉ាញ៉េស្យូម ប៉ូតាស្យូម ហ្វូឡាត នីអាស៊ីន និងវីតាមីន B6 និងវីតាមីន E។

ការសិក្សាជាច្រើនក៏បានភ្ជាប់របបអាហារដែលសម្បូរទៅដោយអាហារដែលមានមូលដ្ឋានលើរុក្ខជាតិជាមួយនឹងការថយចុះហានិភ័យនៃការស្លាប់មុនអាយុ ជំងឺមហារីក ជំងឺមេតាប៉ូលីស ជំងឺបេះដូង ជំងឺធ្លាក់ទឹកចិត្ត និងការថយចុះមុខងារខួរក្បាល។

៥ ស្រឡាញ់ការសិក្សា និងទំនាក់ទំនងសង្គម

ការរៀនអ្វីថ្មីៗឥតឈប់ឈរ និងបង្កើនការប្រាស្រ័យទាក់ទងជាមួយមិត្តភ័ក្តិ និងសាច់ញាតិអាចជួយបង្កើនសមត្ថភាពយល់ដឹង និងធ្វើឲ្យខួរក្បាលមានថាមពលឡើងវិញ ការពារជំងឺវង្វេង។អ្នកជំនាញនិយាយថា ការកសាង និងរក្សាទំនាក់ទំនងជាមួយទំនាក់ទំនងជិតស្និទ្ធ និងវិជ្ជមាន អាចជួយអ្នកកាត់បន្ថយភាពតានតឹង និងនាំមកនូវការលួងលោមដល់ចិត្ត និងជីវិតរបស់អ្នក៕

ប្រែសម្រួល៖ សាង ស្រីល័ក្ខ

ចុចអាន៖ភេសជ្ជៈ ៣ មុខ បំពុលខួរក្បាល បង្កើនហានិភ័យនៃជំងឺវង្វេងដល់ទៅ ៣៩ភាគរយ