តើ​ការ​ងូត​ទឹក​ពេល​ព្រឹកឬ​​យប់ មួយណា​ល្អ​សម្រាប់​សុខភាព​?

មនុស្សគ្រប់រូបមានទម្លាប់ងូតទឹកនៅពេលវេលាខុសៗគ្នានៃថ្ងៃ​នីមួយៗ។ ប៉ុន្តែតើអ្នកដឹងទេថា ពេល​ណា​ដែល​ល្អ​បំផុត​ក្នុង​ការ​ងូត​ទឹក​ដើម្បី​សុខភាព​? ខាង​ក្រោម​នេះ​គឺ​ជា​ការ​ពន្យល់​របស់​លោក​វេជ្ជបណ្ឌិតជាច្រើនទាក់ទិននឹងការងូតទឹក។

ការងូតទឹកគឺជាសកម្មភាពដែលយើងធ្វើជារៀងរាល់ថ្ងៃ ដោយជួយយើងកម្ចាត់បាក់តេរី ភាពកខ្វក់ ញើស និងកោសិកាស្បែកដែលងាប់ចេញពីរាងកាយ។ យ៉ាង​ណា​មិញ មនុស្ស​ជា​ច្រើន​នៅ​តែ​ងឿង​ឆ្ងល់​ថា តើ​ការ​ងូត​ទឹក​ពេល​ព្រឹក ឬ​ពេល​យប់​ល្អ​ចំពោះ​សុខភាព​របស់​ពួក​គេ​ឬ​យ៉ាង​ណា?

គ្រូពេទ្យជំនាញខាងសើស្បែក Alok Vij ធ្វើការនៅមជ្ឈមណ្ឌលវេជ្ជសាស្ត្រ Cleveland Clinic សហរដ្ឋអាមេរិក បាននិយាយថា ការងូតទឹកពេលព្រឹក និងការងូតទឹកពេលល្ងាច សុទ្ធតែមានអត្ថប្រយោជន៍ដល់សុខភាពរៀងៗខ្លួន។

អត្ថប្រយោជន៍នៃការងូតទឹកពេលព្រឹក

១ ជួយអ្នកឲ្យស្វាងស្មារតី

ការ​ងូត​ទឹក​នៅ​ពេល​ព្រឹក​ជួយ​ឲ្យរាង​កាយ​ភ្ញាក់​ឡើង និង​ជួយឲ្យមនុស្ស​មាន​អារម្មណ៍​ប្រុង​ប្រយ័ត្ន។ អ្នកជំនាញ Vij បាននិយាយថា “ខ្ញុំងូតទឹកនៅពេលព្រឹកដើម្បីឲ្យរាងកាយមានការប្រុងប្រយ័ត្ន និងចាប់ផ្តើមថ្ងៃថ្មីជាមួយនឹងរាងកាយស្អាត។ នេះ​ជួយ​ឲ្យខ្ញុំ​មាន​អារម្មណ៍​សុខ​ស្រួល និង​ធូរស្រាល​ជាង​មុន”។

២ កម្ចាត់ជាតិខាញ់ចេញពីសក់

ស្បែកក្បាលរបស់យើងអាចបញ្ចេញជាតិប្រេងបន្ទាប់ពីធ្វើការ និងរស់នៅមួយថ្ងៃ។ វេជ្ជបណ្ឌិត Vij ពន្យល់ថា “នៅពេលអ្នកគេង ស្បែកក្បាលរបស់អ្នកប៉ះនឹងខ្នើយ ប្រេង និងសម្ពាធនៃការដេកដែលអាចធ្វើឲ្យសក់របស់អ្នកមានជាតិខាញ់ និងពិបាកក្នុងការធ្វើរចនាប័ទ្ម។ ដូច្នេះការងូត និងកក់សក់នៅពេលព្រឹក នឹងជួយអ្នកកម្ចាត់ជាតិខ្លាញ់ចេញពីសក់របស់ពួកគេ ជួយសម្អាតស្បែកក្បាល និងធ្វើឲ្យសក់ទន់រលោង។

អត្ថប្រយោជន៍នៃការងូតទឹកពេលយប់

១ មានប្រយោជន៍សម្រាប់ការគេង

វេជ្ជបណ្ឌិត Jason Singh ដែលធ្វើការនៅចក្រភពអង់គ្លេសពន្យល់ថា ការងូតទឹកក្តៅប្រហែល ៤០-៤២អង្សាសេ នឹងជួយជំរុញការបញ្ចេញអរម៉ូន Melatonin ដែលជាអរម៉ូនដែលជួយគ្រប់គ្រងនាឡិកាជីវសាស្រ្ត និងការគេង។ នេះជួយឲ្យអ្នកមានគុណភាពដំណេកកាន់តែប្រសើរ។

២ កាត់បន្ថយការឈឺចាប់សាច់ដុំ និងរមួលក្រពើ

ការ​ងូត​ទឹក​ក្តៅ​ឧណ្ហៗ​នៅ​ពេល​ល្ងាច ​អាច​ជួយ​កាត់​បន្ថយ​ការ​ឈឺ​ចាប់ និង​ភាព​តាន​តឹង​សាច់ដុំ ​បន្ទាប់​ពី​ធ្វើ​ការ​ពេញ​មួយ​ថ្ងៃ។ ការងូតទឹកក្តៅនៅពេលល្ងាច ក៏អាចការពារការរមួលក្រពើនៅពេលយប់ផងដែរ។

៣ កាត់បន្ថយហានិភ័យនៃជំងឺស្បែក

ការ​ងូត​ទឹក​មុន​ចូល​គេង​ នឹង​ជួយ​កម្ចាត់​បាក់តេរី និង​មេរោគ​ដែល​មាន​នៅ​លើ​រាងកាយ និង​សក់ រក្សា​ស្បែក​ស្អាត និង​ត្រជាក់។ ស្បែកបង្កើតឡើងវិញនៅពេលយើងគេង ដូច្នេះការងូតទឹកនៅពេលយប់ជួយឲ្យស្បែកស្អាត មានប្រយោជន៍សម្រាប់ដំណើរការបង្កើតកោសិកាស្បែកថ្មី ការពារមុន ឬជំងឺស្បែកផ្សេងៗ។

៤ ការពារអាឡ័កស៊ី

ការងូតទឹកពេលល្ងាចជួយកម្ចាត់អាឡ័កស៊ី ដូចជាលំអង និងធូលីដែលជាប់ស្បែក និងសំលៀកបំពាក់ បន្ទាប់ពីធ្វើការនៅខាងក្រៅមួយថ្ងៃ ដោយហេតុនេះជួយកាត់បន្ថយហានិភ័យនៃអាឡ័កស៊ី។

ងូតទឹកពេលព្រឹក ឬពេលយប់ មានប្រយោជន៍ជាង?

ការ​ងូត​ទឹក​ពេល​ព្រឹក និង​ការ​ងូត​ទឹក​នៅ​ពេល​ល្ងាច​នាំ​មក​នូវ​អត្ថប្រយោជន៍​មួយ​ចំនួន។ ទោះជាយ៉ាងណាក៏ដោយ ការជ្រើសរើសរវាង ពេលព្រឹក និងពេលល្ងាចក៏អាស្រ័យលើតម្រូវការផ្ទាល់ខ្លួន និងគោលដៅសុខភាពរបស់មនុស្សម្នាក់ៗផងដែរ។

ប្រសិនបើអ្នកចង់ចាប់ផ្តើមថ្ងៃរបស់អ្នកពោរពេញដោយថាមពល និងស្មារតីស្រស់ស្រាយ ការងូតទឹកពេលព្រឹកអាចជាជម្រើសដ៏ត្រឹមត្រូវ។ ផ្ទុយ​ទៅ​វិញ ប្រសិន​បើ​អ្នក​ចង់​សម្រាក​លំហែ​កាយ​បន្ទាប់​ពី​ពេញ​មួយ​ថ្ងៃ ហើយ​ចង់​បាន​ដំណេក​ល្អ​នោះ សូម​ជ្រើសរើស​ការ​ងូត​ទឹក​ពេល​យប់។

លោកវេជ្ជបណ្ឌិត Vij ក៏បានកត់សម្គាល់ ៣ចំណុចទៀតថា ពេលងូតទឹក មិនថាពេលព្រឹក ឬពេលយប់ មនុស្សគួរងូតទឹកត្រឹមតែ ៥-១០ នាទីប៉ុណ្ណោះ ចៀសវាងការត្រាំក្រោមម៉ាស៊ីនយូរពេក ជាពិសេសអាកាសធាតុត្រជាក់ អាចធ្វើឲ្យផ្តាសាយ ប៉ះពាល់​ដល់​សុខភាព​​។

អ្នក​ជំនាញ​រូប​នេះ​បាន​បន្ថែម​ថា​ មនុស្ស​ក៏​គួរ​ប្រើ​ទឹកក្តៅ​ជំនួស​ទឹក​ក្តៅ​ឬ​ត្រជាក់​ដែរ។ ជាចុងក្រោយ នៅពេលងូតទឹក អ្នកអាចប្រើជែលផ្កាឈូកទន់ៗ ដើម្បីបង្កើនប្រសិទ្ធភាពនៃការលាងសម្អាតរាងកាយបានយ៉ាងល្អប្រសើរ៕

អត្ថបទ៖ សាង ស្រីល័ក្ខ

ចុចអាន៖បិទគម្របបង្គន់ពេលចុចទឹក មិនបានបញ្ឈប់ការរីករាលដាលមេរោគឡើយ