ការសិក្សារកឃើញថា បុរសស្លៀកខោក្នុងរឹបពេក ពេលមេឃក្តៅខ្លាំង ប្រឈមអត់កូន 

អាកាសធាតុក្តៅខ្លាំង មិនមែនប៉ះពាល់ត្រឹមសុខភាពឬផលិតភាពការងាររបស់មនុស្សប៉ុណ្ណោះទេ ប៉ុន្តែថែមទាំងប៉ះពាល់ដល់ការមានកូនរបស់មនុស្សប្រុសផងដែរ ហើយអ្នកស្រាវជ្រាវបានណែនាំបុរសដែលគ្រោងយកកូនក្នុងរយៈពេលមួយទៅបីខែខាងមុខ ត្រូវចៀសវាងការចេញទៅក្រៅពេលថ្ងៃក្តៅខ្លាំង ​ការស្ទីម​សូណា ងូត​ទឹក​ក្តៅ និងស្លៀក​ខោក្នុង​រឹបពេក។ នេះបើតាមការរកឃើញរបស់សាកលវិទ្យាល័យជាតិសិង្ហបុរី (NUS) និងចេញផ្សាយដោយគេហទំព័រ The Straits Times កាលពីថ្ងៃចន្ទទី១៨ខែមីនា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

អ្នកស្រាវជ្រាវមកពីសាលាវេជ្ជសាស្ត្រ Yong Loo Lin របស់ NUS បានសិក្សាសំណាកមេជីវិតឈ្មោលពីបុរសចំនួន៨១៨នាក់ បន្ទាប់មក អ្នកវិទ្យាសាស្ត្របានតាមដានផលប៉ះពាល់នឹងកម្តៅខ្លាំងរបស់បុរស ឬនៅពេលដែលសីតុណ្ហភាពជាមធ្យមកើនលើស២៩.៨អង្សាសេ។ 

ពួកគេរកឃើញថា បុរសដែលប៉ះពាល់នឹងកម្តៅខ្លាំងក្នុងអំឡុងពេលបីខែ គឺមានហានិភ័យខ្ពស់ ៤៦%នៃការបញ្ចេញមេជីវិតឈ្មោលទាប ហើយកោសិកាបន្តពូជ ក៏ត្រូវបានរកឃើញថាមានចលនាតិចនិងយឺតជាងធម្មតាផងដែរ។

អ្នកស្រាវជ្រាវម្នាក់ក្នុងក្រុមឈ្មោះ Samuel Gunther និយាយថា ការរកឃើញទាំងនេះ កាន់តែច្បាស់សម្រាប់បុរសដែលមានអាយុចន្លោះពី២៥ទៅ៣៥ឆ្នាំ ដែលភាគច្រើនជាវ័យត្រូវក្លាយជាឪពុកគេ។

ក្នុងសន្និសីទសារព័ត៌មានកាលពីថ្ងៃចន្ទទី១៨ខែមីនា លោកវេជ្ជបណ្ឌិត Gunther លើកឡើងថា “តាមធម្មតា គុណភាពមេជីវិតឈ្មោលថយចុះទៅតាមពេលវេលា ប៉ុន្តែអ្វីដែលយើងបានរកឃើញនៅក្នុងការសិក្សានេះគឺបង្ហាញយ៉ាងច្បាស់ថា បុរសអាយុចន្លោះពី ២៥ទៅ៣៥ឆ្នាំ គឺត្រូវរងផលប៉ះពាល់ខ្លាំងបំផុតដោយសារកម្តៅ។ សូមកុំគិតថា វាជារឿងសាមញ្ញ ព្រោះវាប៉ះពាល់ដល់ការរៀបចំផែនការគ្រួសាររបស់អ្នក”។

ដោយសារអត្រាមានកូនទាបក្នុងប្រទេសសិង្ហបុរី អ្នកស្រាវជ្រាវបានណែនាំបុរសដែលគ្រោងយកកូនក្នុងរយៈពេលមួយទៅបីខែខាងមុខ ត្រូវចៀសវាងការចេញទៅក្រៅពេលថ្ងៃក្តៅខ្លាំង ​គួរ​ចៀសវាង​ការស្ទីម​សូណា ងូត​ទឹក​ក្តៅ និងស្លៀក​ខោក្នុង​រឹបពេក​ក្នុង​អំឡុង​ពេល​នោះ។

សូមបញ្ជាក់ ការរកឃើញនេះគឺជាផ្នែកមួយនៃគម្រោង HeatSafe ដែលបូករួមការសិក្សាជាច្រើនចូលគ្នា និងចំណាយពេលជាង៣ឆ្នាំកន្លះ ដើម្បីសិក្សាតើការកើនឡើងសីតុណ្ហភាព ប៉ះពាល់ដល់សុខភាពនិងផលិតភាពការងាររបស់មនុស្សនៅប្រទេសសិង្ហបុរីនិងក្នុងតំបន់ យ៉ាងដូចម្តេចខ្លះ៕

អត្ថបទ៖ សុខ សុវណ្ណ

ចុចអាន៖ ថៃ ព្រមានក្រុមមនុស្ស៤ប្រភេទ ប្រឈមហានិភ័យ ស្លាប់ដោយសារកម្តៅក្តៅខ្លាំង