ក្រសួងធនធានទឹក ណែនាំឱ្យពលរដ្ឋប្រយ័ត្នចំពោះអាការ Heat Stroke នៅពេលកម្ដៅឡើងដល់ ៤០អង្សា

ក្រសួងធនធានទឹក និងឧតុនិយម បានណែនាំប្រជាពលរដ្ឋតាមរយៈបណ្តាញសង្គម កាលពីថ្ងៃទី៣០ ខែមេសា ឆ្នាំ២០២៤ ឱ្យមានការប្រុងប្រយ័ត្នខ្ពស់ចំពោះអាការ Heat Stroke នៅពេលដែលកម្តៅឡើងដល់ ៤០អង្សាសេ ដែលជាកម្រិតមួយហានិភ័យ។

ក្រសួងធនធានទឹក បានឱ្យនិយមន័យអាការ Heat Stroke ថា ជារោគសញ្ញាដែលទាក់ទងនឹងការឡើងកម្តៅក្នុងរាងកាយខ្ពស់ខ្លាំង។ អាការនេះកើតឡើងនៅពេលដែលយើងនៅក្រោមកម្តៅថ្ងៃរយៈពេលយូរ ជាហេតុធ្វើឱ្យរាងកាយមិនអាចគ្រប់គ្រងសីតុណ្ហភាពក្នុងខ្លួនបាន អាចឡើងដល់ ៤០អង្សាសេ ឬ ខ្ពស់ជាងនេះក្នុងរយៈពេល ១០ ទៅ១៥នាទី។ សម្រាប់អាការរបស់ Heat Stroke មានដូចជា ក្តៅខ្លួនខ្លាំងអាចលើសពី ៤០អង្សាសេ, ដកដង្ហើមលឿន ចង្វាក់បេះដូងលោតញាប់, ឈឺក្បាល ច្របូកច្របល់ ឆាប់ប្តូរចិត្ត, មានអាករប្រកាច់ សន្លប់បាត់ស្មារតី និងក្អួតផងដែរ។

តើមានវិធីអ្វីខ្លះ ដើម្បីអាចបង្ការ ឬការពារខ្លួនពីអាការ Heat Stroke? ជុំវិញនឹងបញ្ហានេះ ក្រសួងក៏បានប្រាប់ពីវិធីសាស្ត្រមួយចំនួនក្នុងការបង្ការដូចជា នៅក្នុងម្លប់ ឬទីកន្លែងត្រជាក់មានខ្យល់ចេញចូល។ ស្លៀកសម្លៀកបំពាក់រលុងៗ ស្រាល និងមានពណ៌ភ្លឺ, ពិសារទឹកឱ្យបានច្រើនតាមដែលអាចធ្វើបាន, ចៀសវាងការទទួលទានអាហារដែលធ្វើឱ្យឆាប់ក្តៅក្នុង និងចៀសវាងការទទួលទានគ្រឿងស្រវឹង រួមទាំងជាតិកាហ្វេអ៊ីនផង។

សូមជម្រាបថា សព្វថ្ងៃអាកាសធាតុហាក់ឡើងកម្តៅខ្លាំង មិនថានៅកម្ពុជា ឬ ប្រទេសជិតខាងនោះទេ រហូតដល់ប្រទេសខ្លះបង្ខំចិត្តផ្អាកការសិក្សាមួយរយៈដោយសារតែកម្តៅកើនឡើងខ្លាំងទៀតផង។ ដូច្នេះ ពលរដ្ឋគ្រប់រូប គួរមានការប្រុងប្រយ័ត្ន និងថែរក្សាសុខភាពឱ្យបានល្អ៕