ក្រសួង ពង្រឹងគុណភាពថែទាំ សុខភាពមាតា ទារក និងកុមារ កាត់បន្ថយ អត្រាមរណភាព

សាស្រ្តចារ្យ អ៊ឹម សិទ្ធិការ្យ រដ្ឋលេខាធិការ ក្រសួងសុខាភិបាល និងជា ប្រធានគណៈកម្មការសម្របសម្រួលក្នុងការពង្រឹងគុណភាព ថែទាំ ព្យាបាល សុខុមាលភាពទារក កុមារនិងរោគស្រ្តី បានដឹកនាំការប្រជុំលើកទី៥ របស់ក្រុមការងារបច្ចេកទេសជួយពង្រឹងគុណភាពថែទាំ ព្យាបាល សុខុមាលភាព មាតា ទារក និងកុមារ ដើម្បីកាត់បន្ថយ អត្រាមរណភាពមាតា។ នេះបើតាមការផ្ដល់ព័ត៌មានពីក្រសួងសុខាភិបាល នៅថ្ងៃនេះ។

កិច្ចប្រជុំនេះរៀបចំឡើងក្នុងគោលបំណង៖ ពិនិត្យរបាយការណ៍វឌ្ឍនភាព នៃកិច្ចប្រជុំរបស់ក្រុមការងារបច្ចេកទស សុខភាពមាតា ទារកនិងកុមារ ៤លើកកន្លងមក, ធ្វើបច្ចុប្បន្នភាពលើការងារពង្រឹងគុណភាពថែទាំ សុខភាពមាតា ទារក និងកុមារ ដើម្បីកាត់បន្ថយ អត្រាមរណភាពមាតា, ពិនិត្យការអនុវត្តការផ្តល់កញ្ចប់អន្តរគមន៍សេវាថែទាំ ពេលមានផ្ទៃពោះ ពេលសម្រាល និងក្រោយពេលសម្រាល, ពិនិត្យវឌ្ឍនភាពនៃការអនុវត្ត EmONC សម្រាប់ឆ្នាំ២០២៤, ចែករំលែកបទពិសោធន៍ អំពីអន្តរាគមន៍សង្រោះទារក តាមរយ: បទបង្ហាញក្រោមប្រធានបទ Start4Newborn។

កិច្ចប្រជុំនេះ រៀបចំនៅនៅទីស្តីការក្រសួងសុខាភិបាល ថ្មីៗនេះ ដោយមានការអញ្ជើញចូលរួមពីថ្នាក់ដឹកនាំ និងមន្រ្តីជំនាញផ្នែកសុខភាពមាតា ទារក និងកុមារ សរុបចំនួន ៥៣នាក់ ដែលជាថ្នាក់ដឹកនាំតំណាងក្រសួងសុខាភិបាល ថ្នាក់ដឹកនាំមន្ទីពេទ្យគន្ធបុប្ផា មន្ទីរពេទ្យកុមារជាតិ មជ្ឈមណ្ឌលជាតិគាំពារមាតា និងទារក តំណាងមន្ទីរពេទ្យខេត្តកំពង់ចាម បាត់ដំបង តាកែវ សៀមរាប ប្រធានផ្នែកសម្ភព និងប្រធានផ្នែកសង្រ្គោះទារក នៃមន្ទីពេទ្យកាល់ម៉ែត មន្ទីរពេទ្យមិត្តភាពខ្មែរ-សូវៀត មន្ទីរពេទ្យកុមារជាតិ មន្ទីរពេទ្យព្រះអង្គឌួង និងសមាគម និងអង្គការដៃគូ មួយចំនួន មានជាអាទិ WHO KOFIH UNICEF UNFPA FHI/EQHA RACHA & Plan International សមាគមឆ្មប (ប្រធានសមាគមឆ្មប) និង គ្លីនិក សម្ភព និងរោគស្ត្រី ឯកជន ដូចជា មន្ទីរពេទ្យ ជោរី មន្ទីរសម្ភពសោភា គ្លីនិកសុខលាភមេត្រី និងមន្ទីរសម្ភព សុខភាពស្រ្តី៕