ក្រសួងសុខាភិបាល ចុះពង្រឹងសេវាសុខាភិបាល ជុំទី២ នៅបណ្ដាមន្ទីរពេទ្យបង្អែក ខេត្តកណ្ដាល

ក្រុមការងារជួយពង្រឹងគុណភាពសេវាមន្ទីរពេទ្យ បង្អែកស្រុក ឯកឧត្តមសាស្រ្តាចារ្យ ធា គ្រុយ និងលោកជំទាវវេជ្ជបណ្ឌិត ប៉ែន រិកស៊ី បានចុះពិនិត្យការផ្តល់បម្រើសេវាសុខាភិបាលនៅ មន្ទីរពេទ្យបង្អែកកោះធំ មន្ទីរពេទ្យបង្អែកល្វាឯម មន្ទីរពេទ្យបង្អែកស្អាង មន្ទីរពេទ្យបង្អែករការកោង និងអង្គស្នួល ក្នុងខេត្តកណ្ដាល។

គោលបំណង នៃការចុះពិនិត្យនេះគឺ ដើម្បីពិនិត្យ ផ្ទៀងផ្ទាត់ពីវឌ្ឍនភាព របស់អង្គភាពធៀបទៅនឹងជុំទី១ ព្រមទាំងបញ្ហាប្រឈមថ្មីៗដែលកើតមាន ដែលការចុះពិនិត្យនេះ ចាប់ពីថ្ងៃទី១២ ដល់ថ្ងៃទី១៤ និងថ្ងៃទី២០ ដល់ថ្ងៃទី២១ ខែមិថុនា ឆ្នាំ២០២៤។

ក្នុងដំណើរចុះពិនិត្យការងារពង្រឹងសេវា ជុំទី២នេះ ក្រុមការងារបានជួបជាមួយថ្នាក់ដឹកនាំ មន្រ្តី បុគ្គលិក នៃមន្ទីរពេទ្យបង្អែកទាំងអស់ក្នុងទីតាំងនីមួយៗ ការិយាល័យសុខាភិបាលស្រុកប្រតិបត្តិ និងថ្នាក់ដឹកនាំមន្ទីរសុខាភិបាល នៃរដ្ឋបាលខេត្ត ដើម្បីផ្តល់ព័ត៌មានត្រឡប់ និងពិភាក្សាលើវឌ្ឍនភាព បញ្ហាប្រឈម ដំណោះស្រាយ និងសំណូមពរ ក៏ដូចជាការប្តេជ្ញាចិត្តក្នុងការបន្តលើកកម្ពស់គុណភាពសេវា មន្ទីរពេទ្យបង្អែក ឱ្យកាន់តែប្រសើរ ដើម្បី បម្រើសេវាសុខាភិបាលជូនប្រជាពលរដ្ឋកាន់តែ ប្រសើរឡើងបន្ថែមទៀត។

គួរបញ្ជាក់ថា នេះគឺជាជុំទី២ ដែល ក្រុមការងារបានចុះពិនិត្យជួយពង្រឹងសេវាសុខាភិបាលនៅមន្ទីរពេទ្យបង្អែកស្រុកទាំង៥ ខាងលើ ដែលជុំទី១ យើងបានចុះពិនិត្យកាលពីឆមាសទី៣ ឆ្នាំ២០២៣ ៕