ក្រសួងសុខាភិបាល ពិនិត្យវឌ្ឍនភាពការងារ មជ្ឈមណ្ឌលជាតិស្រាវជ្រាវវេជ្ជសាស្ត្របូរាណ

នៅមជ្ឈមណ្ឌលជាតិស្រាវជ្រាវវេជ្ជសាស្ត្របូរាណ ថ្មីៗនេះ ដោយទទួលបានការណែនាំពី សាស្រ្តាចារ្យ ឈាង រ៉ា រដ្ឋមន្រ្តីក្រសួងសុខាភិបាល វេជ្ជបណ្ឌិត នាង ភារិទ្ធ រដ្ឋលេខាធិការក្រសួងសុខាភិបាល រួមជាមួយ លោក ប៉ែន រដ្ឋា អនុរដ្ឋលេខាធិការក្រសួងសុខាភិបាល តាមប្រព័ន្ធអនឡាញ បានដឹកនាំកិច្ចប្រជុំប្រចាំខែ ក្នុងការពិនិត្យវឌ្ឍនភាពការងារ និងលើកទិសដៅការងារបន្ត ព្រមទាំងបញ្ហាប្រឈមផ្សេងៗ របស់មជ្ឈមណ្ឌលជាតិស្រាវជ្រាវវេជ្ជសាស្ត្របូរាណ ដើម្បីតាមដាន និងជំរុញការងារឱ្យកាន់តែមានប្រសិទ្ធភាពបន្ថែមទៀត។

ក្នុងឱកាសនោះ រដ្ឋលេខាធិការបានផ្តល់អនុសាសន៍ជំរុញលើកទឹកចិត្ត បន្តការងារអនុវត្តរួមមាន៖

១. គោរពតួនាទីភារកិច្ចទទួលខុសត្រូវរបស់ខ្លួនទៅតាមរចនាសម្ព័ន្ធ

២. អនុវត្តតាមផែនការ និងសេចក្តីសម្រេចរបស់អង្គប្រជុំ

៣. ពន្លឿនការងាររៀបចំកែសម្រួលលិខិតអមសេចក្តីព្រាងអនុក្រឹត្យ

៤. សាមគ្គីភាពការងារក្នុងអង្គភាពដើម្បីសម្រេចផែនការឱ្យមានប្រសិទ្ធភាព

៥. ពង្រឹងវត្តមានរបស់មន្ត្រីតាមការិយាល័យនីមួយៗ។

គួរបញ្ជាក់ថា កិច្ចប្រជុំនេះមានការអញ្ជើញចូលរួមពី វេជ្ជបណ្ឌិត ជួរ ម៉េង ប្រធានមជ្ឈមណ្ឌលជាតិស្រាវជ្រាវវេជ្ជសាស្ត្របូរាណ រួមជាមួយថ្នាក់ដឹកនាំអង្គភាពចាប់ពីអនុប្រធានអង្គភាពរហូតដល់ប្រធានផ្នែកទាំងអស់៕