ផ្លាស់ប្ដូរប្រធានមន្ទីរពេទ្យបង្អែក ខេត្តបាត់ដំបង អភិបាល​ខេត្ត​ក្រើន​រំលឹក​ដល់គ្រូពេទ្យ​ ប្រកាន់ភ្ជាប់វិជ្ជាជីវៈ

ក្នុង​ពិធីផ្លាស់ប្តូរថ្នាក់ដឹកនាំ​នៅក្នុងមន្ទីរពេទ្យបង្អែកខេត្តបាត់ដំបង អភិបាល​ខេត្ត​បាត់ដំបង លោក សុខ លូ បាន​ជំរុញ​ឲ្យ​មន្រ្តីបុគ្គលិក​គ្រូពេទ្យប្រកាន់ភ្ជាប់​វិជ្ជាជីវៈ​ ប្រក​ប​ដោយសីលធម៌​ និង​ខិតខំ​បំពេញ​ការងារ​ឲ្យ​បានល្អប្រសើរថែមទៀត។

កាលពី​ថ្ងៃទី ២៦ ខែមិថុនា ឆ្នាំ ២០២៤ នៅក្នុងសាលាខេត្តបានរៀបចំពិធីផ្លាស់ប្ដូរតួនាទី និងមុខតំណែងរបស់មន្ត្រីសុខាភិបាលខេត្តមួយចំនួននៅ ក្នុងនោះដែរគេក៏បានសង្កេតឃើញមានការផ្លាស់ប្ដូរមុខតំណែងរបស់ប្រធានមន្ទីរពេទ្យបង្អែកខេត្តបាត់ដំបងផងដែរ។

លោក កាក់ សីលា ឋានន្តរស័ក្តិ មន្ត្រីសុខាភិបាលជាន់ខ្ពស់ដើមខ្សែពិសេស ថ្នាក់លេខ៣ នៃក្របខណ្ឌមន្រ្តីសុខាភិបាលជាន់ខ្ពស់ ត្រូវបានផ្ទេរ​ភារកិច្ច​ពីប្រធានមន្ទីរពេទ្យបង្អែកខេត្តបាត់ដំបងឳ្យទៅបម្រើការងារនៅការិយាល័យសុខាភិបាលស្រុកប្រតិបត្តិបាត់ដំបង ចំណុះរចនាសម្ព័ន្ធមន្ទីរសុខាភិបាលនៃរដ្ឋបាលខេត្តបាត់ដំបង និងតែងតាំងលោក ហាន ឧត្តម ឋានន្តរស័ក្តិ មន្ត្រីសុខាភិបាលជាន់ខ្ពស់ដើមខ្សែពិសេស ថ្នាក់លេខ៦ នៃក្របខណ្ឌមន្រ្តីសុខាភិបាលជាន់ខ្ពស់​ឲ្យ​កាន់មុខដំណែងជាប្រធានមន្ទីរពេទ្យបង្អែកខេត្តបាត់ដំបង និងលោក កិម សាផាន្នភិរម្យ ឋានន្តរស័ក្តិ មន្ត្រីសុខាភិបាលជាន់ខ្ពស់ដើមខ្សែពិសេស ថ្នាក់លេខ៦ នៃក្របខណ្ឌមន្រ្តីសុខាភិបាលជាន់ខ្ពស់ ជាអនុប្រធានមន្ទីរពេទ្យបង្អែកខេត្តបាត់ដំបង។

លោក សុខ លូ អភិបាល នៃគណៈអភិបាលខេត្តបាត់ដំបង បានណែនាំដល់ប្រធានមន្ទីរពេទ្យបង្អែកខេត្តបាត់ដំបងថ្មី ត្រូវតែបន្តយុទ្ធនាការអនុត្តកិច្ចការការងាររបស់ខ្លួនបន្ថែមទៀត តាមរយៈការខិតខំប្រឹងប្រែងបំពេញការងារក្នុងនាមជាថ្នាក់ដឹកនាំ ទៅតាមតួនាទីភារកិច្ចរបស់ខ្លូន ពិសេសពង្រឹងរចនាសម្ព័ន្ធនៅក្នុងការងារ ពង្រឹងសីលធម៌ សុជីវធម៌ក្រុមគ្រូពេទ្យនៅក្នុងមន្ទីរពេទ្យ និងបម្រើប្រជាពលរដ្ឋអោយបានល្អប្រសើរជាងមួយកម្រិតបន្ថែមទៀត ដើម្បីបំពេញភាពពេញចិត្តដល់ប្រជាពលរដ្ឋដែលទទួលសេវាកម្មថែទាំជម្ងឺនៅមន្ទីរបង្អែកទីនេះ ។

លោកក៏​ក្រើន​រំលឹក​ដល់ក្រុមគ្រូពេទ្យ​ ឲ្យ​បន្តកិច្ចការរបស់ខ្លួនស្របនឹងវិជ្ជាជីវៈជាគ្រូពេទ្យ ប្រកាន់ខ្ជាប់នូវសីលធម៌ សុជីវធម៌ជាប់ជានិច្ច ពិសេសខិតខំថែទាំអ្នកជំងឺដែលមកទទួលសេវាព្យាបាលនៅមន្ទីរបង្អែកខេត្តបាត់ដំបង។

មួយរយៈចុងក្រោយនេះ នៅក្នុងមន្ទីរពេទ្យបង្អែកខេត្តបាត់ដំបង មានរឿងអាស្រូវបានកើតឡើងផ្ទួនៗគ្នា ដោយសារតែមានអ្នកជំងឺស្លាប់ជាបន្តបន្ទាប់ ដែលបញ្ហានេះបានធ្វើឲ្យបណ្ដាញសង្គមមួយចំនួនបានបង្ហោះឡើងអមជាមួយនឹងសារដែលធ្វើការរិះគន់ទៅលើមន្ទីរពេទ្យយ៉ាងចាស់ដៃ។

ស្រ្តី​ម្នាក់​ជា​គ្រូបង្រៀនថ្នាក់មត្តេយ្យ នៅសាលាបឋមសិក្សាស្វាយធំ បានស្លាប់ទាំងម្តាយទាំងកូននៅក្នុងពោះ នៅក្នុង​មន្ទីរពេទ្យ​បង្អែក​ខេត្តបាត់ដំបង ហើយ​ត្រូវ​បាន​ចោទ​ប្រកាន់ដោយសារ​ក្រុម​គ្រូពេទ្យ​​ធ្វើការធ្វេសប្រហែស។

យ៉ាងណា​ចំពោះមរណៈភាពស្រ្តី​ខាងលើ មន្ទីរពេទ្យបង្អែកខេត្តបាត់ដំបងបានឆ្លើយតបថា ស្រ្តីឈ្មោះ ចាន់ ស្រីណុច អាយុ ៤៣ ឆ្នាំ ដែលមានអាសយដ្ឋាននៅ ភូមិដាំស្ពៃ សង្កាត់ ស្លាកែត ក្រុងបាត់ដំបង ខេត្តបាត់ដំបង បានទទួលមរណៈភាពកាលពីថ្ងៃទី ៣០ ខែ មេសា ឆ្នាំ ២០២៤ វេលាម៉ោង ១២:៣០នាទី នៅក្នុងមន្ទីរពេទ្យបង្អែកខេត្តបាត់ដំបង។

ស្រ្តី​រងគ្រោះ​បានចូលសម្រាកនៅមន្ទីរពេទ្យបង្អែកខេត្តបាត់ដំបង កាលពីថ្ងៃទី២២ ខែមេសា ឆ្នាំ ២០២៤ វេលាម៉ោង ១៥:៤០ ដោយមូលហេតុឈឺក្បាល និងថប់ដង្ហើម ហើមជើងទាំងសងខាង និងមានផ្ទៃពោះ ៨ ខែ (ស្ត្រីបានសម្រាលកូន ប្រុសទម្ងន់ ២,៩គីឡូក្រាម) ។

គ្រូពេទ្យព្យាបាលបានពិនិត្យឃើញថា ស្រ្តីខាងលើស្ថិតក្នុងស្ថានភាពខ្សោយថ្លើមចុងក្រោយ ជំងឺទឹកនោមផ្អែមធ្ងន់ធ្ងរ ខ្សោយ​តម្រងនោមចុងក្រោយ និងមានផ្ទៃពោះចំនួនប្រាំពីរដង (កូនមួយរលូត) (សម្រាលចុងក្រោយជាកូនទី៦)។

នៅចំពោះមុខស្ថានភាពបែបនេះ ក្រុមការងារបានខិតខំព្យាបាលដោយឱសថនិងមធ្យោបាយបច្ចេកទេស វិទ្យាសាស្ត្រ ដោយកិច្ចខិតខំប្រឹងប្រែងសង្គ្រោះជីវិត តែជាអកុសលស្រ្តីជាអ្នកជំងឺបានទទួលមរណៈភាព នៅវេលា ម៉ោង ១២ និង ៣០នាទី ថ្ងៃទី៣០ខែមេសា ឆ្នាំ២០២៤ នៅក្នុងផ្នែកសង្គ្រោះបន្ទាន់ជំងឺទូទៅ នៃមន្ទីរពេទ្យបង្អែកខេត្ត បាត់ដំបង ដោយរោគវិនិច្ឆ័យ ការពុលថ្លើមខ្លាំងក្លា ដែលបណ្ដាលឱ្យពុលដល់ខួរក្បាល (Encophalopathic hépatique) និងជំងឺខ្សោយថ្លើម រួមនឹងខ្សោយតម្រងនោមចុងក្រោយ (Syndrome hépata-rinal, par l’insuffisance hépatique de stade terminal)៕

អត្ថបទ : សោ និយមរ័ត្ន