ក្រសួងបរិស្ថាន៖ គុណភាពខ្យល់ទូទាំងប្រទេសល្អណាស់ អំណោយផលសម្រាប់ទេសចរណ៍

ក្រសួងបរិស្ថាន បានឱ្យដឹងថា ស្ថានភាពគុណភាពខ្យល់នៅទូទាំងប្រទេសកម្ពុជាមានភាពល្អណាស់ គិតត្រឹមថ្ងៃទី ២៩ ខែ មិថុនា ឆ្នាំ ២០២៤ ដែលមានភាពអំណោយផលសម្រាប់សកម្មភាពក្រៅផ្ទះ និងការធ្វើដំណើរកម្សាន្តទៅតាមបណ្តាខេត្តនានា។
ការវាយតម្លៃគុណភាពខ្យល់របស់ក្រសួងបរិស្ថាន ផ្អែកទៅតាមចំនួនស្ថានីយ៍/ឧបករណ៍ ដែលបានដាក់នៅតាមបណ្តារាជធានី ខេត្ត ទូទាំងប្រទេស សម្រាប់ពិនិត្យគុណភាពខ្យល់ ហើយជាលទ្ធផលនោះគឺ ២៥ រាជធានី ខេត្ត មានគុណភាពខ្យល់ល្អណាស់។

សម្រាប់សន្ទស្សន៍គុណភាពខ្យល់នេះ ត្រូវបានបែងចែកទៅជា ៦ ពណ៌ សម្រាប់ពណ៌ខៀវ តំណាងឱ្យគុណភាពខ្យល់ល្អណាស់ សមស្របសម្រាប់សកម្មភាពខាងក្រៅផ្ទះ និងទេសចរណ៍។ ពណ៌បៃតង គុណភាពខ្យល់ល្អ អាចធ្វើ​សកម្មភាពទៅខាងក្រៅ និងការធ្វើដំណើរដូចធម្មតា។ ប៉ុន្តែបុគ្គលដែលមានប្រតិកម្មអាលែហ្សីតិចតួចគួរតែកាត់បន្ថយពេល វេលាសម្រាប់សកម្មភាពខាងក្រៅ។
ពណ៌លឿង មនុស្សទូទៅអាចធ្វើសកម្មភាពក្រៅផ្ទះធម្មតា។ ប៉ុន្តែ អ្នកដែលមានសុខភាពទន់ខ្សោយ ប្រសិនបើមាន​រោគសញ្ញាដំបូងដូចជា ការក្អក ការដកដង្ហើមពិបាក រលាកភ្នែកនោះ សូមកាត់បន្ថយរយៈពេលនៃសកម្មភាពខាងក្រៅរបស់អ្នក។
ចំណែកពណ៌ទឹកក្រូច មនុស្សទូទៅគួរតែតាមដានសុខភាពប្រសិន បើមានរោគសញ្ញាដំបូងដូច ជាការក្អក ការពិបាកដកដង្ហើម រលាកភ្នែក សូមកាត់បន្ថយរយៈពេលនៃសកម្មភាពខាងក្រៅរបស់អ្នក ឬប្រើឧបករណ៍ការពារផ្លូវដង្ហើមប្រសិនបើមិនចាំបាច់។
ពណ៌ក្រហមវិញ មនុស្សគ្រប់គ្នាគួរតែចៀសវាងសកម្មភាពខាងក្រៅ ចៀសវាងតំបន់ដែលមានការបំពុលខ្យល់ខ្ពស់ ឬប្រើប្រាស់ឧបករណ៍ការពារផ្លូវដង្ហើមប្រសិនបើចាំបាច់។
ចំណែកពណ៌ស្វាយ គឺជាការព្រមានអំពីស្ថានភាពអាសន្នចំពោះសុខភាព។ សូម្បីតែមនុស្សដែលមានសុខភាពល្អនឹងពិបាកការស៊ូទ្រាំក្នុងកំឡុងពេលនេះ វាអាចមានការ រលាកខ្លាំង និងរោគសញ្ញាជាច្រើនទៀត។ ដូច្នេះមនុស្សទាំងអស់គួរតែ ចៀសវាងសកម្មភាពចេញទៅខាងក្រៅ៕
អត្ថបទ៖ ឡាយ សាមាន