ក្រសួង ណែនាំអាជ្ញាធរខេត្តជាប់ព្រំដែនពង្រឹងវិធានការចត្តាឡីស័កទប់ស្កាត់នាំចូលជំងឺ

ក្រសួងសុខាភិបាល ណែនាំអាជ្ញាធរខេត្តជាប់ព្រំដែន យកចិត្តទុកដាក់ក្នុងការតាមដាន និងទប់ស្កាត់ជំងឺឆ្លងដែលអាចនាំចូលពីបណ្តាប្រទេសនានា ដោយពង្រឹងវិធានការចត្តាឡីស័ក ខណៈជំងឺអ៊ីមផក (Mpox) និងជំងឺផ្សេងៗកំពុងផ្ទុះ​រាល​ដាល​នៅក្រៅប្រទេសគួរឱ្យព្រួយបារម្ភ។

យោងលិខិតរបស់រដ្ឋមន្រ្តីក្រសួងសុខាភិបាលលោក ឈាង រ៉ា ដែលបានជម្រាបជូនអភិបាលខេត្តជាប់ព្រំដែន ចុះថ្ងៃទី ២៣ ខែសីហា ឆ្នាំ ២០២៤ បានលើកឡើងថា បច្ចុប្បន្នមានការផ្ទុះឡើងនៃជំងឺអ៊ីមផក (Mpox) ដែលអង្គការសុខភាពពិភពលោកបានប្រកាសជាគ្រោះអាសន្នសុខភាពសាធារណៈគួរឱ្យព្រួយបារម្មណ៍ជាអន្តរជាតិ។

ក្នុងបរិការណ៍នេះ លោក ឈាង រ៉ា បានស្នើឱ្យយកចិត្តទុកដាក់ក្នុងការតាមដាន និងទប់ស្កាត់ជំងឺឆ្លងដែលអាចនាំចូលពីបណ្តាប្រទេសនានា ដោយពង្រឹងវិធានការចត្តាឡីស័ក ដើម្បីទប់ស្កាត់ និងឆ្លើយតបការឆ្លងរាលដាលជំងឺនៅតាមច្រកចេញចូលប្រទេស ដើម្បីការពារសុខភាពជូនប្រជាជនកម្ពុជា។
ក្នុងលិខិតបញ្ជាក់ថា៖« សូមឯកឧត្តម លោកជំទាវ ពង្រឹងការងារតាមដាន និងទប់ស្កាត់ ប្រចាំការនៅស្នាក់ការត្រួតពិនិត្យច្រកចេញចូលប្រទេសឱ្យស្របតាមវិធានការសុខាភិបាល លិខិតបទដ្ឋានគតិយុត្ត ច្បាប់ជាតិ និងបទបញ្ញត្តិអន្តរជាតិ ប្រកបដោយប្រសិទ្ធិភាព និងការទទួលខុសត្រូវខ្ពស់»។

បើតាមក្រសួងសុខាភិបាល ក៏មានការរីករាលដាលជំងឺផ្តាសាយបក្សី (H5N1) ដែលឆ្លងពីសត្វទៅមនុស្ស និងជំងឺអង់ត្រាក់ (Anthrax) ដែលមាននៅក្នុងតំបន់ និងប្រទេសជិតខាង។ យោងតាមប្រព័ន្ធតាមដាន និងត្រួតពិនិត្យជំងឺ របស់នាយកដ្ឋាន ប្រយុទ្ធនឹងជំងឺឆ្លង នៃក្រសួងសុខាភិបាល បានបង្ហាញថា រហូតមកដល់ពេលនេះ នៅប្រទេសកម្ពុជា មានជំងឺ ផ្តាសាយបក្សី (H5N1) ចំនួន ៧២ករណី (ស្លាប់ ៤៣ករណី) និងជំងឺអ៊ីមផក (Mpox) ចំនួន ២០ករណី (គ្មានករណីស្លាប់)៕